Read Zokam 2 Samuel 13 Bible Online

2 Samuel 13 - Zokam bible

2 Samuel 13

¹Hih hun khit ciangin David’ tapa Amnon in a melhoih Absalom sanggamnu Tamar a ngai hi.

²Tamar nungak bit hi-a, ama tungah bang khatpeuh hih ding piang thei lo ahi manin a sanggamnu tungah a lawhsapna hangin Amnon in a cinat lawh hi.

³Amnon in David sanggampa Shemeah’ tapa Jonadab min nei lawm khat a nei hi. Jonadab mi lungsim khel mahmah khat ahi hi.

⁴Amah in Amnon kiangah, "Bang hangin nang kumpipa’ tapa, zingsang khat khit zingsang khat gawng tektek na hi hiam? Hong gen lo ding na hi hiam?" ci-in a dong hi. Amnon in, "Ka sanggampa Absalom sanggamnu ngai ka hi hi," a ci hi.

⁵Jonadab in, "Lupna ah pai inla a cina kineihin na pa in hong veh ciangin, ‘Ka sanggamnu Tamar hong pai-in nek ding khatpeuh hong pia hen. A sep mahmah mu in a khuttung ka nek theih nadingin an hong huansak hen,’ ci in," a ci hi.

⁶Tua ciangin Amnon luma cina a kineih hi. Kumpipa in amah a veh ciangin Amnon in, "Ka sanggamnu khuttunga ka nek theih nadingin ka sanggamnu hong pai-in ka muhin anlum a tuam mahmah in hong bawlsak hen," a ci hi.

⁷David in kumpi inn sunga Tamar kiangah thu zasak a, "Na sanggampa Amnon innah pai inla an pawlkhat huansak in," a ci hi.

⁸Tua ciangin a sanggampa Amnon inn ah Tamar pai-a, amah a na lum hi. Tuanu in annel lom la-in, meka ama muhin anlum bawlin a em hi.

⁹Tua ciangin a sikbelpei la-in anlum a lui hangin a ne nuam kei hi. "Amnon in, "Hih lai-a om khempeuh pusuaksak in," a ci hi. Tua ciangin mi khempeuh a pusuak uh hi.

¹⁰Tua ciangin Amnon in Tamar kiangah, "Na khut tungpan ka nek theih nadingin ka lupna inndei sungah an hong puak in," a ci hi. Tuateh Tamar in a bawlsa anlum, a sanggampa Amnon lupna inndei sungah a puak hi.

¹¹Ahi hangin a nek dingin inndei sungah a paipih ciangin mancip-a, "Ka sanggamnu aw, hong pai-in hong luppih in," a ci hi.

¹²Tuanu in, "Hong tuacih ke’n, hong thatang kaih kei in. Israel sungah tua bangin kigamta lo ding hi! Hih bangin gitloh gamtat kei in.

¹³Kei bang suak ding ka hi hiam? Ka maizumna koi-ah sel ding ka hi hiam? Nang a bangci thu na hiam? Israel migilo a haikhat na bang ding hi. Nong hehpihna-in kumpipa kiangah gen in, nong tenpih ding hong kham lo ding hi," a ci hi.

¹⁴Ahi hangin a thu ngai lo a tuanu sangin amah hatzaw ahi manin a buangawp hi.

¹⁵Tua khit ciangin Amnon in thakhatin amah a mudah mahmah hi. A taktakin a itnasa sangin a mudah zaw hi. Amnon in tuanu kiangah, "Tho inla paikhia in!" a ci hi.

¹⁶Tuanu in, "Hi kei! Kei nong sawlkhiatna, tu-a kei tungah na bawlsa khialhna sangin a lianzaw hi," a ci hi. Ahi hangin amah in tuanu thu a ngai nuam kei hi.

¹⁷Ama nasem neih tuampa sam-a, "Hih numei hih mun pan nawhkhia unla a nungah kong kalh un," a ci hi.

¹⁸Tua ciangin a nasempa in koihkhia-a a nungah kong a kalh hi. Tuanu in puantualpi a manpha mahmah a kizem e[37] a silh hi, ahang in kumpipa tanute nungak bit lai peuhmah in tua bang puan nam a silh ahi hi.

¹⁹Tamar in a lutungah vut khu a, a silh lai a kizem puantualpi f[38] a balkek hi. A lutungah a khut khu a nakpipi-in kap kawmin a paikhia hi.

²⁰A sanggampa Absalom in tuanu kiangah, "Tua na sanggampa Amnon nang tawh om ahi hiam? Ka sanggamnu aw, dai in; amah na sanggampa ahi hi. Lungsim in zong nei se dah lel in," a ci hi. Tuateh amah a sanggampa Absalom innah ciah a numei khatguak lungsipi in a om hi.

²¹Hih thu teng kumpipa David in a zak ciangin a heh mahmah hi.

²²A sanggamnu Tamar Amnon in maimawlsak ahi manin Absalom in amah mudaha, asia apha kam khat beek a genpih kei hi.

²³Kum nih khit ciangin Ephraim gamgi kianga Baal Hazor ah Absalom’ tuumul mette om uh a amah in kumpipa’ tapa khempeuh tua lai-ah a pai dingun a sam hi.

²⁴Kumpipa kiangah Absalom pai-a, "Na nasempa in gan-mulmette ka khawm khin hi. Nong hehpihna-in kumpipa le a uliante nong kihel zo ding uh hiam?" a ci hi.

²⁵Kumpipa in, "Hi lo hi, ka tapa aw, ka vekun kong pai kei ding uh hi; nang adingin vangik lel hi," ci-in a dawng hi. Absalom in a kut hangin nial teitei a, ahi hangin thupha a pia hi.

²⁶Tua ciangin Absalom in, "Nong pai kei ding leh nong hehpihna in ka sanggampa Amnon ko tawh hong paisak in," a ci hi. Kumpipa in, "Bang hangin no tawh hong pai ding hiam?" ci-in a dong hi.

²⁷Ahi hangin Absalom in kun tentan a, tua ciangin a om lai kumpipa’ tapate le Amnon a paisak hi.

²⁸Absalom in a mite kiangah, "Ngai un! Amnon in zu a kham mahmah ciangin, ‘Amnon satlum un,’ kong cih ciangin that un. Lau kei un. Thu hong pia khin hi lo ka hi hiam? Kihatsakin kihangsak un," ci-in thu a pia hi.

²⁹Tua ciangin Absalom mite in Absalom thupiak bangin Amnon tungah a hih uh hi. Tua ciangin kumpipa’ tapate khempeuh diangkhia uh a, laasakol ah tuangin a tai uh hi.

³⁰Amaute lamkalah a om laitakun David tungah thu kizasak a; "Absalom in kumpipa’ tapate khat zong sit loin satlum khin hi," a kici hi.

³¹Kumpipa dingto-in a puansilhte balkeka, leitual ah a lum hi; a nasemte khempeuh puan balkeksa in a kiangah a ding uh hi.

³²Ahi hangin David sanggampa Shimeah’ tapa Jonadab in, "Ka topa in kumpipa tapa khempeuh kithat khin dingin ngaihsun kei in; Amnon bek si hi. Hih in Amnon in a sanggamnu Tamar a buansaka kipan Absalom in a sawm den ahi hi.

³³Kumpipa’ tapa khempeuh si khin a hong kiko pen thusim kei in. Amnon bek si hi," a ci hi.

³⁴Tua hun laitakin Absalom a taimang hi. Tua laitakin galvilpa a khuadak toh leh ama omna pan nitumna-lam mualpang panin mitampi paisuk a mu hi. Tua galvilpa pai-in kumpipa kiangah, "Haronaim lam mualpang ah mi ka mu hi," a[39] a ci hi.

³⁵Jonadab in kumpipa kiangah, "En in, kumpipa’ tapate hiah om hi; na nasempa gen bang tektek ahi hi," a ci hi.

³⁶A gen khit phetin nakpitaka kap kawmin kumpipa’ tapate a lut uh hi. Kumpipa zong kap-a a nasemte khempeuh kah cihtakin a kap uh hi.

³⁷Absalom tai a, Geshur kumpipa Ammihud’ tapa Talmai kiang a tung hi. Ahi hangin Kumpipa David a tapa hangin nisimin a thum hi.

³⁸Absalom a tai khit ciangin Geshur ah pai-a, tua lai-ah kum thum a om hi.

³⁹Amnon sihna hangin kumpipa b[40] ngaihngil ta-a a lungsimin Absalom kiangah a hawh nuam hi.