Read Zokam 1 Kumpite 21 Bible Online

1 Kumpite 21 - Zokam bible

1 Kumpite 21

¹Tua khit a sawt loin Jezreel-te Naboth lengguilo tawh kisai thu khat a piang hi. Tua lengguilo Jezreel sung hi a, Samaria kumpipa Ahab kumpi-inn tawh a kinai hi.

²Ahab in Naboth kiangah, "Na lengguilo ka kumpi-inn tawh kinai ahi manin anteh sawlbawk huan dingin kei hong pia in. Tua tangin lengguilo hoihzaw khat ahikeh na deih zawk leh a man zahzah tawh kong lei ding hi," a ci hi.

³Ahi hangin Naboth in, "Ka pate gou ka luah hi-a, TOPA in nang kong piak ding a phal kei hi," ci-in a dawng hi.

⁴Jezreel-te Naboth in, "Ka pate gou ka luah nang kong pia kei ding hi," ci ahi manin Ahab heh kawmin maimialsa in a inn ah a ciah hi. A lupna tungah lumin nuaka an a ne nuam kei hi.

⁵A zi Jezebel sungtumin, "Bang hanga maimialkeei na hi hiam? Bang dinga an ne lo na hi hiam?" ci-in a dong hi.

⁶Amah in tuanu kiangah, "Jezreel-te Naboth kiangah, ‘Na lengguilo hong zuak in, na deih zawk leh zong tua tangin mun dang ah lenggui lo khat kong pia ding hi,’ ka ci hi. Ahi hangin amah in, ‘Ka lengguilo kong pia kei ding hi,’ hong ci hi," a ci hi.

⁷A zi Jezebel in, "Israel tungah kumpi sem hi buang lo na hiam? Tho inla an ne in! Kilungnuamsak in. Jezreel-te Naboth lengguilo nang kong ngahsak ding hi," a ci hi.

⁸Tua ciangin amah in Ahab minin laikhak gelh-a, a seal tum-in Naboth khuapi ah amah tawh a tengkhawm upate le uliante a khak hi.

⁹Tua laikhak sungah: "Antan ni ding khat zasak unla mite lak a thupina munah Naboth tusak un.

¹⁰Ahi hangin amah tawh kigalsai-in mibang lo nih tusak unla amah in Pasian le kumpipa hamsiat hi cih teci pangsak un. Tua ciangin paikhiatpih unla suangin denglum un," ci-in a gelh hi.

¹¹Tua ciangin Naboth’ khuapi a teng upate le uliante in Jezebel in amaute lai a khakna sunga a gelhsa bangin a hih uh hi.

¹²Amaute in antan ding zasak uh a, mite lak a thupina munah Naboth a tusak uh hi.

¹³Tua ciangin mibang lo nih hong pai uh a, amah tawh kigalsai in a tu uh hi; mite mai-ah Naboth mawhsak uh a, "Naboth in Pasian le kumpipa hamsiat hi," a ci uh hi. Tua ciangin amah khuanawl ah paikhiatpih in suangin a denglum uh hi.

¹⁴Tua ciangin Jezebel thu zasak uh a: "Naboth suangin kideng khina si ta hi," a ci uh hi.

¹⁵Jezebel in Naboth suangin kidenglum khin hi, cih thu a zak phetin Ahab kiangah, "Ding inla Jezreel-te Naboth in nang hong zuak nop loh lenggui-lo la-in tang in. Amah nungta nawn lo hi, si ta hi," a ci hi.

¹⁶Ahab in Naboth sih a zak ciangin tho-a paisuka, Naboth lengguilo la-in a tang hi.

¹⁷Tua khit ciangin Tishbe-te Elijah tungah TOPA thu tunga:

¹⁸"Samaria a uk Israel kumpipa tawh kimu dingin paisuk in. Amah tu-in ama tanh ding a la dingin apaina Naboth lengguilo ah a om hi.

¹⁹Ama kiangah, ‘TOPA thugen hih ahi hi: ‘Mi khat thatin a van laksak hi lo na hi hiam?’ ci hi. Tua ciangin ama kiangah, ‘TOPA thugen hih ahi hi: Naboth sisan uite in a liahna munah uite in nang sisan zong a liak ding uh hi - hi hi, nangma aa!’ ci in," a ci hi.

²⁰Ahab in Elijah kiangah, "Ka galpa aw, kei hong mu zo mah teh!" a ci hi. Amah in, "Nang hong mu zo mah ing, bang hang hiam cih leh TOPA mitah a gilo dingin na kizuak hi.

²¹Nang tungah siatna kong tungsak ding hi. Nasuan na khakte kong hultum dinga, Israel-a om Ahab pana pasal peuhmah - sila ahi a sila lo ahi zongin ka beisak khin ding hi.

²²Na innkuan, Nebat tapa Jeroboam innkuan le Ahijah tapa Baasha innkuan ka bangsak ding hi, bang hang hiam cih leh nangmah in kei hong phinin nong hehsak a, Israel mawhna na bawlsak hi," a ci hi.

²³"Tua ciangin Jezebel tawh kisai-in zong TOPA in: ‘Uite in Jezreel kulh a[98] phungah Jezebel a netum ding uh hi,’ ci hi.

²⁴"Ahab tawh kisai-a khuapi sung a site uite in ne ding uh a, gam sunga site huihlak vasate in kivakna-in a nei ding uh hi,’ ci hi," ci-in a dawng hi.

²⁵(A zi Jezebel in kun-a, Ahab gamtat banga TOPA mit ah gitloh gamtat dinga amah le amah a kizuak mi khat beek a om ngei nai kei hi.

²⁶TOPA in Israel mai-ah a hawlkhiat Amor-te bangin milimte nung zui-in gamtatsia penin a gamta ahi hi.)

²⁷Ahab in hih thute a zak ciangin a puan balkeka ippi silhin an a tang hi. Ippi silhin kiniamkhiat takin avak khiankhian hi.

²⁸Tua ciangin Tishbe-te Elijah tungah TOPA thu tunga:

²⁹"Ka mai-ah Ahab a kiniamkhiat lam na phawk hiam? Amahmah kiniamkhiat ahi manin hih siatna ama hun sungin ka tungsak kei ding hi, ahi hangin a tapa hunin a innkuan tungah ka tungsak ding hi," a ci hi.