Read Zokam Piancilna 7 Bible Online

Piancilna 7 - Zokam bible

Piancilna 7

¹Tua ciangin TOPA in Noah tungah, "Nang le na innkuan-buppi gunkhuangpi sungah lut un. Bang hang hiam cihleh hih khanghunin a thumaanmi-in nang kong mu zo hi.

²Ganhing a siang nam ciat pan sagih h[38], a nu le a pa, ganhing a sianglo nam ciat pan nih, a nu le a pa la-in,

³leitung bupah vasa namte a kizop nadingin vasa nam tek pan anu le apa sagih zong la in.

⁴Tu-a kipan ni sagih ni ciangin leitungah sun sawmli le zan sawmli sung guah ka zusak dinga ka bawlsa nuntakna nei peuhmah lei maitang pan ka phiatsiang ding hi," ci hi.

⁵TOPA in amah a sawl khempeuh Noah in hih hi.

⁶Leitungah tuiciin a tunin Noah kum zaguk upa ta hi.

⁷Tuiciin pan a suakta dingin Noah le a tapate, a zi le a tapate’ zite tawh gunkuangpi sungah lut uh hi.

⁸Ganhingte, asiang le anin, vasate le leitunga a bokvak ganhing khempeuh,

⁹anu le apa a kopkopin Noah kiangah va pai uh a, Pasian in Noah a thupiak bangin gunkuangpi sungah a lut uh hi.

¹⁰Ni sagih khit ciangin leitungah tuiciin tung hi.

¹¹Noah khan a kum zagukna kum, a kha nihna a ni sawm le sagihna ni - tua ni-in a thuk mahmah mun-a tuinakte puakkham a, vante a tuiciin kongpite kihong hi.

¹²Tua ciangin leitungah sun sawmli le zan sawmli guah zu hi.

¹³Tua ni mahmah in Noah le a tapate Shem, Ham le Japheth, a zi le a tapate’ zite tawh gunkuangpi sungah lut uh hi.

¹⁴Amaute in gamsate amau nam ciat, innsate amau nam tawh kizui-in, leitunga a bokvak ganhingte amau nam ciat tawh kizui, vasa khempeuh amau nam ciat tawh kizui-in, kha nei khempeuh a lutpih uh hi.

¹⁵Amau sunga nuntakna huih a dik ganhing peuhmah a kopkopin Noah kiangah pai uh a, gunkuangpi sungah lut uh hi.

¹⁶Pasian in Noah a thupiak bangin a sunga lut nuntakna a nei ganhing peuhmah anu le apa ahi hi. Tua khit ciangin TOPA in amah a khakkhum hi.

¹⁷Ni sawmli sung leitung ah tui khangkhang a,a khanna zui-in tui in gunkuangpi lei tungah laamto hi.

¹⁸Leitungah tui khangin nak tam mahmah a, gunkuangpi tui tungah a laam hi.

¹⁹Leitung sangpi-ah khangto a vante nuai-a mualsangte khempeuh tuamcip hi.

²⁰Tui khanga mualsangte tungah pi sawmnih i[39] j[40] sanga thukzaw a sang to hi.

²¹Leitunga a gamta a nungta ganhingte khempeuh - vasate, innsate, gamsate, leitunga a hon om ganhingte khempeuh le mihing khempeuh kisia khin hi.

²²Leikeu tunga om a nakvang pana nuntakna huih a dik peuhmah si hi.

²³Lei maitanga om a nungta peuhmah kiphiatkhia hi; mihingte ahi a ganhingte ahi a leitunga a bokvak ganhingte le huihlak vasate ahi zongin lei panin a kiphiatsiang hi. Noah le gunkuangpi sunga amah tawh a omte bek suak ta hi.

²⁴Tui in lei, ni za le sawm nga sung a tuumcip hi.