Read Zokam 2 Samuel 11 Bible Online

2 Samuel 11 - Zokam bible

2 Samuel 11

¹Kumpite galsim dingin a kuan hun phalbi sungin David in kumpipa mite tawh Joab le Israel galkap buppi a kuankhiasak hi. Amaute in Ammon-te susia uh a Rabbah a umcih uh hi. David ahileh Jerusalem ah a om hi.

²Nitak khat David a lupna panin tho a, kumpi inn tungah a vak kawikawi hi. Inn tung panin numei kipumsil khat a mu hi. Tua numei melhoih mahmah a,

³David in tuanu kan dingin mi khat a sawl hi. Mipa in, "Eliam’ tanu Bathsheba hi-in, Hit mi Uriah zi hi lo hiam?" a ci hi.

⁴Tua ciangin David in kamtaite sawlin tuanu a samsak hi. Tuanu a kiangah pai-a amah in a luppih hi. (Tuanu a nitna a kihahsiang khin phet ahi hi) Tua ciangin c[30] tuanu innah a ciah hi.

⁵Numei gai-a David kiangah, "Nau ka paii hi," ci-in a gensak hi.

⁶Tua ciangin David in Joab kiangah, "Hit mi Uriah hong ciahsak in," ci-in a vaikhak hi. Tuateh Joab in amah David kiangah a puak hi.

⁷Uriah a kiangah a tun ciangin David in Joab bangci a, galkapte bangci a, galvai bangci hiam, ci-in a dong hi.

⁸Tua khit ciangin David in Uriah kiangah, "Na innah ciahsuk inla na khete sil in," a ci hi. Tua ciangin kumpi inn panin Uriah paikhia-a, kumpipa letsong a nungah kipuak hi.

⁹Ahi hangin Uriah inn ah ciah loin a pu’ nasemte khempeuh tawh kumpi inn kongah a lum hi.

¹⁰David kiangah, "Uriah innah a ciah kei hi," ci-a a kigen ciangin amah in, "Khual gamla pana hong tungphet hi lo na hiam? Bang dingin innah ciah lo na hiam?" ci-in a dong hi.

¹¹Uriah in David kiangah, "Singkuangpi le Israel le Judah-te puanbuk sungah om uh a, ka pu Joab le ka topa nasemte lopaang ah ka giak uh hi. Bangci in a ne a dawn ding le ka zi tawh a lum dingin ka innah ciah thei ding ka hiam? Nang nuntakna ka lo hi, tua bangin ka hih kei ding hi," a ci hi.

¹²Tua ciangin David in, "Ni khat om lai in, zing ciangin kong puak kik ding hi," a ci hi. Tua ahi ciangin Jerusalem ah Uriah tua ni le a zing ciang a tam lai hi.

¹³David in amah sama amah tawh nekhawm dawn khawmin zu a khamsak hi. Ahi hangin a nitak ciangin a pu’ nasemte lakah phek tungah lum dingin paikhia a, inn ah a ciah tuan kei hi.

¹⁴A zingsang ciangin David in Joab lai khak a Uriah a puasak hi.

¹⁵A sungah, "Kidona a nasia pen mun gal mai-ah Uriah na masisak in. Tua ciangin amah kisattuka a sih nadingin amah guak nungkinsan un," ci-in a gelh hi.

¹⁶Tua ciangin Joab in khuapi a umcih laitakun a khauh pen kinanna mun hi-a a theihna munah Uriah a koih hi.

¹⁷Khuapi mite kuankhia in Joab a do uh ciangin David galkapte pawlkhat a tuk uh hi; tua tham loin Hit mipa Uriah zong a si hi.

¹⁸Joab in David kiangah gal kidona thu a cingin a puak hi.

¹⁹Amah in kamtaipa kiangah: "Kumpipa kiangah hih gal kidona thu na gen khit ciangin,

²⁰kumpipa a heh suak kha dinga nang kiangah, ‘Bang dinga galsim dingin khuapi va neh lua na hi uh hiam? Kulh panin thaltang hong lot ding uh thei lo na hi uh hiam?

²¹Jerub-Besheth’ a[31] tapa Abimelech kua thah hiam? Amah a sih nadingin Thebez a kulh dawn pan numei khat in angawina suang tungnung khiat hi lo ahi hiam? Bang dinga tua zahta a kulh neh lua na hi uh hiam?’ hong cih leh ama kiangah, ‘Na nasempa Hit mi Uriah zong si hi,’ ci in," ci-in a hilh hi.

²²Kamtaipa kuankhia-a David kiang a tun ciangin Joab in a gen dinga a vaikhak khempeuh a gen hi.

²³Kamtaipa in David kiangah, "Mite in ko hong zothawh uh a, ko sim dingin gam sungah hong kuankhia uh hi; ahi hangin khuapi lutna kongpi ah ko ka nawh kik zo uh hi.

²⁴Tua ciangin thalkapte in kulh panin thaltang hong kap uh a, kumpipa mi pawlkhat a si hi. Tua tham loin na nasempa Hit mi Uriah zong a si hi," a ci hi.

²⁵David in kamtaipa kiangah, "Joab tungah, ‘Hih thu ah kilung-khamsak kei in; namsau-in khat le a dang khat mah a si ngei ahi hi. Khuapi nak sim mahmah unla susia un,’ ci-in Joab hanthawnna-in hih thu na gen in," ci-in a gen hi.

²⁶Uriah zi in a pasal sih a zak ciangin ama hangin a thum hi.

²⁷Thumna hun a bei khit ciangin David in a innah tuanu lasak-a, ama zi suakin tapa khat a nei hi. Ahi hangin David gamtatna hangin TOPA a lungkim kei hi.