Read Zokam 2 Samuel 3 Bible Online

2 Samuel 3 - Zokam bible

2 Samuel 3

¹Saul innkuan le David innkuan sawtpi a kido uh hi. David thahat semsem a, Saul innkuan a thanem semsem hi.

²Hebron a suak David’ tapate: A ta masa pen Jezreel a Ahinoam tapa Amnon hi a;

³a nihna Carmel a Nabal meigongnu Abigail tapa Kileab hi in; a thumna, Geshur kumpipa Talmai’ tanu Maacah tapa Absalom hi a;

⁴a lina, Haggith tapa Adonijah hi in; a ngana, Abital tapa Shephatiah hi in;

⁵a gukna, David zi Eglah’ tapa Ithneam ahi hi. Hihte Hebron a suak David’ tate ahi hi.

⁶Saul innkuan le David innkuan a kido laitakun Saul innkuan sungah, Abner ama munah a thahat semsem hi.

⁷Tu-in Saul in Aiah’ tanu Rizpah min nei khat zino in a nei hi. Tuateh Ish-Bosheth in Abner kiangah, "Bang hangin ka pa’ zino tawh lumkhawm na hi hiam?" a ci hi.

⁸Ish-Bosheth thugensa hangin Abner heh mahmah a, "Judah lama ui lutang hong sa na hiam? Tuni mahmah dong na pa innkuan tung le ama innkuanpih le a lawmte tungah ka muanhuai lai hi. David khutah note kong pia nai kei hi. Tua hi napi tu-in nang in kei hih numei tunga khialin nong ngawh hi!

⁹David tungah TOPA kiciam a, a thuciam banga ka hihsak kei tak leh Pasian in Abner a ut bangin hong thuaksak ta hen,

¹⁰a thuciamna ah: Saul innkuan panin kumpigam ka suankhia dinga Dan panin Beersheba dong, Israel le Judah tungah David tokhom ka kipsak ding hi, ci hi" ci-in a dawng hi.

¹¹Ish-Bosheth in Abner kihta ahi manin bangmah a gen ngam nawn kei hi.

¹²Tua ciangin Abner in David kiangah ama tangin kamtai sawla, "Tua gam kua aa ahi hiam? Kei tawh thukimna khat bawl in, Israel khempeuh nang kiang kong tunpih ding hi," a cisak hi.

¹³David in, "Pha hi, nang tawh thukimna ka bawl ding hi. Ahi hangin nang tungah na khat kong kal ding hi. Kei tawh kimu dinga nong pai ciangin Saul’ tanu Michal hong tonpih loin ka omna ah hong pai kei in," a ci hi.

¹⁴Tua ciangin David in Saul tapa Ish-Bosheth kiangah kamtai sawla, "Kei mahmah in ka thalawhsa, Philistia-te vun dawn zakhat man ka zi Michal hong pia in," ci-in a siiksak hi.

¹⁵Tua ciangin Ish-Bosheth in thu pia a, a pasal Laiah’ tapa Patiel tung pan a laksak hi.

¹⁶Ahi zongin a pasal in amah zui-a, Bahurim dong a nung zui-in a kapkap hi. Tua ciangin Abner in, "Inn ah na ciah in," a ci hi. Tua ciangin amah a ciahkik hi.

¹⁷Abner in Israel upate thu kikuppih-a, "Hun khat lai-in na kumpi dingun David na deih uh hi.

¹⁸Tu-in kumpi suaksak un! Ahang in TOPA in David kamciam-a, ‘Ka nasempa David zangin Philistia-te khut pan le amau galte khempeuh khut panin ka mi Israel ka hu ding hi,’ ci hi," a ci hi.

¹⁹Abner in zong Benjamin-te tungah a kam mahmah in a gen hi. Tua ciangin Israel le Benjamin innkuanbup in na khempeuh tua banga hih ding a utna uh David tunga a zasak dingin amah Hebron ah a pai hi.

²⁰Abner a mite sawmnih tawh Hebron a David kiangah a pai uh ciangin David in amah le a mite adingin pawi a bawl hi.

²¹Tua ciangin Abner in David kiangah, "Amaute nang tawh kithuah khawma, na lungsim a om bangin a vekun na uk theih nadingin kei hong kuansak pah inla ka topa kumpipa adingin Israel khempeuh hong khawmsak in," a ci hi. Tua ciangin David in Abner sawlkhia-a, amah lungnuamin a kuankhia hi.

²²Tua khit phetin David mite le Joab, a galsimna panun vanmat tampi pua-in a ciah uh hi. Ahi hangin David in Abner sawlkhia khina amah lungnuamtakin kuankhia khin ahi manin Hebron ah David tawh a na om nawn kei hi.

²³Joab le a gal kuanpih galkapte khempeuh a tun uh ciangin ama kiangah Ner’ tapa Abner, kumpipa kiangah pai-a, kumpipa in amah sawlin lungnuamin a kuankhia hi, ci-in kigen hi.

²⁴Tua ciangin kumpipa kiangah Joab pai a, "Bang hih khin na hi hiam? En in, na kiangah Ebner hong pai hi. Bang hangin paisak na hi hiam? Tu-in lah amah paikhinta hi!

²⁵Ner’ tapa Abner na theihsa ahi hi; nang hong khem dingin hong pai-a, na gamtatnate encik ding le na sepna peuhpeuh a en dingin hong kuan ahilam na thei hi," a ci hi.

²⁶Tua ciangin Joab in David paisan a Abner nungah kamtaite sawlin amaute in Sirah tuikhuk panin a ciahpih kik uh hi. Ahi hangin David in a thei kei hi.

²⁷Tu-in Hebron ah Abner a ciah kik ciangin Joab in amah a hopih tuam ding bangin kongpi pan a paikhiatpih hi. Tuateh tua lai-ah a sanggampa Asahel sisan phu a lakna-in Joab in a gilpi dawt-a a si hi.

²⁸Tua nung, David in hih thu a zak ciangin, "Keimah le ka kumpi-gam, Ner’ tapa Abner’ sisan tawh kisai-in TOPA mai-ah ka mawhpeng den uh hi.

²⁹Ama sisan Joab le a pa innkuan lutang tungah tu ta hen! Joab inn sungah mi khatpeuh meima naitawm hiam, phak b[5] hiam, ciangkhuta kingam hiam, namsau a puk hiam, an kitasam hiam tawh kilawi kei ta hen," a ci hi.

³⁰(Joab le a sanggampa Abishai in Abner that uh hi, bang hang hiam cih leh amah in Gibeon galphual ah amaute sanggampa Asahel a thahsak uh hi.)

³¹Tua ciangin David in Joab le ama ompihte khempeuh tungah, "Na puansilhte uh balkek unla ippi puan silhin Abner mai-ah thum kawmin pai un," a ci hi. Kumpipa David mahmah in a laang nungah a zui hi.

³²Amaute in Hebron ah Abner vui uh a, Abner hanah kumpipa nakpi in a kapkhia hi. Mite khempeuh zong a kap uh hi.

³³Kumpipa in Abner kahin taam lo-a: "Abner, thukham nei lote bangin si ding hiam?

³⁴Na khutte kihen lo-a, na khete kol a kibulh kei hi. Migilote mai-a puk bangin na puk hi," a ci hi. Tuateh mi khempeuh in amah a kahhuan kik uh hi.

³⁵Tua ciangin amaute khempeuh pai uh a, sun laitakpi-in David bang khatpeuh nesak dingin a kun uh hi; ahi hangin David tom lo a, "Nitum ma-in anlum ahi-a na khatpeuh ahi zongin ka ciap tak leh Pasian in kei nasiatakin hong thuaksak ta hen" a ci hi.

³⁶Mi khempeuh in thei uh a, a lungkim uh hi, a taktakin kumpipa hih peuhpeuh in amaute a lungkimsak hi.

³⁷Tua ciangin tua ni-in mite khempeuh le Israel khempeuh in Ner’ tapa Abner kithahna ah kumpipa a kihel loh lam a thei uh hi.

³⁸Tua ciangin kumpipa in a mite kiangah, "Tuni-in Israel sungah ulian ahi mi khat a sihlam thei lo na hi uh hiam?

³⁹Tua hi-a, tuni-in sathau kinilh kumpipa ka hi hangin ka tha nem-a, hih Zeruiah’ tapate kei adingin thahat lua uh hi. TOPA in a gamtatsiapa a gamtat siatna bangin thuk ta hen!" a ci hi.