Read Zokam 2 Samuel 18 Bible Online

2 Samuel 18 - Zokam bible

2 Samuel 18

¹David in ama ompih a mite kikhawmsak-a a tultul-a uk le a zaza-a ukte a seh hi.

²David in galkapte kuankhiasak-a - sehthum-ah khat Joab uksakin sehthum-ah khat Zeruiah’ tapa Joab sanggampa Abishai uksak-a, a thumna Gath-te Ittai a uksak hi. Kumpipa in galkapte kiangah, "Kei mahmah no tawh kong kuankhawm kul ding hi," ci-in a gen hi.

³Ahi hangin mite in, "Na kuan peuhmah kei ding hi; kote hong kidelh kek leh kote hong ki-awlmawh lo ding hi. Kote a lang nangawn ka si uh zongin hong awlmawh lo ding uh hi; ahi hangin kote f[56] tul sawm val man na hi hi. Khuapi panin kote huhna hong puak lecin hoihzaw ding hi," a ci uh hi.

⁴Kumpipa in, "Note hoihsak penpenin ka gamta ding hi," ci-in a dawng hi. Tua ahi ciangin mite khempeuh a tultul le a zaza ukin a kuankhiat laitakun kongpi gei-ah kumpipa a ding hi.

⁵Kumpipa in Joab, Abishai le Ittai-te kiangah, "Kei nong khualna un tangvalpa Absalom hong dopsak un," ci-in thu a pia hi. Kumpipa in Absalom tawh kisai galkap ukte tung ciat-a a thupiak, galkapte khempeuh in a za uh hi.

⁶Israel sim dingin galkapte lopaang ah kuankhia uh a, Ephraim tulak ah gal a kido hi.

⁷Tua lai-ah David mite in Israel galkapte zo uh a, tua ni-in a si tam lua mahmah in - mi tul sawmnih a si hi.

⁸Mualtung khuaneu buppi ah kidona kizel a, tua ni-a namsau a si sangin tulak in nuntakna tam a susiazaw hi.

⁹Tu-in Absalom le David mite a kituak kha uh hi. Amah a laa tungah tuanga, tawsaw hiangzau mahmah nuai-ah a laa a pai laitakin sing kawmah Absalom lu a awk hi. A tuanna laa paisuak a, amah huih lakah kikhai-in a nusia hi.

¹⁰A hici a om tua mite khatin a muh ciangin Joab kiangah, "Tawsaw kung khatah Absalom kikhai ka mu hi," a ci hi.

¹¹Tua a gen mipa tungah Joab in, "Bang e! Amah mu ing e? Bang dia tua mun mahah lei lakah satkhia pah lo na hia? Tua cih lecin ngun shekel g[57] sawm le galhang kawnggak hong pia ngel ding hi veng in," a ci hi.

¹²Ahi hangin mipa in, "Shekel h[58] tul khat nangawn kiteh khia-in hong kipia leh zong, kumpipa’ tapa thah nadingin ka khut ka liik kei ding hi. Kote zakin kumpipa in nang le Abishai le Ittai-te kiangah, "Kei nong khualna-un tangvalpa Absalom hong hu un," i[59] ci-in thu hong pia hi.

¹³Kei nuntakna a lauhuai-in om kha leh - kumpipa in lah zak loh nei lo a - nang lah kei kiang pan na kikangkoih tuak hi," a[60] ci-in a dawng hi.

¹⁴Joab in, "Hih bangin nang hong ngak man nawn kei ning," a ci hi. Tua ciangin teikhawh thum la a, tawi-in tawsaw kawmah a hing lai-a om Absalom lungtang ah tuate in a sun hi.

¹⁵Tuateh Joab’ galhiam tawi mi sawm in Absalom umcih uh a satin a that uh hi.

¹⁶Tua ciangin Joab in pengkul muta, Joab in khawlsak ahi manin galkapte in Israel a delh nawn kei uh hi.

¹⁷Amaute in Absalom lakhia uh a tulaka dumpi khatah lawnin a tungah suangtum tampitak a ciannelh uh hi. Tua khit phetin Israel-te khempeuh amau inn ciatah a tai uh hi.

¹⁸Absalom in, "Kei min ban zom ding tapa ka nei kei hi," ci-in ngaihsun ahi manin a nuntak lai-in khuampi khat la-a, a mual dingin Kumpipa Kuam sungah a phut hi. Amah in tua khuampi ama min puasak a, tuni dongin Absalom Mual kici hi.

¹⁹Tua ciangin Zadok’ tapa Ahimaaz in, "Kei va tai-in TOPA in a galte khut panin kumpipa a hutkhiatna thuthak ka va ko ding hi," a ci hi.

²⁰Joab in, "Tuni-a thuthak ko ding nang hi kei teh; kumpipa’ tapa si ahi manin a hun dang teh ko in," ci-in a gen hi.

²¹Tua ciangin Joab in Cush-mipa kiangah, "Pai inla na muhsa teng kumpipa va ko in," a ci hi. Joab mai-ah Cush mipa kuna a taikhia pah hi.

²²Zadok’ tapa Ahimaaz in Joab kiangah, "Bangbang hi ta leh Cush mipa nungah kei zong hong taisak in," a ci kik hi. Ahi hangin Joab in, "Ka tapa aw, bang pai nopna na hi hiam, thuthak hilh man pahtakman na ngah kei ding hi," ci-in a dawng hi.

²³Tuapa in, "Bangbang hita leh tai nuam ing," a ci hi. Tua ciangin Joab in, "Tai ou leh!" a ci hi. Tuateh zanglei b[61] lam tawnin Ahimaaz tai a Cush mipa a makhelh hi.

²⁴Kongpi sungnung le a puanung kikalah David a tut laitakin kulh kongpi khum zangah galvilpa a kahto hi. Amah khuadak a mi khat hong tai a mu hi.

²⁵Galvilpa in kumpipa samin a gen hi. Kumpipa in, "Amah kia ahileh thu hoih hi ding hi," a ci hi. Mipa a nai tektek hi.

²⁶Tua ciangin galvilpa in mi tai dang khat mu-a a nuai-a kongpi cingpa samsukin, "En dih in, midang khat kia hong tai leuleu!" ci-in a ko hi. Kumpipa in, "Amah’n zong thu hoih mah hong puak pelmawh ding hi," a ci hi.

²⁷Galvilpa in, "A masa pen Zadok’ tapa Ahimaaz tai tawh kisun sa ing," a ci hi. Kumpipa in amah mi hoih hi; amah’n thu hoih hong tun ding hi," a ci hi.

²⁸Tua ciangin Ahimaaz in a mai leilam ngatin kumpipa mai-ah kunsuk-a, "Hoih khin hi, TOPA na Pasian kiphat ta hen! Ka topa kumpipa langkhata khut liikte panin hong hukhia ta hi," a ci hi.

²⁹Kumpipa in tangvalpa Absalom a suakta hiam?" ci-in a dong hi. Ahimaaz in, "Joab in kumpipa nasempa kei hong sawl laitakin buaina lianpi khat ka mu a, na nasempa in bang hiam cih ka thei kei hi," ci-in a dawng hi.

³⁰Kumpipa in, "Pam ah ding inla na ngak in," a ci hi. Tua ciangin amah pai-in a pamah a ding hi.

³¹Tua khit ciangin Cush mipa tunga, "Ka topa kumpipa aw, thu hoih na za in! Na langa ding khempeuh panin tuni-in TOPA in nang hong hu ta hi," a ci hi.

³²Kumpipa in Cush mipa kiangah, "Tangvalpa Absalom a suakta hia?" ci-in a dong hi. Cush mipa in, "Ka topa kumpipa galte le nang hong nasak nuam-a dingte khempeuh tua tangvalpa tawh kibang ta uh hen," ci-in a dawng hi.

³³Kumpipa a kigaih hi. Amah kongpi tunga inndei-ah paito in a kap hi. A paitoh kawmin: O ka tapa Absalom! Ka tapa, ka tapa Absalom! Nang sih tangin kei si hoh leng maw! - O Absalom, ka tapa, ka tapa!" a ci hi.