Read Zokam 1 Kumpite 18 Bible Online

1 Kumpite 18 - Zokam bible

1 Kumpite 18

¹Hun sawtpi khit, kum thum ciangin Elijah tungah TOPA thu tunga: "Pai inla nang mahmah Ahab tungah va kipia in, tuateh guah kong zusak ding hi," a ci hi.

²Tua ciangin Ahab tunga kipia dingin Elijah a kuan hi. Tua laitakin Samaria ah kialpi nasia mahmah a,

³Ahab in ama kumpi inn ukpa Obadiah a sam hi. (Obadiah pen TOPA thu um a kipia zo khat ahi hi.

⁴Jezebel in TOPA kamsangte a thahthah lai-in Obadiah in kamsangte za khat kemin, suanghawm nih sungah sawmnga ta in sel-a, an le tui a puak hi.)

⁵Ahab in Obadiah kiangah, "Gam sunga ciktuite le kuamte omna khempeuh ah va pai in. I sakolte le laate nuntaksak nading lopa pawlkhat beek na mu thei kha ding hi; tua hileh i ganhingte khat beek thahlup kul lo ding hi," a ci hi.

⁶Tua ciangin amaute in a zon kim theih nadingun gam hawm uh a, Ahab mun khat lamah pai-in, Obadiah a mun khat lamah a pai hi.

⁷Obadiah a paipai laitakin Elijah tawh a kituak hi. Obadiah in amah thei-a, lei lakah bok in, "Ka topa Elijah aw, nang taktak mah na hi hiam?" a ci hi.

⁸Amah in, "Ka hi hi, pai inla na pu kiangah, ‘Elijah hiah om hi,’ va ci in," ci-in a dawng hi.

⁹Obadiah in, "Na nasempa Ahab thah dinga nong piak nadingin bang khialhna nei ka hi hiam?

¹⁰TOPA na Pasian nuntakna lo-in ka cih inah nang hong zong dinga ka pu in a sawl loh minam le kumpi gam khat zong a om kei hi. Minam khat ahi-a kumpi-gam khat ahi zongin tua lai-ah nang kong mu kei uh hi, a cih uh leh hong muh lohna uh a kiciamsak hi.

¹¹Ahi hangin ka pu kiangah pai a, ‘Elijah hiah om hi,’ ci-a gen dingin tu-in nong sawl hi.

¹²Nang kong nusiat kalin TOPA Kha in nang koi-ah hong puak ding cih ka thei kei hi. Kei pai-in Ahab kiangah va gen lenga, amah in nang hong mu kei leh kei hong that ding hi. Tua hi napi na nasempa in lah ka neutunga kipan TOPA ka biaksa ahi hi.

¹³Ka topa aw, Jezebel in TOPA kamsangte a thah lai-in ka hihte za hi lo na hi hiam? TOPA kamsangte za khat suang hawm nih ah sawmnga tuakin ka sel a, an le tui ka puak hi.

¹⁴Tuateh tu-in nang in kei pai-a, ‘Elijah hiah om hi,’ ci-a ka pu kianga gen dingin nong sawl hi. Amah in kei hong that ding hi!" a ci hi.

¹⁵Elijah in, "Ama na ka sep Thahatpen TOPA nuntakna lo-in ka cih inah tuni-in Ahab kiangah kei mahmah ka va kipia taktak ding hi," a ci hi.

¹⁶Tua ciangin Ahab tawh kimu dingin Obadiah pai-in gen a, Elijah tawh kimu dingin Ahab a pai hi.

¹⁷Amah in Elijah a muh ciangin, "Nang, Israel a lungkhamsakpa nang na hiam?" a ci hi.

¹⁸Elijah in, "Ke’n Israel ka lungkhamsak kei hi. Nang le na pa innkuan na hi uh hi. Nang in TOPA thupiakte taisanin Baal-te na zui uh hi.

¹⁹Tu-in Carmel Vum ah kei tawh kimu dingin Israel khempeuh sam in. Tuateh Jezebel sabuai-a an ne Baal kamsang zali le sawmngate le Asherah kamsang zalite hong tonpih uh hen," ci-in a dawng hi.

²⁰Tua ciangin Ahab in Israel khempeuh tungah thu paisak a, Carmel Vum ah kamsangte a kikhawmsak hi.

²¹Mipite mai-ah Elijah pai-in, "Ngaihsutna nih kikal ah bang tanvei lungsim laklawhin om niloh ding na hi uh hiam? TOPA pen Pasian ahileh amah zui unla; Baal pen Pasian ahileh lah amah zui un," a ci hi. Ahi hangin mite in bangmah a gen kei uh hi.

²²Tua ciangin Elijah in amaute kiangah, "TOPA kamsangte lakah kei bek ka om lai hi, ahi hangin Baal in kamsang zali le sawmnga a nei hi.

²³Kote adingin bawngtal nih hong la un. Amaute in khat teel uh henla, semnenin singtungah koihin mei-in hal kei uh hen. Ke’n a khat pen sa bawlin singtungah ka koih dinga mei-in ka hal kei ding hi.

²⁴Tua ciangin no na pasian min uh sam unla ken TOPA min ka sam ding hi. Mei-a a dawng pasian pen-Pasian ahi hi," a ci hi. Tua ciangin mi khempeuh in na gen hoih mah ei!" a ci uh hi.

²⁵Elijah in Baal kamsangte kiangah, "Tam mahmah na hi uh ciangin bawngtal khat teel unla bawl masa un. Na pasian min uh sam unla ahi zongin mei vak kei un," a ci hi.

²⁶Tua ciangin amaute in a kipia bawngtal la-in a bawl uh hi. Tua ciangin zingsanga kipan sun dong Baal min a sam uh hi. Amaute in, "Baal aw, ko hong dawng in," ci-in a kiko uh hi. Ahi hangin a kidawng kei hi; khat beek in a dawng kei hi. Tuateh amau dawhsa biakna-tau kimkotah a lam uh hi.

²⁷Sun ciangin Elijah in amaute a selnoh hi. Amah in, "Nak ot lai dih un! Amah pasian hi taktak hi! Thu nak ngaihsut lua, buai lua ahikeh khualzin hi kha ding hi. A ihmut laitak hi a, phot a kul hi kha ding hi," a ci hi.

²⁸Tua ciangin amaute nak ot semsem uh a, amau ngeina bangin namsau le teipi-in a sisan luan dongin a kikui uh hi.

²⁹Sun kim khin a, amaute in nitak biak piak hun dongin a kamsanna mah uh zom lai uh hi. Ahi hangin kidawng lo a, kuamah in dawng loin, khat beek in a thusim kei hi.

³⁰Tua ciangin Elijah in mite khempeuh tungah, "Kei kiangah hong pai un," a ci hi. Amaute a kiangah pai uh a, amah in a kisiasa TOPA biakna-tau a puahpha hi.

³¹TOPA thu a tun lai-a, "Na min Israel hi ding hi," a cihna Jacob suan beh sawm le nihte beh khat aitangin suang khat, suang sawm le nih Elijah in a la hi.

³²Tua suangte tawh TOPA minin biakna-tau khat dawha, a kimkot ah khaici seah a[93] nih a ta zo ding hawkguam khat a to hi.

³³Amah in sing cianga bawngtal atnenin singtungah a sia hi. Tua ciangin amaute kiangah, "Tui beelpi li dim unla biaknate le singte buak un," a ci hi.

³⁴Amah in, "Khat vei hih kik un," ci a, amaute in a hih kik lai uh hi. Amah in, "A thumveina hih un," ci-in thu pia-a amaute in a thumveina a hih uh hi.

³⁵Biakna-tau kimkotah tui luanga hawkguamte nangawn a dim hi.

³⁶Biak piak hun ciangin kamsang Elijah mailam ah paikhia in thu ngen a: "TOPA, Abraham, Isaac le Israel Pasian aw, Israel sungah nang Pasian na hina le kei nangma nasem hi-in nangma sawlna tawh hihte sem ka hilam tuni-in kitheisak in.

³⁷Hong dawng in TOPA aw, hong dawng in tua hileh hih mite in TOPA aw, nang Pasian na hilam le nang in amaute lungsim na hei kik lam a thei ding uh hi," a ci hi.

³⁸Tua ciangin TOPA meikuang kia in a biak piaknate, singte, suangtumte le leihoihte kangtum a, hawkguam sunga tuite nangawn a liaksiang khin hi.

³⁹Mi khempeuh in hih a muh uh ciangin khuptuk suk uh a, "TOPA-amah Pasian hi ei! TOPA-amah Pasian hi ei!" ci-in a kiko uh hi.

⁴⁰Tua ciangin Elijah in, "Baal kamsangte man un. Khat beek khahsuah kei un!" ci-in amaute thu a pia hi. Amaute in tuate man uh a, Kishon Kuam ah puaksakin tua lai-ah a golum uh hi.

⁴¹Tuateh Elijah in Ahab kiangah, "Guah tampi ging kiza ta hi, pai inla ne in dawn in," a ci hi.

⁴²Tua ciangin a ne a dawn dingin Ahab paikhia-a, Elijah ahileh Carmel mualdawnah kahtoin a khukte gel kikalah a lu omsaka, lei lamah a kunsuk hi.

⁴³A nasempa kiangah, "Pai inla tuipi lam va en sin aw," a ci hi. Tuateh amah paito-in a en hi. Amah in, "Tua lai-ah bangmah om kei," a ci hi. Elijah in sagih vei, "Pai kik in," a ci hi.

⁴⁴A sagih veina ah a nasempa in, "Tuipi pan khuttum cia-a neu meii khat hong kaiito hi," ci-in a zasak hi. Tua ciangin Elijah in, "Pai inla Ahab kiangah, ‘Guah in hong khak ma-in na sakolleng vawh inla paisuk in,’ va ci in," a ci hi.

⁴⁵Tua sungtengin meii kai-in van voma, huih kipei-in guahpi zu a, Jezreel ah Ahab a sakolleng ah tuangin a pai hi.

⁴⁶Elijah tungah TOPA vangliatna tunga, a puantualpi a kawnggakin gaka, Jezreel lampi tawntungah Ahab mai-ah a na tai hi.