Read Zokam Piancilna 8 Bible Online

Piancilna 8 - Zokam bible

Piancilna 8

¹Ahi hangin Pasian in Noah le amah tawh gunkuangpi sunga a omkhawm innsate le gamsate khempeuh phawk gige a, leitungah huih nungsakin tui kiam hi.

²Tu-in a thukna muna tuinakte le vante a tuiciin kongpite kikhak zo a, vantung panin guah a zu nawn kei hi.

³Leitungah damdamin tui kiam hi. Ni za le sawmnga a bei ciangin tui kiam manga,

⁴a kha sagihna a ni sawm le sagihna ni-in gunkuangpi Ararat-a mualte tungah a kinga hi.

⁵A kha sawmna dong tui kiamkiam a, a kha sawmna ni masa ni-in mual dawnte kimu thei hi.

⁶Ni sawmli khit ciangin Noah in gunkuangpi-a a bawlsa tawlet honga,

⁷va-ak khat a khah leh leitunga tui a keu mateng a tung kik zel hi.

⁸Tua ciangin amah in lei maitang pan tui a kiam siang ta hiam cih theih nadingin vakhu khat khah hi.

⁹Ahi hangin vakhu in leitung khempeuh ah tui om lai ahi manin a tuk nading mun a mu kei hi; tua ahi manin gunkuangpi sung Noah kiangah a ciah kik hi. A mah in a khut zankhia in vakhu la a gunkuangpi sung ama kiangah a omsak kik hi.

¹⁰Ni sagih ngak lai-a gunkuangpi pan vakhu khah leuleu hi.

¹¹Nitak-in vakhu a tun kik ciangin a tukkhiat thak olive teh khat a mukah tuah hi! Tua khit ciangin Noah in lei panin tui kiam ta hi, cih thei hi.

¹²Ni sagih mah ngak lai-a vakhu khahkhia kik hi. Ahi hangin tua pen ama kiangah a kileh nawn kei hi.

¹³Noah kum zaguk le khat a phak kum masa a kha masa, ani masa pen ni-in lei panin tui a keu siang hi. Tua ciangin Noah in gunkuangpi khuhna phelkhia a, lei maitang a keu lam mu hi.

¹⁴A kha nihna a ni sawm nih le sagihna ni-in leitung a keu siang sinsen hi.

¹⁵Tua ciangin Pasian in Noah tungah,

¹⁶"Nang le na zi le na tapate le a zite uh gunkuangpi panin paikhia un.

¹⁷No tawh a omkhawm a nungta ganhingte amau nam ciat - vasate, ganhingte le leitunga a bokvak ganhingte - leitungah amaute khangin cipha-a a pung nadingin paikhiasak in," a ci hi.

¹⁸Tua ahi ciangin Noah a tapate le a zi tawh a tapate’ zite tawh a paikhia khawm uh hi.

¹⁹Ganhing khempeuh, leitunga a bokvak ganhing khempeuh le vasate khempeuh - leitunga a gamtang namkim - nam khat khit nam khat gunkuangpi sung pan paikhia uh hi.

²⁰Tua khit ciangin Noah in TOPA adingin biakna-tau khat dawh a asiang ganhingte le asiang vasate pan pawlkhat la-in a tungah meihal biakna pia hi.

²¹TOPA in a gim namtui nam a, a lungsim sungah, "Mihingte a neutungin gitlohna lamah a awn kha a[41] zongin mihingte hangin leitung ka hamsiat kik nawn kei ding hi. Ka hihsa bangin nuntakna a nei khempeuh ka susia kik nawn kei ding hi.

²²"Leitung a kip laiteng khaici vawh hun le an lak hun, a vot le a sa, phalbi le khuakhal sun le zan a bei ngei kei ding hi," ci hi.