Read Zokam 1 Kumpite 11 Bible Online

1 Kumpite 11 - Zokam bible

1 Kumpite 11

¹Solomon in Pharaoh tanu banah gamdang numei tampi - Moab-te, Ammon-te, Edom-te, Sidon-te le Hit-te a ngaih beh lai hi.

²TOPA in Israel-te tungah, "Amaute tawh kiteng thuk peuhmah kei un, bang hang hiam cih leh amaute in na lungsim uh amau pasiante lamah hong hei taktak ding uh hi," ci-a a gen minamte amaute ahi uh hi. Tua hi napi Solomon in amaute a ngai cinten hi.

³Amah in kumpi tanu za sagih zi-in nei a, zino za thum a nei hi; tua hi-a, a zite in amah lam a khialsak hi.

⁴Solomon lah tek ta a, a zite in a lungsim amau pasiante lamah heisak uh a, a pa David lungsim a kho zahin TOPA ama Pasian lamah a lungsim bupin a ki-ap zo nawn kei hi.

⁵Amah in Sidon mite nusian Ashtoreth le a kihhuai Ammon mite pasian Molech a[77] a zui hi.

⁶Tua ciangin Solomon in TOPA mit ah a sia gamta hi; a pa David hihsa zahin amah in TOPA nung ciantakin a zui kei hi.

⁷Solomon in Jerusalem nisuahna lam mualtung khatah a kihhuai Moab pasian Chemosh le a kihhuai Ammon pasian Molech adingin munsang khat a bawl hi.

⁸Amah in a gamdang zite - gimnamtui hala a pasiante uh biakna a piate khempeuh ading a kibangin a bawlsak hi.

⁹Ama tungah nih vei a kilaksa TOPA Israel Pasian kiang panin Solomon lungsim pial ta ahi manin ama tungah TOPA a heh hi.

¹⁰Solomon in pasian dangte a zuih ding TOPA in kham napi Solomon in ama thupiak a zui kei hi.

¹¹Tua ciangin TOPA in Solomon kiangah, "Hih in nangma lungsim puak hi-a, nang kong thupiak ahi ka thukhunte, ka thukipte na zuih loh manin, na kumpigam nang kiang panin ka khenkham taktak dinga, na nuai-ate khat tungah ka pia ding hi.

¹²Ahi zongin na pa David ka cihna in nang hun sungin ka hih kei ding hi. Na tapa khut panin ka balkham ding hi.

¹³Ahi zongin ka nasempa David le keima teelsa Jerusalem ka khualna-in amah kiang panin kumpi-gam buppi ka khenkhamsak kei dinga amah beh khat ka pia ding hi," a ci hi.

¹⁴Tua ciangin TOPA in Edom kumpi gui pana Edom-te Hadad, Solomon langah a pangsak hi.

¹⁵A masa lai-a David le Edom-te a kido lai-in galkap mangpa Joab in misite vui dinga a pai-in Edom-a mi khempeuh a satpai hi.

¹⁶Amaute in Edom-a mi khempeuh a suksiat khit mateng uh kha guk sung Joab le Israel-te khempeuh tua lai-ah a taam uh hi.

¹⁷Ahi hangin Hadad naupang lai-a a pa nasem Edom-te ulian pawlkhat tawh Egypt ah a tai uh hi.

¹⁸Amaute Midian panin paikhia uh a Paran a tung uh hi. Tua ciangin Paran panin mi tonpih uha Egypt ah pai-in Egypt kumpipa Pharaoh kiang tung uh a, amah in Hadad inn khat le leitang pia-in a annek ding a sik hi.

¹⁹Hadad tungah Pharaoh lungkim mahmah a, ama zi Kumpinu Tahpenes sanggamnu tawh a kitengsak hi.

²⁰Tahpenes sanggamnu in tapa khat nei in a min Genubath hi a, Tahpennes in kumpi-inn ah a kem hi. Tua lai-ah Pharaoh tate tawh Genubath a omkhawm hi.

²¹Egypt ah Hadad a om laitakin David a pate tawh tawlnga khawm ta a, galkap mangpa Joab lah si ta cih thu a za hi. Tua ciangin Hadad in Pharaoh kiangah, "Ka gamah ka ciah theih nadingin kei hong phal in," a ci hi.

²²Pharaoh in, "Na gam ah na ciah kik nadingin hih lai-ah bang kisapna nei na hi hiam?" ci-in a dong hi. Hadad in, "Bangmah ka kisam kei hi, ahi zongin hong paisak hoh in!" ci-in a dawng hi.

²³Tuateh Pasian in Solomon langpan dingin a pu Zobah kumpipa Hadadezer kiang pana a tai Eliada tapa Rezon, a khangasak hi.

²⁴David in Zobah galhatna b[78] a suksiat ciangin amah in akim apama mite kaikhawma a lehdote makai khat a suak hi; a lehdote Damascus ah pai uh a, tua lai-ah tengin a uk uh hi.

²⁵Hadad lungkhamsakna behlapin Solomon nuntak sung teng Rezon in Israel a langpang hi. Tua ciangin Rezon in Aram ukin, Israel a hua mahmah hi.

²⁶Nebat tapa Jeroboam in zong kumpipa a lehdo hi. Amah Zeredah pana Ephraim-te, Solomon ulian khat hi-a, a nu meigong hi-in, a min Zeruah ahi hi.

²⁷Amah in kumpipa a lehdona hih bang ahi hi: Solomon in a kipsakna leicial c[79] bawl khin-a, a pa David khuapi kulh vangte a hu khin hi.

²⁸Tua lai-a a vaidingpi Jeroboam hi a, Solomon in tangvalpa nasep hoih a muh ciangin Joseph innkuan a nasem buppi a uksak hi.

²⁹Tua hun lai-in Jerusalem pua ah Jeroboam paikhia in Shiloh a kamsangpa Ahijah in puantual thak khat silhin lampi ah amah a na dawntuah hi. Amaute gel bek gam pua ah a om uh hi.

³⁰Tuateh Ahijah in a puantual silh lai suahkhia in balkek a, bek sawm le nih a suah hi.

³¹Tua ciangin Jeroboam kiangah, "Nang ading bek sawm la in, ahang in, TOPA, Israel Pasian in: En in Solomon khut panin a kumpi-gam ka balkhia dinga, nang beh sawmte kong pia ding hi.

³²Ahi hangin ka nasempa David le Israel beh khempeuh pana ka teelkhiat Jerusalem khuapi ka khualna-in amah in beh khat a tang ding hi.

³³Kei mah in hih ka sem ding hi, bang hang hiam cih leh amaute d[80] in kei hong taisan uh a, Sidonte nusian Ashtoreth, Moab-te pasian Chemosh le Ammon-te pasian Molech-te bia -in, ka lampite zui lo uh a, ka muhna ah amaanin gamta loin, Solomon pa David zuih bangin ka ngeina kipte le ka thukhunte a zui kei uh hi.

³⁴"‘Ahi hangin Solomon khut panin kumpi-gam bup ka laksak kei ding hi; ka nasempa David, ka teelpa, ka thupiakte le ka ngeina kipte a zuipa ka khualna-in a nuntak sung teng amah ka uksak ding hi.

³⁵A tapate khut panin kumpi-gam ka laksak dinga, nang beh sawmte kong pia ding hi.

³⁶Ka nasempa David in ka Min koih nadinga ka teelna Jerusalem a ka mai-ah meivak khat a neih den theih nadingin ama tapa beh khat ka pia ding hi.

³⁷Ahi hangin nang na hileh, kong la ding a, amaute khempeuh tungah na ut bangbangin na uk ding hi; Israel tungah kumpi na suak ding hi.

³⁸Nang in kong sawl peuhpeuh hih a, ka lampite tawnin ka nasempa David hih bangin ka ngeina kipte le ka thupiakte zuihna tawh ka mit muhna ah amaanin na gamtat leh nang kong ompih ding hi. David adingin ka kipsak bangin na ukna ka kipsak dinga, nang tungah Israel kong pia ding hi.

³⁹Hih thu hangin David suante ka niamkhiat dinga, ahi zongin a tawntung ahi kei ding hi,’ ci hi," a ci hi.

⁴⁰Solomon in Jeroboam thah sawma, ahi hangin Jeroboam Egypt ah tai-in kumpi Shishak beel a, Solomon a sih dong tua lai-ah a om hi.

⁴¹Solomon uk sunga adang thupiangte tawh kisai - a sep khempeuh le a lahkhiat pilna teng - Solomon tangthu ciamtehna sungah kigelh hi lo ahi hiam?

⁴²Solomon in Jerusalem ah Israel khempeuh kum sawmli sung a uk hi.

⁴³Tua ciangin a pate tawh tawlnga-a a pa David khuapi ah kivui hi. Tuateh a tapa Rehoboam in a za luah a kumpi a suak hi.