Read Zokam Piancilna 50 Bible Online

Piancilna 50 - Zokam bible

Piancilna 50

¹Joseph a pa tung kidenna-a, amah kahin a nam hi.

²Tua ciangin, Joseph in a pa Israel a muat lo dinga a bawl dingun zato mangte a sawl hi. Tua ciangin zato mangte in amah a muat loh nadingin bawl uh a,

³a muat loh nadinga bawl nadingin ni sawmli sung hul a bei hi. Ama hangin Egypt mite ni sawm sagih sung a thum uh hi.

⁴Thumna hun a bei ciangin Pharaoh uliante tungah, Joseph in, "Na mai-ah maipha ka ngah leh kei tangin Pharaoh va hopihsak un, ama kiangah,

⁵‘Ka pa in kei hong kiciamsak-a, "Kei a si ding ka hi ta hi; Canaan gama kei mahmah in ka tawhsa hanah kei hong vui in," hong ci hi. Tu-in paito-in ka pa hong vuisak in; tua khit ciangin kong kileh kik ding hi, ci hi,’ va ci un," ci hi.

⁶Pharaoh in, "Paito inla na hih dinga hong kiciamsak bangin na pa va vui in," a ci hi.

⁷Tua ciangin Joseph a pa vui dingin paito hi. Pharaoh uliante khempeuh - ama zuma uliante le Egypt uliante khempeuh -

⁸banah Joseph’ innkuan sung mi khempeuh le ama sanggamte le a pa’ innkuanpihte khempeuh in a zui uh hi. A tate uh le a tuuhonte, a bawnghonte bek uh Goshen ah nusia uh hi.

⁹Sakollengte le sakol-galkapte a[247] in zong zui hi. A pawlcing pha mahmah uh hi.

¹⁰Jordan kianga Atad buhcilna phual a tun uh ciangin nasiatakin a taamlo uh hi; Joseph in tua lai-ah a pa hanga thumna hun ni sagih sung a zang hi.

¹¹Tua lai-a teng Canaan mite in Atad buhcilna phual-a a thum uh a muh uh ciangin amaute in, "Egypt mite in thumna nasiapi a bawl uh hi," a ci uh hi. Tua hangin Jordan kiang tua lai mun Abel Mizraim b[248] kici hi.

¹²Tua ciangin amah in amaute a sawl bangin Jacob tapate in a sem uh hi:

¹³Canaan gamah pua uh a, Abraham in kivuina mun dinga Hit mipa Ephron tunga lo tawh a lei khawm Mamre kianga Machpelah lo sunga suanghawm ah amah vui uh hi.

¹⁴Joseph in a pa a vui khit ciangin a pa vui dinga amah a zuite khempeuh le a sanggamte tawh Egypt ah ciah uh hi.

¹⁵Joseph sanggamte in a pa uh a sih ciangin, "Joseph in ama tunga i khialhnate khempeuh hong thukkik mawk leh maw?" ci uh hi.

¹⁶Tua ciangin Joseph tungah thu zasak uh a, "Na pa in a sih ma-in hih lamlahna hong nusiat hi:

¹⁷‘Joseph kiangah hih bangin ci un: Na sanggamte in nang hong bawlsiat luatna uh mawhnate le khialhnate na maisak ding kong thum hi, ci hi,’ Tu-in nong hehpihna in na pa’ Pasian’ nasemte mawhna hong maisak in," ci uh hi. A thuzaksakna uh Joseph kiang a tun ciangin Joseph kap hi.

¹⁸Tua ciangin a sanggamte pai-in a mai a kidenna uh hi. Amaute in, "Kote na sila ka hi uh hi," ci uh hi.

¹⁹Ahi hangin Joseph in amaute kiangah, "Lau kei un. Kei Pasian’ muna om ka hi hiam?

²⁰Note in kei siat nadinga na geel uh hi-a, ahi hangin Pasian in tu huna piang thu ah mi tampi nuntakna a hotkhiat nadingin a hoih dinga a geel ahi hi.

²¹Tua ahitak ciangin hong kihta kei un. No le na tate uh kong vak ding hi," ci hi. Amah in amaute lungnuamsak-a, amaute kamkhumin a hopih hi.

²²Joseph, a pa’ innkuanpihte khempeuh tawh Egypt ah a omkhawm uh hi. Amah kum za le sawm khat nungta a,

²³Ephraim’ tate khang thumna dong mu hi. Manasseh’ tapa Makir’ tate zong a suah in Joseph khuk c[249] tungah kisial hi.

²⁴Tua ciangin Joseph in a sanggamte kiangah, "Kei a si ding ka hi ta hi; ahi hangin note kiangah hong huh ding Pasian hong pai pelmawh dinga hih gam pan hong pikhia in Abraham, Isaac le Jacob tunga kiciama a khapsa gamah hong puak ding hi," ci hi.

²⁵Tua ciangin Joseph in Israel’ tapate tomlo in kiciamsaka, "Note huh dingin Pasian hong pai pelmawh ding hi, tua hun ciangin hih mun pan ka guhte na puato pelmawh ding uh hi," ci hi.

²⁶Tua ciangin kum za le sawm khat a pha Joseph a si hi. Amaute in a luang a muat loh nadingin bawl uh a, Egypt ah, hankuang khatin amah a kikoih hi.