Read Zokam 2 Samuel 15 Bible Online

2 Samuel 15 - Zokam bible

2 Samuel 15

¹Hih hun khit ciangin Absalom in a mai-a tai ding sakolleng khat le sakolte le mi sawmnga a kithawisak hi.

²Amah thobaih a khuapi kongpi zuatna lampi gei-ah a ding hi. Kumpipa mai-ah thukhensak ding lungkimlohna a nei mi pai khatpeuh a om ciangin Absalom in sama, "Nang koi khua pan na hiam?" ci a, amah in, "Na nasempa Israel beh khat pan ka hi hi," ci-in a dawng hi.

³En in, na thuneih dikin kician sinsen hi, ahi hangin na thu hong sit dingin kumpipa in mi a koih kei hi," a ci hi.

⁴Tuateh Absalom in, "Gam sungah kei thukhenin hong kiseh le maw! Lungkimlohna a nei ahikeh thu nei peuhmah hong pai dinga thutangin a thu ka khensak ding hi," a cih beh hi.

⁵Mi khatpeuh in ama lam manawh in a mai-ah a kunsuk leh Absalom in a khutin zama, amah lenin a nam hi.

⁶Absalom in kumpipa tunga thutang dong dinga pai Israel-te khempeuh tungah hici bangin bawla, hih bangin Israel mite lungsim a gukhia hi.

⁷Kum li b[43] a cin ciangin Absalom in kumpipa kiangah, "Hebron ah hong paisak inla, TOPA tunga ka kiciamna hong tangtunsak in.

⁸Aram a Geshur ah na nasempa ka ten lai-in: "TOPA in kei Jerusalem ah hong puak kik leh Hebron c[44] ah TOPA ka bia ding hi," ci-in ka kiciam hi." a ci hi.

⁹Kumpipa in, "Lungnuamin pai in," ci hi. Tua ciangin Hebron ah a pai hi.

¹⁰Tua ciangin Absalom in Israel behte sung khempeuh ah kamtai sawlsim a, "Pengkul ging na zak phetun, ‘Hebron ah Absalom kumpi ahi hi,’ ci un," a cisak hi.

¹¹Jerusalem panin Absalom in mi zanih a tonpih hi. Amaute mawhpeng hi-in lengla bang lel-a kisam hi a, bangmah thu a thei kei uh hi.

¹²Absalom in biakna a piak laitakin David thu kuppihpa Gilon-te Ahithophel zong ama gam khuapi Giloh pan a pai nadingin a vaikhak hi. Tua bangin sawmsimna thahatin Absalom nungzui a khang semsem hi.

¹³David kiangah kamtai khat pai a, "Israel mite lungsim Absalom in zo khin hi," ci-in a gen hi.

¹⁴Tua ciangin David in Jerusalem a, a ompih a ulian khempeuh tungah, "Hong pai un! I tai kei leh Absalom in eite khat beek hong suaktasak lo ding hi. Thakhatin i nusiat pak kei leh manlangin hong kuan dinga eite hong zoin hong siasak ding uh a, namsau-in khuapi a vat ding uh hi," a ci hi.

¹⁵Kumpipa’ uliante in, "Ka topa uh kumpipa in a tel peuhpeuh a sem dingin na nasemte kithawisa-in ka om uh hi," ci-in a dawng uh hi.

¹⁶Kumpipa paikhia-a, a innkuanpih khempeuh in amah a zui uh hi; ahi hangin amah in a kumpi inn kem dingin a zinote sawm a nusia hi.

¹⁷Tuaci-in kumpipa paikhia-in, a mite khempeuh in zui uh a, a gamla simsim mun khatah a khawl uh hi.

¹⁸A mite khempeuh in amah makhelh uh a, Kereth-te khempeuh, Peleth-te khempeuh le Gath pana a tonpih mi zagukte a vekun kumpipa mai-ah a pai uh hi.

¹⁹Kumpipa in Gath mi Ittai kiangah, "Bang dia ko hong zui na hi hiam? Ciah kik inla Kumpi Absalom tawh om in. Nang gamdang mi na hi a, na gam pana hong kihawlkhia ahi hi.

²⁰Zana hong tung pan bek na hi hi. Tua hi a, ka pai nading mun ka theih lohna ah tuni in nang hong kawivakpih ding ka hi hiam? Ciah kik inla na khuapih mite tonpih in. Migitna le muanhuaina no tawh om ta hen," a ci hi.

²¹Ahi hangin Ittai in kumpipa kiangah, "TOPA nuntakna le ka topa kumpipa nuntakna lo in ka gen hi, sih nading ahi-a hin nading ahi zongin ka topa kumpipa omna peuhpeuh ah na nasempa ka om ding hi," ci-in a dawng hi.

²²David in Ittai kiangah, "Pai ou leh," a ci hi. Tua ciangin Gath mi Ittai a mite khempeuh le ama tonpih a innkuanpihte in a zuisuak uh hi.

²³Tua mite khempeuh nawkna khuaneu-a mite khempeuh a kapkhia uh hi. Kumpipa in zong Kidron Kuam kantana mite khempeuh in sehnel-gam lam a manawh uh hi.

²⁴Zadok zong tua lai-ah kihel a, ama ompih Levi-te khempeuh in Pasian thukhun singkuangpi a pua uh hi. Amaute in Pasian singkuangpi nga uh a, mite khempeuh khuapi pan a pusuah khit matengun Abiathar in biakna a[45] a pia hi.

²⁵Tua ciangin kumpipa in Zadok kiangah, "Pasian singkuangpi khuapi sungah puak kik un. TOPA maipha ka muh leh kei hong puak kik dinga, tuateh a tenna mun hong musak kik ding hi.

²⁶Ahi hangin amah in, ‘Nang tungah ka lungkim kei hi,’ a cih leh kei a kigingsa ka hi hi; kei tungah hoih a sak bangbang hong hih ta hen," a ci hi.

²⁷Kumpipa in siampi Zadok kiangah zong, "Thumukhol khat hi lo na hi hiam? Na tapa Ahimaaz le Abiathar’ tapa Jonathan tawh lungnuamtakin khuapi ah ciah kik un. Nang le Abiathar in na tapate gel uh tonpih un.

²⁸Sehnel-gam sunga ngahmun ah no hong zaksakna ka zak mateng ka na ngak ding hi," a ci hi.

²⁹Tua ciangin Zadok le Abiathar in Jerusalem ah Pasian singkuangpi pua kik uh a tua lai-ah a om uh hi.

³⁰David ahileh Olive Vum ah paito lai-a, a pai kawmin a kap hi; a lu khuha a khe guakin a pai hi. Ama tonpihte khempeuh in zong a lu uh khuh uh a, a paitoh kawmun a kap uh hi.

³¹Tua hunin David kiangah, "A lehdo mite lakah Absalom tawh Ahithophel kipawl hi," ci-in a kigen hi. Tua ciangin David in thu ngen a, "TOPA aw, Ahithophel kuppihnate haina suaksak in," a ci hi.

³²Mite in Pasian biakna muna a zat uh mualdawn ah David a tun ciangin amah tawh kimu dingin Ark mi Hushai na om-a a puantual kibalkekin a lutungah leivui a khu hi.

³³David in ama kiangah, "Kei nong zuih leh nong gimsak ding hi.

³⁴Ahi hangin khuapi ah kileh kik inla Absalom kiangah, ‘Kumpipa aw, na nasem kong suak ding hi; a beisa hunin na pa’ nasem ka hi hi; tu-in nang nasem kong suak ding hi,’ va ci lecin Ahithophel ngaih-sutpihna lawhsamsakin kei nong huh thei ding hi.

³⁵Siampite Zadok le Abiathar tua lai-ah nang tawh om ding hi lo ahi hiam? Kumpi inn sunga na zak khempeuh amau ko in.

³⁶Amau tapa nihte, Zadok’ tapa Ahimaaz le Abiathar’ tapa Jonathan-te amau tawh tua lai-ah a omkhawm uh hi. Zak khatpeuh na neih uh ciangin kei kiangah hong sawl un," a ci hi.

³⁷Tua ciangin khuapi ah Absalom a lut laitakin Jerusalem ah David lawmpa Hushai a tung hi.