Read Zokam 2 Kumpite 12 Bible Online

2 Kumpite 12 - Zokam bible

2 Kumpite 12

¹Jehu a maan zawh kum sagihna kumin Joash b[29] kumpi suaka, Jerusalem ah kum sawmli sung a uk hi. A nu min Zibiah hi a; Beersheba pan ahi hi.

²Siampi Jehoiada in a lamlah sungteng TOPA mit ah Joash thumaanin a gamta hi.

³Ahi zongin munsangte kikhinkhia lo a; mite in tua lai-ah biakna pia-in gimnamtui a hal veve uh hi.

⁴Joash in siampite kiangah, "TOPA biakinnpi ah a siangthoin biakna-a kipia sumte - mi kisim huna kikhawm sumte, mimal kiciamna pana kingah sumte le utthu-a biakinn-a kipuak sumte khempeuh kaikhawm un.

⁵Sumkemte khat tung panin siampite in sang unla biakinnpi siatna a kimu peuhpeuh puahna-in kizang hen," a ci hi.

⁶Ahi hangin Kumpipa Joash a kum sawmnih le thumna kum dong siampite in biakinnpi a puah nai kei uh hi.

⁷Tua ahi ciangin Kumpipa Joash in siampi Jehoiada le siampi dangte sama, "Bang hangin biakinnpi kisiatnate puah lo na hi uh hiam? Na sumkemte uh tung panin sum lak beh nawn kei unla biakinnpi puah nadingin ap un," a ci hi.

⁸Siampite in mite tungah sum don nawn loh nading le biakinnpi amau le amau in a puah loh ding a thukim uh hi.

⁹Siampi Jehoiada in singkuang khat la-in a sin a vangsak hi. Amah in biakna-tau gei TOPA biakinnpi sung lutna a taklam pangah tua a koih hi. TOPA biakinnpi-a kipuak khempeuh siampi kongcingte in singkuang sungah a koih uh hi.

¹⁰Singkuang sungah sum tam omta cih a muh hunhun un kumpipa thuvanpipa le tulpipa in TOPA biakinnpi-a kipuaksa sumte sim uh a ip sungah a seng uh hi.

¹¹A sum phazah a ciatsak khit ciangin biakinn sepna vaan dinga kisehpa tungah a pia uh hi. Tua tawh biakinnpi semte - khutsiamte, biakinn lamte,

¹²suang ciangte le suang atte a guai uh hi. Amaute in TOPA biakinnpi puah nadingin sing le suang zepsate lei uh a, TOPA biakinnpi a ngeina batsak nading khempeuh ah a zang uh hi.

¹³Biakinnpi sunga kipuak sumte, ngun tuikuangte, taitehte, tui thehna kuang-ukte, pengkulte le TOPA biakinnpi sunga ngun le kham a kibawl vanzatte leina in kizang lo hi;

¹⁴nasemte tungah tua kipia-a, biakinnpi puahna-in a zang uh hi.

¹⁵Amaute in thumaantakin na sem uh ahi manin nasemte tungah sum a piakna uh sum sazian a ngen nawn kei uh hi.

¹⁶Mawhna hanga biaknate le khialhna hanga biakna sumte TOPA biakinnpi ah kipuak lo hi; tuate siampite aa ahi hi.

¹⁷Hih hun laitakin Aram kumpipa Hazael kuanto-a Gath simin a la hi. Tua ciangin Jerusalem sim dingin a kihei hi.

¹⁸Ahi hangin Judah kumpipa Joash in Judah kumpi sem a pate - Jehoshaphat, Jehoram le Ahaziah-te in a apsa uh a siangtho nate khempeuh - le amahmah in a apsa letsongte le TOPA biakinnpi sung le kumpi-inn sunga sumkholna-a om khamte khempeuh Aram kumpipa Hazael khak ahi manin Jerusalem panin a kileh kik hi.

¹⁹Joash in a uk sunga thupiang dangte le ama sepsate khempeuh Judah khangthu ciamtehna laibu sungah kigelh hi lo ahi hiam?

²⁰A uliante in amah sawmsim uh a, Silla zuatsukna lampi-a Beth Milloah ah a suam lum uh hi.

²¹Amah a that uliante pen: Shimeath tapa Jozabad le Shomer tapa Jehozabad ahi hi. Amah si-a David Khuapi ah a pate tawh a kivui khawm hi. Tuateh a tapa Amaziah in luah a kumpi a suak hi.