Read Zokam Piancilna 9 Bible Online

Piancilna 9 - Zokam bible

Piancilna 9

¹Tua ciangin Pasian in Noah le a tapate thupha pia in amaute tungah, "Cipha-in pung unla tampi pha-in leitung dim un.

²Leitung ganhing khempeuh, huihlak vasa khempeuh leitunga a bokvak ganhing peuhmah le tuipi ngasa khempeuh in note hong kihta in hong zahtak ding uh hi; note khut sungah tuate hong kipia hi.

³A nungta a gamtang na khempeuh na an ding uh ahi hi. Kung hingte note kong piak bang tektek in tu-in na khempeuh note kong pia hi.

⁴"Ahi hangin a nuntakna sisan, a sunga om laisiah a sa na ne peuhmah kei ding uh hi.

⁵Note nuntakna sisan tangin sisan mah ka kal teitei dinga, ganhingte khatpeuh tungah zong ka kal ding hi. Mikim tungah zong a mihing nuntakna mah ka kal ding hi.

⁶"Mihing sisan suah peuhmah, mi mah in amah sisan suah ding hi. Ahang in, Pasian lim sunin Pasian in mi a bawlsa ahi hi.

⁷Note na hi uh leh cipha unla pungin tampi pha un; leitungah kibehlapin pung un," ci hi.

⁸Tua ciangin Pasian in Noah le amah tawh a omkhawm a tapate tungah,

⁹"Tu-in note le note nunga na suan-le-khakte uh,

¹⁰le note tawh a omkhawm a nungta ganhing khempeuh - vasate, innsate le gamsate khempeuh gunkuangpi sung pana note tawh a paikhia - leitunga nuntakna a nei peuhmah, tawh ka thukhun ka bawl hi.

¹¹Note tawh thukhun ka bawl hi: Nuntakna nei khempeuh tuiciin tunna tawh ki beisak kik nawn lo ding hi; leitung susia dingin tuiciin a tung kik nawn kei ding hi," a ci hi.

¹²Tua ciangin Pasian in, "Hih in no le note tawh a om a nungta ganhingte khempeuh kikalah mailama khangte khempeuh adingin thukhun ka bawlna lim ahi hi:

¹³Ka sakhituihup meii lakah ka kaisak hi. Tua pen kei le leitung thuciamna lim hi ding hi.

¹⁴Leitungah meii ka kaisak a meii lakah sakhituihup a kilat peuhpeuh ciangin

¹⁵note le a nungta ganhing namte khempeuh le kei kikal-a ka thukhun ka phawk ding hi. Nuntakna khempeuh a susia dingin leitungah tuiciin a tung kik nawn kei ding hi.

¹⁶Meii lakah sakhituihup a kilat simin ka mu dinga Pasian le leitunga om a nungta ganhing nam khempeuh kikalah a kip tawntung thukhun ka phawk ding hi," ci hi.

¹⁷Pasian in Noah kiangah, "Hih in kei le leitunga nungta khempeuh kikala thukhun lim ahi hi," ci hi.

¹⁸Gunkuangpi sung pan a paikhia Noah’ tapate Shem, Ham le Japheth ahi hi. (Ham pen Canaan’ pa ahi hi.)

¹⁹Hihte Noah tapa thumte hi a, amaute panin leitung khempeuha kizel mite a piang ahi hi.

²⁰Lokhomipa Noah in lenggui huan khat bawl a[42] hi.

²¹Tua pana piang lenggahzu a dawn ciangin khama, a buk sungah puansilh loin a lum hi.

²²Canaan’ pa Ham in a pa guaktang-a om mu-a a pua-a om a sanggam nihte kiangah ko hi.

²³Ahi hangin Shem le Japheth in puan khat la in a liangko uah bang uh a, nung-le-pai in a pa uh guaktanga om a khuh uh hi. A pa uh guaktangna a muh loh nadingun a lehngat uh hi.

²⁴Noah a lenggahzu kham na pan a tei ciangin a tapa tum pen in ama tunga a bawlna a theih ciangin

²⁵amah in, "Canaan in hamsiatna thuak ta hen! A sanggamte adingin sila niam pen hi ta hen," ci hi.

²⁶Amah in, TOPA, Shem’ Pasian in thupha ngah ta hen! Shem’ sila in Canaan omsak ta hen. b[43]

²⁷Pasian in Japheth c[44] gam khangsak hen; Shem’ bukte sungah Japheth tengsak henla, ama d[45] sila-in Canaan omsak hen," zong ci hi.

²⁸Tuiciin tun nung, Noah kum 350 nungta lai hi.

²⁹Noah a nuntak sung khempeuh kum 950 hi a, tua khit ciangin a si hi.