Read Zokam 2 Samuel 20 Bible Online

2 Samuel 20 - Zokam bible

2 Samuel 20

¹Tu-in Benjamin mi Bicri’ tapa Sheba min nei buaina bawlpa khat tua lai-ah na om kha hi. Amah in pengkulmutin, "David ah tanh i nei kei hi, Jasse’ tapa ah i kihel kei hi! Israel aw, na puanbuk ciat uh zuan un," a ci hi.

²Tua ciangin Israel mi khempeuh in David taisan uh a Bicri’ tapa Sheba a zui uh hi. Ahi hangin Judah mite in Jordan panin Jerusalem dong lam tawntungah amau kumpipa mah a zui cinten uh hi.

³Jerusalem a kumpi inn ah David a ciah kik ciangin kumpipa in inn kem dinga a koih a zino sawmte samin inn khatah koiha, a cingsak hi. Amaute an vaka ahi hangin a luppih kei hi. Amaute a sih dongun meigongin a kikhumcip hi.

⁴Tua ciangin kumpipa in Amasa kiangah, "Ni thum sungin Judah mite ka kiangah kikhawmsak inla nang mahmah hiah ompah in," a ci hi.

⁵Ahi hangin Judah-te khawm dingin Amasa a pai ciangin kumpipa seh hun sangin sawt a beisakzaw hi.

⁶David in Abishai kiangah, "Tu-in Bicri’ tapa Sheba in Absalom sangin ei tungah siatna a tungsak zaw ding hi. Na topa’ nasemte tawh na va delh kei uh leh kulha ki-um khuapi tuhin a suakta kha ding hi," a ci hi.

⁷Tua ciangin Joab mite le Kereth-te le Peleth-te, mi thahat galhang khempeuh Abishai in ukin a kuankhia uh hi. Bicri’ tapa Sheba delh dingin amaute Jerusalem pan a paikhia uh hi.

⁸Amaute Gibeon suangpi ah a om laitakun, amaute tawh kimu dingin Amasa a pai hi. Joab in a galkap puanpi silh-a a paai-a kisiat temtazum khat a kivawh kawnggak khat a kawngah a gak hi. A mailam ah a pai laitakin a paai panin a kidokkhia hi.

⁹Joab in Amasa kiangah, "Sanggam aw, na dam hiam?" a ci hi. Tua ciangin Joab in a ziatlam khutin a khamul ah manin a nam hi.

¹⁰Joab in temtazum a tawi lam Amasa in awlmawh kha lo-a, Joab in a gilpi ah dawtin a gilzang leilakah a luangkhia hi. Dawt beh kul loin Amasa a si hi. Tua ciangin Joab le a sanggampa Abishai in Bicri’ tapa Sheba a delh uh hi.

¹¹Joab mite khat Amasa gei-ah dingin, "Joab guma David mi ahi peuhmah in Joab zui ta un!" a ci hi.

¹²Lampi laizanga a sisan lakah Amasa kidiah in lum-a tua a mu galkapte khempeuh tua lai-ah a khawl uh hi. Tuapa in Amasa omna a tung masasa a khawl a muh ciangin lampi panin lopaang ah kaikhia-a a tungah puan khatin a khuh hi.

¹³Lampi panin Amasa a kihepkhiat khit ciangin Bicri’ tapa Sheba delhin Joab nungah mi khempeuh a paisuak uh hi.

¹⁴Sheba in Abel Beth Maacah a[62] dong Israel behte khempeuh nawksuakin Ber mite omna kual khempeuh tawnsuak-a, amaute a vekpi un kikaikhawmin amah a zui uh hi.

¹⁵Joab galkapte khempeuh pai-in Sheba omna Abel Beth Maacah a umcih uh hi. Amaute in khuapi umcih in lei sungvum uh a, kulh pualam ah a ding uh hi. Amaute in kulh phukpai dingin a phut damdam uh ciangin,

¹⁶khuapi panin numei pil khat in, "Na ngai dih un! Na ngai dih un! Joab tawh ka kiho nuam hi, hiah hong sapsak dih un," ci-in a awng hi.

¹⁷Amah tuanu lam manawhin pai-a tuanu in, "Nang Joab na hi hiam?" ci-in a dong hi. Amah in, "Ka hi hi," a ci hi. Tuanu in, "Na nasemnu hong gen ding na ngaihsak in," a ci hi. Amah in, "Ka ngai hi," a ci hi.

¹⁸Tuanu in zom lai-a, "Sawtpek lai-in amaute in, ‘Abel ah nang hong kidawng hi,’ ci uh a, tua in thu a siangsak hi.

¹⁹Israel ah kote, a kilem a muanhuai ka hi uh hi. Nang in Israel sunga mi khat ahi khuapi suksiat na sawm hi. Bang hangin TOPA gouluahna nawmvalh nuam na hi hiam?" a ci hi.

²⁰Joab in, "Hi deksuai kei! Nawmvalh le siatsak a sawm ka hi peuhmah kei hi!

²¹A thu tua hi lo hi. Ephraim mualtung gam pana Bicri’ tapa Sheba min neipa in kumpipa David langah a khut liikto hi. Hih mipa hong pia peuh le uh cin khuapi pan ka nungkik ding hi," ci-in a dawng hi. Numei in Joab kiangah, "A lutang kulh panin nang hong kilot ding hi," a ci hi.

²²Tua ciangin tua numei ama ngaihsutna pilna tawh mi khempeuh kiangah pai-a, amaute in Bicri’ tapa Sheba lutang tankhia-in Joab a lot uh hi.Tua ciangin amah in pengkul muta, khuapi panin a mite kikhenthangin amau inn ciatah a ciah uh hi. Tua ciangin Jerusalem a kumpipa kiangah Joab a ciah kik hi.

²³Joab in Israel galkap buppi uk a: Jehoiada’ tapa Benaiah in Kereth-te le Peleth-te ukin;

²⁴Adoniram b[63] in zawhthawhthu-a nasemte cinga; Ahilud’ tapa Jahoshaphat, thu ciamteh hi in;

²⁵Sheva thuvanpi hi a; Zadok le Abiathar siampi hi in;

²⁶tuateh Jair-te Ira David siampi ahi hi.