Read Zokam 1 Kumpite 2 Bible Online

1 Kumpite 2 - Zokam bible

1 Kumpite 2

¹David in a sih kuan ciangin a tapa Solomon thu a vaikhak hi.

²Amah in, "Leitung mi khempeuh lampi zui-in a paikuan ta ka hi hi. Tua ahi ciangin kihatsak inla, kipasalsak in.

³TOPA na Pasian in hong kalh thute zui in: A lampite tawn inla hong thukipte le thuneihnate, a thukhamte le hong kalh thute Moses Thu kham sunga kigelh bangin kem in; tua hileh nasepna peuh le na paina peuh ah na lawhcing ding hi.

⁴tua hileh TOPA in: ‘Nangma suante in a nuntakzia uh a kidop uh a, a lungsim khempeuh uh leh a hinna khempeuh uh tawh ka mai-ah muanhuaitakin a kalsuan uh leh Israel-te kumpi tokhom ah mi khat a tut loh hun a om kei ding hi,’ ci-in kei tunga hong thuciam a zui ding hi.

⁵"Tu-in nang mahmah in Zeruiah tapa Joab in kei tungah hong bawlna - Israel galkap mang nihte Ner tapa Abner le Jether tapa Amasa-te tunga a gamtatna na thei hi. Amah in amaute that-a, gal kido hun bangin gal kilem hunin a sisan uh luangsaka kawnga a kawnggak le khe-a a khedap ah amaute sisan a bangsak hi.

⁶Nangma pilna bangin amah thuk inla, lungnuam takin a lu-a sam kangsa in hankhuk a[3] sung zuansak kei in.

⁷"Ahi zongin Gilead a Barzillai tapate tungah migi inla na sabuai-a an nete lakah an nesak in. Na sanggampa Absalom kiang pana ka tai lai-in ka kiangah hong dinpih uh hi.

⁸"Tuateh Mahanaim ah ka paini-a a khaa mahmah a kei hong hamsiatpa Bahurim pana Benjamin-te Gera tapa Shimei nang tawh a om lam zong phawk in. Jordan ah kei hong dawn dingin hong paisuk lai-in ama tungah TOPA lo-in ka kiciam a ‘Namsau in nang kong sisak kei ding hi,’ ka ci hi.

⁹Ahi hangin tu-in amah a mawhpeng in ngaihsun kei in. Nang pilna nei mi khat na hi hi; amah na bawl nading na thei ding hi. A lu-a a samkang sisan tawh hankhuk ah puak in," a ci hi.

¹⁰Tua ciangin David a pate tawh khawlkhawm ta a, David Khuapi ah a kivui hi.

¹¹Amah in Israel tungah kum sawmli sung uk a - Hebron ah kum sagih om leh Jerusalem ah kum sawmthum le thum sung a om hi.

¹²Tua ciangin Solomon a pa David tokhom tungah tu-a, ama ukna kiptakin a kiphut kip hi.

¹³Tu-in Solomon nu Bathsheba kiangah Haggith tapa Adonijah a pai hi. Bathsheba in ama kiangah, "Lemthu-a hong pai na hiam?" ci-in a dong hi. Amah in, "Lemthu-a hong pai hi mah ing," ci hi.

¹⁴Tua ciangin amah in, "Na khat kong gen nuam hi," a cih beh lai hi. Tuanu in, "Hong gen in," ci-in a dawng hi.

¹⁵Amah in, "Na theihsa bangin kumpi-gam kei aa ahi hi. Israel khempeuh in kei kumpi in hong mu uh hi. Ahi hangin nate kikhek ta-a, ka sanggampa tungah kumpi gam tung khin ta hi; ahang in, TOPA tung pana thu ahi hi.

¹⁶Tu-in nang tungah ngetnop khat kong nei hi. Hong nial kei in," a ci hi. Tuanu in, "Nong ngen thei hi," a ci hi.

¹⁷Tua ciangin, "Nong hehpihna-in Kumpipa Solomon tungah ka zi dingin Shunam-te Abishag na ngetsak lecin - amah’n nang hong nial lo ding hi," ci-in a zom lai hi.

¹⁸Bathsheba in, "Hoih mahmah hi, kumpipa tungah nang adingin kong gensak ding hi," ci-in a dawng hi.

¹⁹Bathsheba in Adonijah tangin Kumpipa Solomon hopih dingin a pai ciangin tuanu muakin kumpipa dingto a, ama lamah kunin a kumpi tokhom ah a tu hi. Amah in kumpipa nu adingin tokhom khat kipuaksak-a a taklam ah a tu hi.

²⁰Amah in, "Nang tungah na neuno khat kong ngen nuam hi, hong nial kei in," a ci hi. Kumpipa in, "Nu aw, hong ngen in kong nial kei ding hi," ci-in a dawng hi.

²¹Tua ciangin amah in, "Shunam-te Abishag le na sanggampa Adonijah kitengsak in," a ci hi.

²²Kumpipa Solomon in a nu kiangah, "Bang hangin Adonijah adingin Shunam-te Abishag hong ngen na hi hiam? Ama kumpi-gam ding zong hong ngen khawm pah vet ve - tuateng banah amah ka u ahi hi - hi hi, ama ading le siampi Abiathar le Zeruiah tapa Joab ading tawh ngen vet lecin!" ci-in a dawng hi.

²³Tua ciangin TOPA lo-in Solomon kiciam a, "Hih ngetna in Adonijah luang a sawng kei tak leh Pasian in a nasiazaw in kei hong tuaksak hen!" a ci hi.

²⁴Tua hi-a tu-in TOPA - ka pa David tokhom tungah kiptakin hong tusak a, ama hong ciamsa bangin kumpi-gam hong phuhsakpa nuntakna lo-in ka cih inah - tuni-in Adonijah kithat ding hi!" a ci hi.

²⁵Tua ciangin Kumpipa Solomon in Jehoiada tapa Benaiah thu pia-a, amah in Adonijah sattukin a si hi.

²⁶Siampi Abiathar kiangah kumpipa in, "Anathoth a na lote ah ciah kik in. Nang a si dinga kilawm na hi hi, ahi zongin tu-in kong that kei ding hi, bang hang hiam cih leh ka pa David mai-ah Thuneipipen TOPA thukhun singkuang-pi na pua-a, ka pa haksatna teng na thuakpih hi," a ci hi.

²⁷Tua ciangin Solomon in TOPA siampi a sepna panin Abiathar hemkhia a, Shiloh a Eli innkuan tawh kisai-a TOPA gensa kammal a tangtungsak hi.

²⁸Hih thu Joab kiang a tun ciangin, Absalom a pawlpih loh hangin Adonijah pawlpih ahi manin TOPA puanbuk ah tai-in biakna-tau kite a pom hi.

²⁹TOPA puanbuk ah Joab tai-in biakna-tau gei-ah a om lam Kumpi Solomon kiangah a kigen hi. Tua ciangin Solomon in Benaiah kiangah, "Pai inla amah va sattuk in," ci-in thu a pia hi.

³⁰Tua ciangin TOPA puanbuk ah Benaiah tum a, Joab kiangah, "Kumpipa in, ‘Pusuak hen,’ ci hi," a ci hi. Ahi hangin, "Pusuak kei ning, hih lai-ah ka si ding hi," ci-in a amah in dawng hi. Benaiah in kumpipa kiangah, "Joab in hih bangin hong dawng hi," ci-in a zasak hi.

³¹Tua ciangin kumpipa in Benaiah thu pia a, "Ama cih bangin hih in. Sattuk suk inla vui in, tua bangin Joab in kei le ka pa innkuan tungah mawhpengte sisan tunga a khialhnate siangsak in.

³²TOPA in ama luansak sisan ama tungah a thuk ding hi, bang hang hiam cih leh ka pa David theih loh in mi nih sima namsau in a that hi. Amaute gel Israel galkap mangpa Ner tapa Abner le Judah galkap mangpa Jether tapa Amasa hi a - amaute amah sangin hoihzaw in a thutang zaw uh hi.

³³Amaute sisan tunga mawhna Joab le ama suante tungah om tawntung ta hen. Ahi hangin David le ama suante, a inn le a kumpi tokhom, TOPA lemna in ompih den ta hen," a ci hi.

³⁴Tua ciangin Jehoiada tapa Benaiah paito in Joab sattukin thata, sehnel-gama ama neihsa leitang a[4] tungah a vui hi.

³⁵Kumpipa in Jehoiada tapa Benaiah galkap mangpi in Joab mun ah koih a, Abiathar hemkhia in siampi Zadok tawh laih hi.

³⁶Tua ciangin kumpipa in Shimei samsak a ama kiangah, "Mundang ah pai kei inla Jerusalem ah inn khat lamin tua lai-ah teng in.

³⁷Paikhia lecin Kidron Kuam na kantan ni-in na si taktak ding hi; nangma sisan nang lu tungah a tu ding hi," a ci hi.

³⁸Shimei in kumpipa kiangah, "Na gen bangin a hoih hi. Na nasempa in ka to kumpipa cih bangin ka hih ding hi," ci-in a dawng hi. Tua ciangin Jerusalem ah Shimei sawtveipi a teng hi.

³⁹Ahi hangin kum thum khit ciangin Shimei silate nih - Gath kumpipa Maacah tapa Achish kiangah tai uh a, Shimei kiangah, na silate Gath ah om hi," ci-in a kigen hi.

⁴⁰Tuateh a laa tutphah vawhin a silate zong dingin Gath a Achish kiangah a pai hi. Tuaci-in Shimei kuankhia-a Gath panin a silate a la kik hi.

⁴¹Jerusalem panin Gath ah Shimei pai-a a kileh kikna thu Solomon kiangah a kigen ciangin

⁴²kumpipa in Shimei samin a kiangah, "TOPA lo-in kong kiciamsak a, ‘Mun dang khatpeuh ah pai-a hih mun na nusiat ni-in na sih ding teltakin thei in,’ ci-in hong vauhilh hi lo ka hi hiam? Tua hunin kei kiangah ‘Na gen bang a hoih hi. Kong mang ding hi,’ na ci hi.

⁴³Bang hangin TOPA tungah na kiciamna zui loin kong thupiak mang lo na hi hiam?" a ci hi.

⁴⁴Kumpipa in Shimei kiangah, "Ka pa David tunga na khialhna khempeuh na lungsimin na thei hi. Tu-in TOPA in na khialhna nang tungah hong thuk ding hi.

⁴⁵Ahi hangin Kumpipa Solomon thupha kipia dinga TOPA mai-ah David tokhom a kip tawntung ding hi," a ci hi.

⁴⁶Tua ciangin kumpipa in Jehoiada tapa Benaiah thu pia a, amah paikhia-in Shimei sattukin a that hi. Tu-in Solomon khutah kumpi-gam kiptakin kiphutkip hi.