Read Zokam 2 Samuel 1 Bible Online

2 Samuel 1 - Zokam bible

2 Samuel 1

¹Saul sih khitin Amalek-te a zawhna pan David ciah kik-a, Ziklag ah ni nih a tam hi.

²A ni thum ni-in Saul giahphual panin mi khat tunga a puan kikekin a lutungah leivui a baang hi. David kiang a tun ciangin a zahtakna-in lei-ah a puksuk hi.

³David in, "Koi pana hong paikhia na hi hiam?" ci-in a dong hi. Amah in "Israel-te giahphual pana suakta ka hi hi," ci-in a dawng hi.

⁴David in, "Bang piang hiam? Hong gen dih in," ci-in a dong hi. Amah in, "Giahphual panin mite tai uh hi. Amaute tampitak si uh hi. Saul le a tapa Jonathan zong si hi," a ci hi.

⁵Tua ciangin amah thu a zasak tangvalpa kiangah, "Saul le a tapa Jonathan sihna bangci theih na hi hiam?" a ci hi.

⁶Tangvalpa in, "Kei Gilboa Vum ah ka na om kha a, tua lai ah Saul a teipi tungah a kingam hi. Sakol-lengte le a tunga tuangte inlah neh mahmah ta uh hi.

⁷Amah hong kihei-a kei hong muh ciangin hong sama, "Bang kong hihsak dia?" ka ci hi.

⁸Amah in, "Kua na hiam?" hong ci hi. "‘Amalek-te khat ka hi hi,’ ci-in ka dawng hi.

⁹"Tua ciangin kei kiangah, ‘Ka tungah dingin hong that mai ve! Sihna khopin liam napi, ka naanglai hi,’ hong ci hi.

¹⁰"Tua ciangin a tungah dingin ka that hi, bang hang hiam cih leh a tuk khit ciangin nungta zo nawn lo ding cih ka thei hi. Tuateh a lutunga a kumpi lukhu le a bana banbulh ka la-a, tuate hih lai-ah ka topa kong puak hi," a ci hi.

¹¹Tua ciangin David le amah tawh a omkhawmte khempeuh in a puan uh manin a balkek uh hi.

¹²Amaute Saul le a tapa Jonathan, le TOPA galkapte le Israel innkuante adingin thumin kap uh a, nitak dong an a tang uh hi, bang hang hiam cih leh amaute namsau in a puk khin uh hi.

¹³David in thupuak tangvalpa kiangah, "Nang koi pan na hiam?" a ci hi. "Kei Amalek-te pemta khat tapa ka hi hi," ci-in a dawng hi.

¹⁴David in, "Bang hangin TOPA sathau nilhsa khat siasak dingin na khut liik na hiam, lau lo na hi hiam?" ci-in a dong hi.

¹⁵Tua ciangin David in a mite khat sama, "Pai-in amah sattuk in!" a ci hi. Tua ciangin amah in tuapa sattuk-a a si hi.

¹⁶Ahang in, David in tuapa kiangah, "Nangma sisan nang lutungah a tu hi. Nangma kamin, ‘TOPA ’ sathau nilhpa ka that hi,’ na cih ciangin nangma kam in nang langah teci a pang hi," a ci hi.

¹⁷Saul le a tapa Jonathan tawh kisai-in David tamlo a,

¹⁸Judah mite in (Jashar Laibu sunga kigelh) hih thal tamlawhna a kihilh dingun thu a pia hi:

¹⁹"Israel aw, na minthanna na munsangte tungah kithat tah. A thahatte bangci puk a hia!

²⁰"Gath ah gen loin Ashkelon kongzingte ah zong tangko kei in, tua ahi kei leh Philistia tanute nuam kha ding uh a, vun-at loh tanute lungdam kha ding uh hi.

²¹"Gilboa mualliante aw, no tungah guah le daitui kia loin lote in zong biakna-a dingin an gah kei hen. Ahang in, tua lai-ah a thahatte lum nin ta a, Saul’ lum lah sathau a kizut nawn kei hi.

²²A kithatte sisan pan le a thahatte satak panin, Jonathan’ thal guak kik ngei lo-a, Saul namsau guaksuak ngei lo hi.

²³"Saul le Jonathan a hin lai-un ki-it in ngaihhuai uh a, a sih hunun a kikhen kei uh hi. Muvanlaite sangin manlangzaw uh a, humpinelkaite sangin thahatzaw uh hi.

²⁴"Israel tanute aw, note puan sannel dikdek hong silhsakpa, na puansilhte uh khama hong zepsakpa Saul kah un.

²⁵"Bangci a, thahatpa galphualah tuk tazen hiam! Note bosang tungah Jonathan kithatin lum hi.

²⁶Ka sanggampa Jonathan aw, nang hangin ka dah hi; nang kong it mahmah hi. Kei nong itna lamdanga, numeite itna sangin lamdang zaw hi.

²⁷"A thahatte bangci-a tuk mawk a! Galsimna galvante mangthang tah ei!" a ci hi.