Read Zokam 2 Samuel 2 Bible Online

2 Samuel 2 - Zokam bible

2 Samuel 2

¹Hih hun khit ciangin David in TOPA kiangah, "Judah khuapite khatah ka paito ding hiam?" ci-in a dong hi. TOPA in, "Paito in," a ci hi. David in, "Koi-ah pai ding ka hi hiam?" ci-in a dong hi. TOPA in, "Hebron ah," ci-in a dawng hi.

²Tua ciangin David a zite gel, Jezreel mi Ahinoam le Carmel a Nabal’ meigongnu Abigail tawh a paito khawm hi.

³David in a ompihte a innkuanpih ciat tawh tonpih a, Hebron le a khuapite ah a teng uh hi.

⁴Tua ciangin Judah mite Hebron ah pai uh a, amaute in Judah innkuan tungah kumpi dingin David sathau a nilh uh hi. Saul a vuite Jebesh Gilead mite hi, ci-a David tungah a kigen ciangin,

⁵amah in Jebesh Gilead mite kiangah, "Na pu uh Saul vui-in ama tungah na migitna uh na lahna uh hangin TOPA in note thupha hong pia ta hen.

⁶Tu-in TOPA in migitna le muanhuaina hong lak henla, hih na sepna uh hangin kei zong note tungah ka angvanna kong lak ding hi.

⁷Tua ahi ciangin tu-in na pu uh Saul sikhin a Judah innkuan in amau tungah kumpi dingin kei sathau hong nilh khin uh ahi manin hat unla hang un," a ci hi.

⁸Tua hun mahin Saul galkap mangpa Ner’ tapa Abner in Mahanaim ah Saul’ tapa Ish-Bosheth a paipih hi.

⁹Amah in Gilead, Ashuri a[1] le Jezreel tung le Ephraim, Benjamin le Israel khempeuh tung ah zong kumpi-in a koih hi.

¹⁰Saul’ tapa Ish-Bosheth, Israel tungah kumpi a suahin kum sawmli upa a, kum nih sung a uk hi. Ahi zongin Judah innkuante in David a zui uh hi.

¹¹Kum sagih le kha guk sung tawntung Judah innkuante tungah kumpi semin Hebron ah David a om hi.

¹²Ner’ tapa Abner in Saul’ tapa Ish-Bosheth le a mite tawh Mahanaim nusia in Gibeon ah a paikhawm uh hi.

¹³Zeruiah’ tapa Joab le David mite paikhia uh a, Gibeon bualah a va dawntuah uh hi. Pawlkhat bual langkhatah tu in, pawlkhat a langkhatah a tu uh hi.

¹⁴Tua ciangin Abner in Joab kiangah, "I tangvalte pawlkhat dingsakin i mai-ah kilaisak ni," a ci hi. Joab in, "Hi mah hen, kilaisak mah ni," a ci hi.

¹⁵Tua ciangin amaute ding uh a- Benjamin le Saul tapa Ishbosheth-te ading mi sawm le nih le David ading mi sawm le nih a sehkhia uh hi.

¹⁶Tua ciangin amau kisikpih ciat a lu-in kibawh ciat uh a, a lang ciat uh teneem ah temta in sun ciatin a vekun a tukkhawm uh hi. Tua ahi ciangin Gibeon-a tua mun Helkath Hazzurim b[2] kici hi.

¹⁷Tua ni-a kidona nasia mahmah a, David mite in Abner le Israel mite a zo uh hi.

¹⁸Zeruiah’ tapa thumte: Joab, Abishai le Asahel tua lai-ah a om uh hi. Asahel pen gam sazukpi banga ngalhat ahi hi.

¹⁹Amah in Abner delh a, a delh kawmin veilam ahi a taklam ahi zongin a pial kei hi.

²⁰Abner in amah leh-et a, "Nang Asahel na hi hiam?" ci-in a dong hi. Amah in, "Hi mah ing," ci-in a dawng hi.

²¹Tua ciangin Abner in a kiangah, "Taklam ahikeh veilam ah pial inla tangvalpa khat manin a galhiamte hawkkhiatsak in," a ci hi. Ahi hangin Asahel khawl tuan loin amah a delh hi.

²²Abner in Asahel vauhilh kik a, "Kei hong delh nawn kei in! Bang hangin nang hong sattuk ding ka hi hiam? Na sanggampa Joab maitang bangci et thei ding ka hi hiam?" a ci hi.

²³Ahi hangin Asahel in amah a delh a khawl nuam tuan kei hi; tua ciangin Abner in a teipi tonglamin Asahel gilpi suna a teipi in a nunglamah a pailet hi. Amah tua lai-ah pukin a sipah hi. Asahel puka a sihna mun a tung peuhpeuh a khawl uh hi.

²⁴Ahi hangin Joab le Abishai in Abner delh uh a, nitum laitakin Gibeon gamlak paina lampi-a om Giah kiangah Ammah mualno a tung uh hi.

²⁵Tua ciangin Benjamin mite Abner nungah a kikhung uh hi. Amaute honkhat kisuahin mualtung khatah a pang uh hi.

²⁶Abner in Joab kiangah, "Namsau in a nawmvalh den ding kul ahi hiam? A tawpna ah khaatna ahi ding lam seh thei lo na hi hiam? A sanggamte uh a delh uh a khawl nadingun thu na piak ding bang tanvei sawt khin ahi hiam?" ci-in a otsan hi.

²⁷Joab in, "Pasian nuntakna lo a kong geninah, hong gen lo hi lecin mite in zingsang dong a sanggamte uh a delh den ding uh hi," c[3] ci-in a dawng hi.

²⁸Tua ciangin Joab in pengkul mut a, mite khempeuh a khawl uh hi; Israel delh nawn lo uh a zong a do nawn kei uh hi.

²⁹Tua zan tawntung Abner le a mite Arabah kantanin a pai uh hi. Amaute in Jordan kantan uh a, Bithron a[4] buppi kantan suakin Mahanaim a tung uh hi.

³⁰Tua ciangin Abner a delhna panin Joab kileh kika, a mite khempeuh a kaikhawm hi. David mite Asahel banah sawm le kua in a sam hi.

³¹Ahi hangin David mite in Abner tawh a pangkhawm Benjamin-te 360 a that uh hi.

³²Amaute in Asahel la uh a Bethlehem-a, a pa’ hanah a vui uh hi. Tua ciangin Joab le a mite zan khuavak pai uh a, khuavak tungin Hebron a tung uh hi.