Read Zokam 2 Kumpite 14 Bible Online

2 Kumpite 14 - Zokam bible

2 Kumpite 14

¹Israel kumpipa Jehoahaz tapa Jehoash a[32] a kum nihna kumin Judah kumpi Joash tapa Amaziah in uk ding a kipan hi.

²Amah kumpi a suahin kum sawmnih le nga pha a, Jerusalem ah kum sawmnih le kua sung a uk hi. A nu min Jehoaddin hi a; amah Jerusalem pan ahi hi.

³Amah TOPA mit ah amaanin gamta napi a pa David aa zah ahi kei hi. Na khempeuh ah a pa Joash lamlah bangin a zui hi.

⁴Ahi zongin munsangte kikhinkhia tuan lo hi; mite in tua lai-ah biaknate pia-in gimnamtui a hal veve uh hi.

⁵Amah in kumpigam kiptakin a letkip khit ciangin, a pa kumpipa a that uliante a that hi.

⁶Tua hi napi Moses Thukham Laibu sunga TOPA thupiakna: "Amau tate hangin pate kithat lo dinga, amau pate hangin tate a kithat kei ding hi, mikim, ama mawhna hangin si ding hi." b[33] ci-a kigelh tawh kizui-in misuamte tapate a that kei hi.

⁷Amah Ci Kuam a om Edom-te tulsawm a zopa hi-a, Sela simin zo a, Joktheel min a phuak hi; tuni dongin tua mah minin a nei lai hi.

⁸Tua ciangin Amaziah in Israel kumpipa, Jehu tapa, Jehoahaz tapa, Jehoash kiangah kamtai sawla, "Hong kuan un, kimaituah mah ni," ci-in a tosak hi.

⁹Ahi hangin Israel kumpipa Jehoash in Judah kumpipa Amaziah kiangah, "Lebanon a thangling kung khat in Lebanon a tamtak kung khat kiangah, "Ka tapa zi dingin na tanu hong pia in," ci-in thu a khak hi. Tua ciangin Lebanon a gamsa khat pai-in thangling kung a khe nuai-ah a tuangawp hi.

¹⁰Edom na zo takpi-a tu-in na kiphasak hi. Na gualzawhna thangsak lel inla inn ah om hithiat in! Bang hangin lungkham nading zonga, nang le Judah zong a kiat nading zong na hi hiam?" ci-in a thuk hi.

¹¹Ahi zongin Amaziah in mang nuam lo a, tua hangin Israel kumpipa Jehoash in a sim hi. Judah a Beth Shemesh ah amah le Judah kumpipa Amaziah khat le khat a kimaituah uh hi.

¹²Israel in Judah zo a, mi khempeuh amau inn ciatah a taikek uh hi.

¹³Israel kumpipa Jehoash in Beth Shemesh ah Ahaziah tapa, Joash tapa Judah kumpipa Amaziah a zo hi. Tua ciangin Jerusalem ah Jehoash pai-a, pi zaguk bang a sau c[34] - Jerusalem kulh Ephraim Kongpi panin Kiukawi Kongpi dong a susia hi.

¹⁴Amah in ngun le kham khempeuh le TOPA biakinnpi sung le kumpi-inn sunga sumkholnate sunga a kimu vanzatte khempeuh a la hi. Amah in luangkhamna mite zong tonpih a Samaria ah a ciah hi.

¹⁵Jehoash uk sunga thupiang a dangte, le ama sepsa le a matutsate le Judah Kumpipa Amaziah tawh a kidonate a kipan Israel kumpite khangthu kigelhna laibu sungah kigelh khawm lo ding ahi hiam?

¹⁶Jehoash a pate tawh tawlnga khawm a, Israel kumpite tawh Samaria ah kivui khawm hi. Tuateh a tapa Jeroboam in a za luah a kumpi a suak hi.

¹⁷Israel kumpipa Jehoahaz tapa Jehoash a sih nung kum sawm le nga sung Judah kumpipa Joash tapa Amaziah a nungta lai hi.

¹⁸Amaziah uk sunga thupiang dangte Judah kumpite khangthu ciamtehna laibu sungah kigelh hi lo ahi hiam?

¹⁹Amaute in Jerusalem ah amah sawmsim uh a, amah Lachish ah a tai hi; ahi hangin amaute in Lachish ah mi nungdelhsak uh a tua lai-ah a that uh hi.

²⁰Amah sakol-in pua kik uh a, David Khuapi Jerusalem ah a pate tawh a kivuikhawm hi.

²¹Tua ciangin Judah mi khempeuh in kum sawm le guk a pha Azariah, a[35] a pa Amaziah munah kumpi in a koih uh hi.

²²Amaziah a pate tawh a tawlngak khitin amah in Elath lam kika, Judah gam a suaksak kik hi.

²³Judah kumpipa Joash tapa Amaziah uk a kum sawm le nga kumin Israel kumpipa Jehoash tapa Jeroboam, Samaria ah kumpi suak a, kum sawmli le khat sung a uk hi.

²⁴Amah TOPA mit ah a sia-in gamta a, Nebat tapa Jeroboam in mawhna bawla Israel zong a bawlsakte panin a kiheisan kei hi.

²⁵Gath Hepher pana kamsangpa Amittai tapa ama nasempa Jonah tungah TOPA Israel Pasian genna tawh kizui-in Israel gamgite Lebo b[36] Hamath panin Arabah c[37] Tuipi dong a ngei a bangsakpa amah ahi hi.

²⁶Israel sunga om sila, sila lo, mikim in a thuak uh a sah luat lam TOPA in mu khina, amaute huh ding kuamah a om kei hi.

²⁷Tua hi-a TOPA in vantung nuai panin Israel min phiatkhiat ding a gen loh nungsang-in, amah in Jehoash tapa Jeroboam khutin amaute a honkhia hi.

²⁸Jeroboam uk hun sungin thupiang dangte le ama sepsa khempeuh le galsima amatutsate khempeuh Yaudi-te d[38] neihsa Damascus le Hamath, Israel adingin a ngah kikna-a kipan, Israel kumpite khangthu ciamtehna laibu sungah kigelh khin hi lo ahi hiam?

²⁹Israel kumpite ahi a pate tawh Jeroboam a tawlnga khawm hi. Tuateh a tapa Zechariah in a za luaha kumpi a suak hi.