Read Zokam 1 Kumpite 1 Bible Online

1 Kumpite 1 - Zokam bible

1 Kumpite 1

¹Kumpi David tekta-a a kum kicing ta in puan a silhsak ciang nangawnun a khua lum thei lo hi.

²Tua ciangin a nasemte in a kiangah, "Nungakno bit khat kumpipa kem dingin ka zong ding uh hi. Tuanu a pangah lum leh ka kumpipa uh a khua lum ding hi," a ci uh hi.

³Tua ciangin amaute in Israel gam sung teng nungakno melhoih khat zong uh a Shunam-te Abishag mu in kumpipa kiangah a puak uh hi.

⁴Nungakno melhoih mahmah a, amah in kumpipa kemin cinga kumpipa in a luppih zo nawn kei hi.

⁵Tu-in a nu Haggith tapa Adonijah amah le amah kikausiphumin, "Kumpi ka suak ding hi," a ci hi. Tua ciangin amai-a tai ding mi sawmnga, sakol-lengte le sakolte a[1] tawh a kithawisak hi.

⁶(A pa in, "Bang hangin na ut banga ta na hi hiam?" ci-in a tai ngei kei hi. Amah zong a mel hoih mahmah a Absalom zoma suak ahi hi.)

⁷Adonijah in Zeruiah tapa Joab le siampipa Abiathar hih thu donga amaute in a thukimpih uh hi.

⁸Ahi hangin siampi Zadok, Jehoiada tapa Benaiah, kamsangpa Nathan, Shimei le Rei b[2] le David cing tuamte in Adonijah a pawlpih kei uh hi.

⁹Tua ciangin Adonijah in En Rogel kiang Zoheleth Suangpi ah tuu, bawng le bawngno vakthaute biakna-in a pia hi. Amah in a sanggamte khempeuh, kumpi tapate le kumpi ulian ahi Judah mi khempeuh sam napi

¹⁰ahi hangin kamsang Nathan ahi-a, Benaiah ahi-a, a cing tuamte ahi a, a sanggampa Solomon ahi zongin a sam kei hi.

¹¹Tua ciangin Nathan in Solomon nu Bathsheba kiangah, "I topa David theih loh kalin Haggith tapa Adonijah kumpi a suah lam za lo na hi uh hiam?" ci-in a dong hi.

¹²"Tua ahi ciangin tu in nangma nuntakna le na tapa Solomon nuntakna na hotkhiat theih nadingin ngaihsutna khat kong pia ding hi.

¹³Kumpi David kiangah lut inla, ‘Ka to kumpipa aw, na nasemnu tungah: "Kei khita kumpi sem ding na tapa Solomon hi a, ka kumpi tokhom ah a tu taktak ding hi," ci-in hong kiciam hi lo na hi hiam? Bang hangin tu-in Adonijah kumpi suak ta ahi hiam?’ ci-in gen in.

¹⁴Kumpipa tawh na kihoho laitakin kei hong tumin na gensate kong kipsak ding hi," a ci hi.

¹⁵Tua ciangin a tekta kumpipa va mu dingin inndei sungah Bathsheba lut-a, Shunam-te Abishag in a na kem hi.

¹⁶Kumpipa mai-ah Bathsheba kunsukin a khukdin hi. Kumpipa in, "Bang deih na hiam?" ci-in a dong hi.

¹⁷Tuanu in ama kiangah, "Ka topa aw, TOPA na Pasian lo-in na nasemnu keima tungah: ‘Kei khita kumpi suak ding na tapa Solomon hi a, ka kumpi tokhom ah a tu ding hi,’ ci-in nangmah nong kiciam hi.

¹⁸Ahi hangin tu-in Adonijah kumpi suak khin a, tua thu nangmah ka to kumpipa in na thei kei hi.

¹⁹Amah in ganhon tampitak, bawngno vakthau le tuute go a, kumpipa tapa khempeuh, siampi Abiathar le galkap mangpa Joab sam napi na nasempa Solomon a sam kei hi.

²⁰Ka to kumpipa khitteh kumpi tokhom tungah kua tu ding cih a theih nadingun Israel khempeuhte’ mit nang tung hong tu hi, ka to kumpipa aw.

²¹Tua hi kei leh ka to kumpipa a pate tawh tawlnga dinga a kisialkhawm phetin kei le ka tapa Solomon mawhna neite bangin hong kibawl pah ding hi," a ci hi.

²²Tuanu kumpipa tawh a kihoho laitakin kamsangpa Nathan a tung hi.

²³Tuateh amaute in kumpipa kiangah, "Kamsangpa Nathan hih lai-ah om hi," ci-in a gen uh hi. Tua ciangin kumpipa mai-ah amah pai-a leilam nga-in a kunsuk hi.

²⁴Nathan in, "Ka to kumpipa aw, nang khitah Adonijah kumpi suakin na kumpi tokhoma tu dingin na pulak mah ahi hiam?

²⁵Tuni-in amah paisuk khinin biakna-in ganhon tampi, bawngno vakthau le tuute a pia hi. Kumpipa tapa khempeuh, galkap mangte le siampi Abiathar a sam khin hi. Tu mahmah in amaute in amah tawh nekhawm dawn khawm uh a, ‘Kumpi Adonijah khansawt hen!’ ci uh hi.

²⁶Ahi hangin na nasempa kei, le siampi Zadok, le Jehoiada tapa Benaiah, le na nasempa Solomon hong sam lo hi.

²⁷Ka to kumpipa in ama nasemte hong theisak loin ka to kumpipa khitah a tokhoma tu ding na hihsa ahi hiam?" a ci hi.

²⁸Tua ciangin Kumpi David in, "Bathsheba hong tumsak un," a ci hi. Tua ciangin amah kumpipa omna-ah lutin a mai-ah a ding hi.

²⁹Tua ciangin kumpipa kiciam a: "Ka lungkhamna khempeuh pana hong hukhiapa TOPA nuntakna lo-in ka cih inah

³⁰TOPA Israel Pasian ah kiciama nang tungah: Kei khitin na tapa Solomon kumpi suak dinga ka kumpi tokhom keima munah a tu ding hi, ka cihsa tuni-in ka tungsak taktak ding hi," a ci hi.

³¹Tua ciangin Bathsheba niamtakin lei lamah kunsuk a, kumpipa mai-ah khukdin sa in, "Ka topa Kumpipa David nungta tawntung hen!" a ci hi.

³²Kumpi David in, "Siampi Zadok, kamsang Nathan le Jehoiada tapa Benaiah hong lutsak un," a ci hi. Amaute kumpipa mai a tun uh ciangin

³³amah in amaute kiangah: "Na topa nasemte tonpih unla ka laa tungah ka tapa Solomon tuangsakin Gihon ah paipih suk un.

³⁴Tua lai-ah siampi Zadok le kamsangpa Nathan in Israel kumpi dingin sathau a nilh ding uh hi. Pengkul mut unla, "Kumpi Solomon khansawt hen!" ci-in awng un.

³⁵Tua ciangin amah tawh tonto unla amah ka kumpi tokhom ah tu-in kei munah a mang ding hi. Israel le Judah a ukpa dingin amah ka seh khin hi," a ci hi.

³⁶Jehoiadah tapa Benaiah in, "Amen! TOPA ka to kumpipa’ Pasian in tua bangin ci ta hen.

³⁷TOPA in ka to kumpipa a ompih bangin Solomon ompih in ka topa Kumpipa David tokhom sang nangawnin a tokhom liansakzaw ta hen!" ci-in a dawng hi.

³⁸Tua hi-a siampi Zadok, kamsang-pa Nathan, Jehoiada tapa Benaiah, Kereth-te le Peleth-te paisuk uh a, Kumpi David laa tungah Solomon tuangsakin Gihon ah a paipih suk uh hi.

³⁹Siampi Zadok in puanbuk siangtho panin sathau koihna saki la a Solomon a nilh hi. Tua ciangin amaute in pengkul mutin mi khempeuh in, "Kumpipa Solomon khansawt hen," ci-in a awng uh hi.

⁴⁰Tuateh mi khempeuh in a nung zui to uh a, tamngai mut kawmin nuam a sa mahmah uh hi; amaute awging in lei a lingsak hi.

⁴¹Adonijah le a ompih a lenglate khempeuh a pawi bawl uh a man kuanun hih thu a za uh hi. Pengkul ging a zak ciangin Joab in, "Khuapi sunga gamlumnate khempeuh bang ahi hiam?" ci-in a dong hi.

⁴²Amah a paupau laitakin siampi Abiathar tapa Jonathan a tung hi. Adonijah in, "Hong tum in. Nang bang mi gina khat in thu hoih hong puak pelmawh niteh maw," a ci hi.

⁴³Jonathan in, "Hi peuhmah kei! I Kumpipa David in Solomon kumpi suaksak khin ta hi.

⁴⁴Kumpipa in amah tawh siampi Zadok, kamsangpa Nathan, Jehoiada tapa Benaiah, Kereth-te le Peleth-te sawlin amaute in kumpipa laa tungah tuangsak uh a,

⁴⁵siampi Zadok le kamsangpa Nathan in Gihon ah amah sathau nilh zo uh hi. Tua lai panin amaute gualnuamin paito uh a khuapi sung teng a thawn hi. Na zak gamlumna tua ahi hi.

⁴⁶Tua banah Solomon in a kumpi tokhom luah khin hi.

⁴⁷Kumpi ulian te zong i to David Kumpipa a lungdampih dingin pai khin uh a, ‘Na Pasian in nang min sangin Solomon min thangsak zaw henla nang tokhom sangin amah aa liansakzaw ta hen!’ ci uh hi. Tuateh kumpipa a lupna tungah kunin bia-a,

⁴⁸‘Tuni-in kei za laih ding ka tokhom tunga tu ka mita hong musak TOPA Israel Pasian kiphat ta hen,’ " a ci hi.

⁴⁹Tua tak ciangin Adonijah lenglate khempeuh lauthawngin dingto uh a, a kikhen-thang uh hi.

⁵⁰Ahi hangin Adonijah in Solomon kihta a, biakna-tau kite a pom hi.

⁵¹Tua ciangin Solomon kiangah, "Adonijah in Kumpipa Solomon kihta a biakna-tau kite a pom hi. Amah in: ‘Kumpipa Solomon in a nasempa namsau-a hong thah loh nadingin tuni-in hong kiciam hen,’ ci hi," ci-in kigen hi.

⁵²Solomon in, "Amah mi gina ahina a lah theih nak leh a samzang khat zong lei lakah kia lo dinga; ahi zongin ama sungah siatna a kimuh leh a si ding hi," ci-in a thuk kik hi.

⁵³Tua ciangin Kumpipa Solomon in mi sawla biakna-tau pan a lasuk uh hi. Tuateh Adonijah pai-in Kumpipa Solomon mai-ah kun-a, Solomon in, "Na inn ah ciah in," a ci hi.