Read Zokam 2 Samuel 5 Bible Online

2 Samuel 5 - Zokam bible

2 Samuel 5

¹Israel behte khempeuh Hebron a David kiangah pai uh a, "Kote nangma si le sa ka hi uh hi.

²A beisa hunin kote tungah Saul kumpi ahi lai-in Israel galsimna ah a makai nangmah na hi hi. Tua hi-a TOPA in nang tungah, ‘Ka mi Israel na cing dinga amaute ukpa na hi ding hi,’ hong ci hi," a ci uh hi.

³Israel upate khempeuh Hebron a kumpi David kiangah a pai uh ciangin kumpipa in amaute tawh Hebron a TOPA mai-ah kithu-khatna bawl uh a, amaute in Israel tungah kumpi dingin David sathau a nilh uh hi.

⁴David kumpi a suahin kum sawmthum pha a, kum sawmli sung a uk hi.

⁵Hebron ah Judah kum sagih le khaguk sung uk a, Jerusalem ah Israel khempeuh le Judah kum sawm thum le thum sung a uk hi.

⁶Kumpipa le a mite, tua lai-a teng Jebus-te sim dingin Jerusalem lamah a kuan uh hi. Jebus-te in David kiangah, "Hih lai-ah nong lut zo kei ding hi; mittawte le khebaite nangawn in nang hong nang zo ding uh hi," a ci uh hi. Amaute in, "Hih munah David a lut zo kei ding hi," ci-in a ngaihsun uh hi.

⁷Ahi hangin, David in mun muanhuai Zion David khuapi a la hi.

⁸Tua ni-in David in, "Jebus-te a zo peuhmah in David galte a[6] ahi ‘mittaw le khebaite’ omna mun a tun nadingun tuidum b[7] a zang ding uh hi," ci hi. Tua hangin amaute in, "Tua mittaw le khebaite kumpi inn sungah a lut kei ding uh hi," ci uh hi.

⁹Tua ciangin kulh sungah David tenga, David Khuapi kici hi. Amah in a kimkotah huang neisaka, a kipsak nadingin a sunglam ah leicial a[8] a neisak hi.

¹⁰TOPA Thahatpen Pasian in ompih ahi manin amah a vanglian semsem hi.

¹¹Tu-in Tyre kumpipa Hiram in David kiangah kamtai sawla, tam-taak luangte le khutsiamte le leisek siamte tonpihsak a, amaute in David adingin kumpi inn a lam uh hi.

¹²Tua ciangin David in Israel kumpi dingin TOPA in amah kipsaka, ama mi Israel a khualna-in a kumpi-gam tawisang hi, cih a thei hi.

¹³Hebron a nusiat khitin David in Jerusalem ah zi le zino lak thuah lai-a tanu tapa a neih thuah lai hi.

¹⁴Tua lai-a a neih a tate min in: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Alishama, Eliada le Eliphelet ahi hi.

¹⁷Israel kumpi dingin David sathau a kinilh lam Philistia-te in a zak uh ciangin a galhatna khempeuh uh tawh amah zong dingin a kuanto uh hi; ahi hangin David in na za-a a mun muanhuai ah a paisuk hi.

¹⁸Phisliatia-te kuansuk ta uh a, Rephaim Kuam ah a kiphalh uh hi;

¹⁹tua ciangin David in, "Pai-in Philistia-te ka sim ding hiam? Amaute kei khutah nong pia ding hiam?" ci-in TOPA a dong hi. TOPA in, "Kuan in, Philistia-te na khutah kong pia taktak ding hi," ci-in a dawng hi.

²⁰Tua ciangin Baal Perazim b[9] ah David kuan a, tua lai-ah amaute a zo hi. Amah in, "Tui phutkhap bangin ka mai-a ka galte TOPA in hong phutkhapsak hi," a ci hi. Tua ahi ciangin tua mun Baal Perazim kici hi.

²¹Philistia-te in tua lai-ah a milimte uh taisan uh a, David le a mite in a puakhia uh hi.

²²Philistia-te khatvei va kuanto kik uh a, Rephaim Kuam ah a kiphalh uh hi;

²³tua ciangin David in TOPA donga amah in, "Tang takin paito kei in, amau nung kimkotin um unla lungli kungte maisan panin sim un.

²⁴Lungli kungte dawnah lampaina ging na zak phetun manlangin kuan un, bang hang hiam cih leh tua in Philistia-te galkapte vat dingin TOPA kuan khin hi, cihna ahi hi," ci-in a dawng hi.

²⁵Tua ciangin TOPA thupiak bangin David in hih a, Gibeon c[10] panin Gezer dong lam dung tengah Philistia-te a sattuk hi.