Read Zokam 1 Kumpite 13 Bible Online

1 Kumpite 13 - Zokam bible

1 Kumpite 13

¹Biakna-tau gei-ah biakna pia dingin Jeroboam a din laitakin Judah panin TOPA kammal hangin Pasian mipa khat Bethel ah a va pai hi.

²TOPA kammal bangin tua biakna-tau langkhat ah otsan a: "Biakna-tau, biakna-tau aw! TOPA in: David innkuan panin Josiah min nei tapa khat a suak ding hi. Amah in tu-a hih munsang tungah biakna a pia siampite nang tungah biakna-in hong pia dinga, nang tungah mihing guhte a kihal ding hi,’ ci hi," a ci hi.

³Tua ni mah in Pasian mipa in lim khat laka, "TOPA hong lahsa lim hih ahi hi: Biakna-tau kiphel suah dinga, a tunga vutte kibuakhia ding hi," a ci hi.

⁴Pasian mipa in Bethel a biakna-tau langkhat ah a otsan lam Kumpi Jeroboam in a zak ciangin biakna-tau panin a khut zan phei a, "Amah man uau!" a ci hi. Ahi hangin mipa lama a zan ama khut keugaw-a a ton kik thei nawn kei hi.

⁵TOPA kammal bangin Pasian mipa limpiaksa tawh kituakin biakna-tau zong kiphelsuah a, vutte a buakhia hi.

⁶Tua ciangin kumpipa in Pasian mipa kiangah, "Ka khut a ngeina a bat kik theih nadingin TOPA na Pasian tungah hong thumsak in," a ci hi. Tua ciangin Pasian mipa in TOPA tungah thumsak-a, kumpipa khut dam kikin a ngeina a bang hi.

⁷Kumpipa in Pasian mipa kiangah, "Inn ah kei tawh ton ni, bang khatpeuh ne inla letsong zong kong pia ding hi," a ci hi.

⁸Ahi hangin Pasian mipa in kumpipa kiangah, "Na neihsate a lang nong pia zawzen zongin kong zui kei dinga, hih lai-ah anlum ne loin tuisik zong ka dawn kei ding hi.

⁹Ahang in, TOPA kammal in, ‘Anlum ne loin tuisik zong na dawn kei dinga, na paina lamah na kileh kik kei ding hi,’ ci-in hong sawl hi," a ci hi.

¹⁰Tua ciangin amah in lampi dang khat tawna, Bethel pana hong paina lampi a tawn nawn kei hi.

¹¹Tua hunin Bethel ah kamsang putek khat a teng hi; a tapate hong pai-in tua ni-a Pasian mipa sepsate khempeuh a ko uh hi. Amaute in a pa uh kiangah, amah in kumpipa tunga a thugen zong a gen uh hi.

¹²A pa un amaute kiangah, "Aman koilam tawn a hia?" ci-in a dong hi. Tuateh a tapate in Judah pana Pasian mipa totna lam a lak uh hi.

¹³Tua ciangin amah in a tapate kiangah, "Ka laa tutphah hong vawhsak un," a ci hi. Amaute in laa tutphah a vawhsak khit uh ciangin amah tuanga,

¹⁴Pasian mipa a nungdelh hi. Amah in tawsaw nuai khatah a tut laitak mu a, "Nang Judah pana hong pai Pasian mipa na hi hiam?" ci-in a dong hi. Amah in, "Ka hi hi," ci-in a dawng hi.

¹⁵Tua ciangin kamsangpa in, "Ka inn ah hong zui inla an ne in," a ci hi.

¹⁶Pasian mipa in, "Kei kileh kikin nang kong zui thei kei dinga, hih mun ah nang tawh anlum zong ne loin, tuisik zong ka dawn thei kei ding hi.

¹⁷TOPA kammal in kei kiangah: ‘Tua lai-ah anlum na ne kei dinga, tuisik zong dawn loin, na kuana na totsa lampi ah na ciah kik kei ding hi,’ ci-a hong gensa ahi hi," a ci hi.

¹⁸Kamsang putekpa in, "Kei zong nangmah bangin kamsang khat ka hi hi. Vansawltak khat in TOPA kammal hong gena: ‘Anlum ne ding le tuisik dawn dingin na inn ah amah tonpih kikin,’ hong ci hi," a ci hi. (Ahi hangin amah’n a khem ahi hi.)

¹⁹Tua ciangin Pasian mipa amah tawh kileha, a inn ah ne-in a dawn hi.

²⁰Amaute in sabuai a um laitakun amah a pikik kamsang putekpa tungah TOPA thu a tung hi.

²¹Judah pana pai Pasian mipa tungah amah kiko in, "Hih in TOPA gen ahi hi: ‘TOPA kammal na thusim kei a, TOPA na Pasian in hong thupiaksa na zui kei hi.

²²Na nek na dawn loh nadinga hong genna munah anlum ne in tuisik na dawn hi. Tua ahi ciangin na pate hanah na luang a kivui kei ding hi,’ ci hi," a ci hi.

²³Pasian mipa in a nek a dawn khit ciangin amah a pikik kamsangpa in ama ading laa tutphah a vawhsak hi.

²⁴Lampi ah a pai laitakin humpi khat in dawntuahin amah thata, a luang lampi ah lawnin, humpi le laa a gei-ah a ding khawm uh hi.

²⁵Tua lai a tawn mi pawlkhat in a luang tua lai-ah kipai-a, a luang gei-ah humpi a din lam a muh uh ciangin kamsang putekpa khuapi sungah tua thu a gen uh hi.

²⁶A khualzin kimlai a paipih kik kamsangpa in a zak ciangin, "Tua pa pen TOPA thu a thusim lo Pasian mipa ahi hi. TOPA thu in amah a vauhilhsa bangin TOPA in amah humpi tungah pia-a, humpi in amah bawhpekin a thah ahi hi," a ci hi.

²⁷Kamsangpa in a tapate kiangah "Laa tutphah hong vawhsak un," ci-a, a vawhsak uh hi.

²⁸Tua ciangin amah pai-a lampi tungah a luang kipaii in, a gei-ah humpi le laa a ding a mu hi. Humpi in a luang ne loin laa zong a bawhpeek kei hi.

²⁹Tua ciangin kamsangpa in Pasian mipa luang tawmin a laa tungah suana, kah ding le vui dingin ama tenna khuapi ah a pua kik hi.

³⁰Tua ciangin aluang ama han sungah siala, amaute in kahin, "Ka sanggampa aw," a ci uh hi.

³¹Amah a vui khit uh ciangin a tapate kiangah, "Ka sih ciangin Pasian mipa kivuina han ah hong vui unla ama guhte gei-ah ka guhte sial un.

³²Ahang in, amah in Bethel a biakna-tau le Samaria khuapite sung munsangte tunga biakbuknote khempeuh langah TOPA kammal a pulakkhiat thute maantakin a tung pelmawh ding hi," a ci hi.

³³Hih teng khit ciang nangawnin Jeroboam in a gitlohna khel tuan lo a, mi nam cin panin munsangte a siampi ding khat vei a seh kik hi. Siampi a suak nuam peuhpeuh munsangte a siampi dingin a ap pahpah hi.

³⁴Hih in lei maitang panin a kiatsukna uh le a kisiatna uh a tun Jeroboam innkuante mawhna ahi hi.