Read Zokam 1 Kumpite 22 Bible Online

1 Kumpite 22 - Zokam bible

1 Kumpite 22

¹Aram le Israel kikal ah kum thum sung gal kidona a om kei hi.

²Ahi hangin a kumthumna ah Israel kumpipa tawh kimu dingin Judah kumpipa Jehoshaphat a paisuk hi.

³Israel kumpipa in a uliante tungah, "Ramoth Gilead ei aa hi napi bangmah cih loin Aram kumpipa tung pan i lak kik loh lam na thei uh hiam?" a ci hi.

⁴Tua ciangin amah in Jehoshaphat kiangah, "Ramoth Gilead nong simpih ding hiam?" ci-in a dong hi. Jehoshaphat in Israel kumpipa kiangah, "Nang tawh a kibang ka hi hi, ka mite nang mi hi-a, ka sakolte nangma sakol ahi hi," ci-in a dawng hi.

⁵Ahi hangin Jehoshaphat in zong Israel kumpipa kiangah, "A masa penin TOPA thu dong in," a ci hi.

⁶Tua ciangin Israel kumpipa in kamsangte kikhawmsak a - mi zali khawng - amaute kiangah, "Ramoth Gilead sim dingin ka kuan ding hiam, ahikeh ka thuak lel ding hiam," ci-in a dong hi. Amaute in, "Kuan in, Topa in kumpipa khutah hong pia ding hi," ci-in a dawng uh hi.

⁷Ahi hangin Jehoshaphat in, "Hih lai-ah i dot theih ding TOPA kamsang khat om lo hiam?" ci-in a dong hi.

⁸Israel kumpipa in Jehoshaphat kiangah, "TOPA thu i dot theih ding mi khat om lai hi, ahi hangin amah ka mudah hi, bang hang hiam cih leh kei tawh kisai a hoih khat beek genkhol ngei lo-a a sia bekbek a gen hi. Amah Imlah tapa Micaiah ahi hi," ci-in a dawng hi. Jehoshaphat in, "Kumpipa in tua bang ci kei in," ci-in a dawng kik hi.

⁹Tua ciangin Israel kumpipa in a uliante khat sam-a, "Imlah tapa Micaiah hong sampak dih un," a ci hi.

¹⁰Israel kumpipa le Judah kumpipa Jehoshaphat in a kumpi puan uh silhin Samaria lutna kongpi kianga ancilna phualzanga, kumpi tokhom tungah tu uh a, amaute mai-ah kamsang khempeuh in kam a sang uh hi.

¹¹Tua laitakin Kenaanah tapa Zedekiah in sik kite bawl a, "TOPA thugen hih ahi hi: ‘Aram-te a kisiat khit matengin hihte tawh na piik ding uh hi,’ ci hi," ci-in a gen hi.

¹²Kamsang dangte khempeuh in a kibangin kam a sang uh hi. Amaute in, "TOPA in kumpipa khutah hong pia ding ahi manin Ramoth Gilead simin gualzo in," a ci uh hi.

¹³Micaiah sam dinga pai kamtaipa in a kiangah "En in, kamsang dangte khempeuh in mi khat gen bangin kumpipa zawh dingin a gen uh hi. Nang zong amaute aa tawh kibang sak inla a gum lamin pau lel in," a ci hi.

¹⁴Ahi hangin Micaiah in, "TOPA nuntakna lo a ka cih inah TOPA in kei tunga hong gen bek ama tungah ka gen thei hi," a ci hi.

¹⁵Amah a tun ciangin kumpipa in, "Micaiah, Ramoth Gilead sim dingin ka kuan ding uh hiam; ahikeh ka thuak lel ding hiam?" ci-in a dong hi. "TOPA in kumpipa khutah hong pia ding hi; sim in na zo ding hi," ci-in a dawng hi.

¹⁶Kumpipa in, "Bangmah dang gen loin thutak na gen nadingin TOPA minin bangzah vei hong kiciamsak ding ka hi hiam?" a ci hi.

¹⁷Tua ciangin Micaiah in, "Israel khempeuh mualtungah a cing om lo tuu bangin a kithehthang ka mu a, TOPA in, ‘Hih mite pu nei lo ahi uh hi. Amaute inn ciatah lungnuamin ciah uh hen,’ ci hi," a ci hi.

¹⁸Israel kumpipa in Jehoshaphat kiangah, "Amah in kei tungah a hoih khat beek gen ngei lo-a a sia bek gen hi, ci-a hong gen hi lo ka hi hiam?" a ci hi.

¹⁹Micaiah in, "Tua ahi ciangin TOPA thugen za un: TOPA a kumpi tokhom tungah tu a, ama mihonpite khempeuh a taklam le a veilam a kimkotah a ding ka mu hi.

²⁰Tua ciangin TOPA in, ‘Ramoth Gilead sima a sih nadingin kua in Ahab va zol ding ahi hiam?’ ci hi. "Khat in khat gena, adang khat in a tuam khat a gen hi.

²¹A nunung penin kha khat a mai-ah pai-in TOPA mai-ah dinga, "Ke’n amah ka zol ding hi,’ ci hi.

²²"TOPA in, ‘Bangci bangin?’ ci-in a dong hi. "Amah in, ‘Ka paikhia dinga, ama kamsangte khempeuh kamah kha zuau ka va suak ding hi,’ ci hi. "TOPA in pai inla hih in, amah zol lecin na zo ding hi,’ ci hi.

²³"Tua hi a tu-in TOPA in na kamsangte khempeuh kam ah kha zuau a koih khin hi.TOPA in na thuak ding gimna khentat khin hi," ci-in a thugen a zom lai hi.

²⁴Tua ciangin Kenaanah tapa Zedekiah paito in, Macaiah maitang a beng hi. Amah in, "Nang hopih dingin kei kiang pan amah hong pai ciangin TOPA kiang pana a[99] a kha in koi lampi pen tawn ahi hiam?" ci-in a dong hi.

²⁵Micaiah in, "Inn tawngnung sungah na buk ni ciangin na mu khia ding hi," ci-in a dawng hi.

²⁶Tua ciangin Israel kumpipa in, "Micaiah paipih unla khuapi ukpa Amon le kumpipa tapa Joash kiangah puakkik un,

²⁷‘Kumpipa in: Bittaka kong tun kik mateng hih pa thong sungah khumin anlum le tuisik longal bangmah pia kei un, ci hi,’ ci-in gen un," ci-in thu a pia hi.

²⁸Micaiah in, "Bittaka nong kileh tak leh, TOPA in kei tungah thu a gen lo hi ding hi," a cikhia hi. Tua ciangin, "No mite khempeuh aw, ka thugen ciamteh un!" a cih beh lai hi.

²⁹Tua ciangin Israel kumpipa le Judah kumpipa Jehoshaphat, Ramoth Gilead ah a kuanto uh hi.

³⁰Israel kumpipa in Jehoshaphat kiangah, "Ka melsel in gal sungah va kuan ningin nang na kumpi puante silh in," a ci hi. Tua ciangin Israel kumpipa in a mel sela gal sungah a kuan hi.

³¹Tua laitakin Aram kumpipa in a sakolleng ukte sawmthum le nih thu pia-a, "Israel kumpipa longal aneu alian khatpeuh tawh kido kei un," a ci hi.

³²Sakolleng ukte in Jehoshaphat a muh uh ciangin, "Israel kumpipa hi taktak hi," ci-in a ngaihsun uh hi. Tua ciangin amah sim dingin a kihei uh hi, ahi zongin Jehoshaphat a kiko khiat ciangin

³³sakolleng ukte in Israel kumpipa ahi lohlam thei uh a, amah a delh nawn kei uh hi.

³⁴Ahi hangin mi khatin a thal kekin mawk lot a, Israel kumpipa kidalnate kikal a kha hi. Kumpipa in a sakol-leng hawlpa kiangah, "Kidona sung panin leng hawlkhia in, hong paikhiatpih in. Ka liam hi," ci-in a gen hi.

³⁵Sun niloh nasiatakin gal kido-a, kumpipa a sakolleng tungah kingamsa in Aram-te lam nga-in a om hi. A liamma panin sakolleng sungah a sisan luanga tua ni nitak in a si hi.

³⁶Ni tum laitakin galkap khempeuh lakah: "A kuamahpeuh amau khuapi ciat, amau gam ciat ah!" kitangko hi.

³⁷Tua bangin kumpipa si-a Samaria ah kipua in tua lai-ah a kivui hi.

³⁸Amaute in a sakolleng Samaria a bual (a kizuakte kisilna) b[100] ah sil uh a, TOPA thu in a pulaksa bangin uite in a sisan a liak uh hi.

³⁹Ahab uk sunga thupiang dangte, ama sepsa khempeuh kumpi inn lama saiha tawh a tuam, le khuapite kulh-a a umte Israel kumpite khangthu ciamtehna laibu sungah kigelh hi lo ahi hiam?

⁴⁰Ahab a pate tawh tawlnga khawm hi. A tapa Ahaziah in luah a kumpi a suak hi.

⁴¹Israel kumpi Ahab a kumlina kumin Asa tapa Jehoshaphat Judah kumpi a suak hi.

⁴²Jehoshaphat kumpi a suahin kum sawmthum le nga pha a, Jerusalem ah kum sawmnih le nga sung a mang hi. A nu min Azubah hi-a Shilhi tanu ahi hi.

⁴³Na khempeuh ah a pa lampite zui-in, tuate a pialsan kei hi; TOPA mitah amaanin na a sem hi. Ahi zongin munsangte kihemkhia loin mite in tua lai-ah biakna pia uh a gimnamtui a hal uh hi.

⁴⁴Jehoshaphat in zong Israel kumpipa tawh kilemna a bawl hi.

⁴⁵Jehoshaphat uk sunga thupiang dangte, a matutnate le a galkapte thahatnate Judah kumpite khangthu ciamtehna laibu sungah kigelh hi lo ahi hiam?

⁴⁶Amah in gam sunga pasal kizuakte’ biakbuknote, a pa Asa man’ khita om laite nangawn a beisak hi.

⁴⁷Tua ciangin Edom ah kumpi om lo-a, kumpipa nuai-a pa in a uk hi.

⁴⁸Tu-in Jehoshaphat in kham zongin Ophir a pai nading sumbuk tembawpite c[101] bawla, ahi hangin tuate a paikhia ngei kei hi - tuate Ezion Beber ah kisia hi.

⁴⁹Tua hun teh Ahab tapa Ahaziah in Jehoshaphat kiangah, "Ka mite na mite tawh tonsak in," a cih hangin Jehoshaphat in a nial hi.

⁵⁰Tua ciangin Jehoshaphat a pate tawh tawlnga khawma, amaute tawh a pa David khuapi ah kivuikhawm hi. A tapa Jehoram in a za a luah hi.

⁵¹Judah kumpipa Jehoshaphat in a uk a kum sawm le sagihna kumin Samaria ah Ahab tapa Ahaziah Israel kumpi suaka, Israel ah kum nih sung a mang hi.

⁵²Amah in a nu le a pa tot lampi le Israel mawhna bawlsak Nebat tapa Jeroboam lampite tawn ahi manin TOPA mitah a sia-in a gamta hi.

⁵³Amah in a pate hihsa bang tektekin Baal na semin bia-a, TOPA, Israel Pasian phinin a hehsak hi.