Read Zokam 2 Kumpite 10 Bible Online

2 Kumpite 10 - Zokam bible

2 Kumpite 10

¹Tua hun laitakin Samaria ah Ahab innkuante tapasal sawm sagih a om hi. Tua ciangin Jehu in lai gelhin Samaria ah: Jezreel c[24] uliante, upate le Ahab tate a kemte tungah a khak hi. Amah in,

²"Hih laikhak na ngah phetun, na pu uh tapate no tawh om khawma, sakol-lengte le sakolte, kulha ki-um khuapi le galhiamte nei na hi nungsangun,

³na pu uh tapate a hoih le a kituak penpen teel unla a pa kumpi tokhom ah tusak un. Tua ciangin na pu innkuante adingin sim un," a ci hi.

⁴Ahi hangin amaute patau uh a, "Kumpi nih in amah nang zo lo ahileh en bang lawh ding i hi hiam?" a ci uh hi.

⁵Tua ciangin kumpi-inn ukpa, khuapi ukpa le upate le mite a kemte in Jehu kiangah: "Kote nangma nasem ka hi uh a, na gen peuhpeuh ka hih ding uh hi. Kuamah kumpi in ka koih kei ding uh hi; nangmah in hoih na sak pen hih in," ci-in thu a puak uh hi.

⁶Tua ciangin Jehu in amaute tungah anihna lai khak a, "Kei lamah na pan uh a ka thu nong man uh leh na pu uh tapate lutang hong puak in zing ciang tu bang hunin Jezreel ah ka kiangah hong pai ta un," ci-in a gelh hi. Tua laitakin kumpi tapa sawm sagihte, amau a khansuah khuapi sunga mi minthangte tawh a om uh hi.

⁷Laikhak a tun ciangin, hih mite in kumpi tapate la-a, a sawmsagihin a tawl-at khin uh hi. Amaute in a lutangte uh bawmin guang uh a, Jezreel a Jehu a khak uh hi.

⁸Thupuakpa a tun ciangin Jehu kiangah, "Amaute in kumpi tapate lutangte hong puak khin uh hi," ci-in a gen hi. Tua ciangin Jehu in, "Khuapi lutna kongpi-ah zingsang dong gual nihin koih un," ci-in thu a pia hi.

⁹A zingciang zingsangin Jehu a paikhia hi. Amah mipi khempeuh mai-ah dinga, "Note na mawhpeng uh hi. Ka pu sawmsimin ka that hi; ahi hangin hihte kua thah ahi hiam?

¹⁰Tua ahi ciangin thei un, Ahab innkuan langah TOPA gensa kam khat zong a kipelh kei ding hi. TOPA in a nasempa Elijah tawna a gensa a sem khin hi," a ci hi.

¹¹Tua ciangin Jehu in Jezreel a omlai Ahab innkuan peuhmah - ama uliante, a kilawm-takpihte le a siampite khempeuh tawh thatkhawm-a, sit a nei kei hi.

¹²Tua ciangin Samaria lam manawh in Jehu a pai hi. Tuucingte omna Beth Eked ah

¹³Judah kumpi Ahaziah tanaute pawlkhat tawh kituak-a, "Kua na hi uh hiam?" ci-in a dong hi. Amaute in, "Ahaziah tanaute ka hi uh hi; kumpipa innkuanpihte le kumpinu’ nu hopih dinga hong paisuk ka hi uh hi," a ci uh hi.

¹⁴Amah in, "A hingin man un," ci-in thu a pia hi. Tua ciangin amaute in a hingin man uh a, Beth Eked tuikhuk ah a golum uh hi - pasal sawm li le nih ahi hi. Khat beek a sit kei uh hi.

¹⁵Tua lai a nusiat khit ciangin Recab tapa Jehonadab kiangah paito a, amah in lampi ah a na dawn hi. Jehu in amah hopih in, "Nang tunga ka lungkim bangin kei tungah na lungkim hiam?" a ci hi. Jehonadab in, "Ka lungkim hi," ci-in a dawng hi. Jehu in, "Tua ahileh na khut hong khak in," a ci hi. Tua ciangin a cih bangin hih a, Jehu in sakolleng tungah amah a kaito hi.

¹⁶Jehu in, "Kei hong zui inla TOPA adingin ka aamna mu in," a ci hi. Tua ciangin amah a sakolleng sungah a tuang-sak hi.

¹⁷Samaria ah Jehu a tun ciangin, Ahab innkuanpih tua lai-a kinusia khempeuh that hi; TOPA in Elijah tunga a gensa thu tawh kizui-in amaute a susia hi.

¹⁸Tua ciangin Jehu in mipi khempeuh kikhawmsak a, "Ahab in Baal na tawmkha bek sem hi. Jehu in tampi a sem ding hi.

¹⁹Tu-in Baal kamsangte khempeuh, amau nasem teng le a siampi teng uh kaikhawm un. Khatbeek kisamsak kei un, bang hang hiam cih leh Baal biakna lianpi khat ka bawl ding hi. Hong pai lo peuhmah kihingkhawi lo ding hi," a ci hi. Ahi hangin Jehu in Baal nasemte a suksiat nadingin a lehbawlna ahi hi.

²⁰Jehu in, "Baal pahtawina-in mihon kikhawmsak un," a ci hi. Tuaci-in amaute a tangko uh hi.

²¹Tua ciangin amah Israel gambup ah thu zasak-a, Baal nasemte khempeuh pai hi; khat beek a kisit kei hi. Baal biakinn sung mong khat pan mong khat a dim dongin a sungah lut uh hi.

²²Tua ciangin Jehu in puan koihna inndei cingpa kiangah, "Baal nasem khempeuh ading puantual hong la in," a ci hi. Tua ciangin amaute ading puantual a lakhia hi.

²³Tua ciangin Baal biakinn sungah Jehu le Recab tapa Jehonadab a pai uh hi. Jehu in Baal nasemte kiangah, "En kawikawi le uh cin, TOPA nasem khat beek no tawh a om kei hi - Baal nasem bekbek na hi uh hi," a ci hi.

²⁴Tua ciangin biakna pia ding le meihal biakna hal dingin amaute a lut uh hi. Tua laitakin Jehu in a pualam ah mi sawmgiat koihin: Note khut sunga ka koih mi a khahsuah na om uh leh ama nuntakna no aa in sawng ding hi," ci-in a vauhilh hi.

²⁵Jehu in meihal biakna a piak khit phetun a cingte le a uliante thu pia a; "A sungah lut unla amaute that un; khat beek suaktasak kei un," a ci hi. Tua ciangin amaute in namsau in a vat puk uh hi. A cingte le uliante in a luangte uh lawnkhia uh a, Baal biakinn sunga biakbukno sungah a lut uh hi.

²⁶Amaute in Baal biakinn sung panin suang siangthote lakhia-in a hal uh hi.

²⁷Amaute in Baal suang siangthote susia uh a, Baal biakinn phelkhia in, mite in tuni dong ekbuk in a zang uh hi.

²⁸Tua bangin Jehu in Israel sungah Baal biakna a susia hi.

²⁹Tua hi napi Nebat tapa Jeroboam in mawhna bawla Israel zong a bawlsakte - Bethel le Dan ah kham bawngnote biakna panin a kiheisan kei hi.

³⁰Jehu kiangah TOPA in, "Keima mitmuh in a maana na nasep na zawhna hang le ka lungsima sep ka sawm khempeuh Ahab innkuan tungah sem na hi manin nangma suante Israel kumpi tokhom tungah khang lina dong a tu ding hi," a ci hi.

³¹Tua hi napi Jehu in TOPA, Israel Pasian thukham a lungsim khempeuhin zuih ding a kidawm kei hi. Jeroboam mawhnate Israel zong a bawlsak mawhnate panin a kikhel tuan kei hi.

³²Tua hunin TOPA in Israel kiamsak ding a kipan ta hi. Hazael in Israel gam sung khempeuh,

³³Gilead gam sung khempeuh Jordan nisuahna dong (Gad kual, Reuben le Manasseh) ciang, Arnon Ciangpi gei-a om Aroer panin Gilead le Bashan dong a zo khin hi.

³⁴Jehu in a uk sung thupiang dangte,ama septe khempeuh le ama matutsa khempeuh Israel kumpite khangthu ciamtehna laibu sungah kigelh hi lo ahi hiam?

³⁵A pate tawh Jehu tawlnga khawm a Samaria ah kivui hi. Tuateh a tapa Jehoahaz in luah a kumpi a suak hi.

³⁶Jehu in Samaria ah Israel a uk hun sung kum sawmnih le giat ahi hi.