Read Zokam 2 Kumpite 1 Bible Online

2 Kumpite 1 - Zokam bible

2 Kumpite 1

¹Ahab a sih khit ciangin Moab in Israel a lehdo hi.

²Tu-in Samaria a, a inndei tungnung a vathangheng panin Ahaziah kia-a a liam hi. Tua ciangin amaute kiangah kamtaite sawlin, "Pai unla hih ka liamna pan ka dam zo ding hiam, Ekron pasian Baal-Zebub va dotsak un," a ci hi.

³Ahi hangin TOPA vansawltak in Tishbi-te Elijah kiangah, "Pai to inla, Samaria kumpipa kamtaite tawh kimu in, ‘Ekron pasian Baal-Zebub thu dong dinga na pai Israel sungah Pasian a om lo man hiam?

⁴Tua ahi ciangin TOPA gen hih ahi hi: ‘Tu-a na lupna na kan nawn kei ding hi. Na si taktak ding hi! ci in," a ci hi. Tua ciangin Elijah a pai hi.

⁵Kumpipa kiangah kamtaite a kileh uh ciangin, "Bang hangin hong ciah kik na hi uh hiam?" ci-in amaute a dong hi.

⁶Amaute in, "Ko tawh kimu dingin mi khat hong pai-a, ‘No hong sawl kumpipa kiangah ciah kik unla ama kiangah, ‘TOPA thugen hih ahi hi: Ekron pasian Baal-Zebub thu dong dingin mi na sawl sese Israel sungah Pasian om lo ahi hiam? Tua ahi ciangin tu-a na lupna na kan nawn kei ding hi. Na si taktak ding hi!" hong ci hi,’ ci un," a ci uh hi.

⁷Kumpipa in, "No tawh kimu dinga hong pai-a hih thu hong gen mi a bangci khat ahi hiam?" ci-in amaute a dong hi.

⁸Amaute in, "Amah in samul puan silh-a, a kawngah savun kawnggak a gak hi," a ci uh hi. Kumpipa in, "Tishbi-te Elijah ahi hi," a ci hi.

⁹Tua ciangin amah in galkap sawmnga a uk galkap bupa a mi teng tawh Elijah kiangah a sawl hi. Elijah kiangah bupa paito-a, amah mualdawn khatah a na tu hi. Amah in, "Pasian mipa aw, kumpipa in, ‘Hong paisuk hen!’ ci hi," a ci hi.

¹⁰Elijah in, "Kei Pasian mipa ka hihleh van panin meikuang hong kiasuk henla nang le na mi sawmngate hong kangtum hen!" ci-in a ukpa a dawng hi. Tua ciangin van pan meikuang kiasuaka bupa le a miteng a kangtum hi.

¹¹Tua khitteh kumpipa in Elijah kiangah mi sawmnga le bu dang khat a sawl hi. Bupa in amah kiangah, "Pasian mipa aw, kumpipa in, ‘Hong paisuk pah hen,’ ci hi," a ci hi.

¹²Elijah in, "Kei Pasian mi khat ka hileh van panin meikuang hong kiasuk henla nang le na mi sawmngate hong kangtum hen’" ci-in a dawng hi. Tua ciangin van panin Pasian meikuang kia-a amah le a mi sawmngate a kangtum hi.

¹³Tua ciangin kumpipa in a thumna bupa le a mi sawmnga a sawl hi. Hih a thumna bupa paito a, Elijah mai-ah a khukdin hi. Amah in, "Pasian mipa aw, na nasemte keima nuntakna le hih mi sawmngate nuntakna hong thusimsak in!

¹⁴En in, van panin meikuang kia-a, a masa bu nih le amau mite khempeuh a kangtum uh hi. Ahi zongin tu-in ka nuntakna hong thusimsak in!" ci-in a ngen hi.

¹⁵TOPA vansawltak in Elijah kiangah, "Amah tawh tonsuk in; amah kihta kei in," a ci hi. Tua ciangin Elijah dinga amah tawh kumpipa kiangah a paikhawm uh hi.

¹⁶Kumpipa kiangah, "TOPA gen hih ahi hi: Ekron pasian Baal-Zebub thu dongin kamtaite na sawl, Israel sungah Pasian om lo ahi hiam? Hici-a hih khin na hi manin tu-a na lupna na kan ngei nawn kei ding hi. Na si taktak ding hi," a ci hi.

¹⁷Tua ciangin Elijah gensa TOPA thu tawh kizui-in amah a si hi. Ahaziah in tapa nei lo ahi manin Judah kumpipa Jehoshaphat tapa Jehoram a kum nihna kumin Joram a[1] in luaha kumpi a suak hi.

¹⁸Ahaziah in a uk sungin thupiang dangte khempeuh le ama sepsate Israel kumpite khangthu ciamtehna laibu sungah kigelh hi lo ahi hiam?