Read Zokam 2 Kumpite 17 Bible Online

2 Kumpite 17 - Zokam bible

2 Kumpite 17

¹Judah kumpipa Ahaz a kum sawm le nihna kumin Elah tapa Hoshea Samaria ah Israel kumpi suaka kum kua sung a uk hi.

²Amah TOPA mit ah a sia-in a gamtat hangin ama ma-a Israel kumpite a bang kei hi.

³Hoshea sim dingin Assyria kumpipa Shalmaneser a kuanto hi; Hoshea pen Shalmaneser inntengpa hi-a amah siah a pia zo hi.

⁴Ahi hangin Hoshea in Egypt kumpipa So a[50] kiangah palaite sawl khina Assyria kumpipa tungah kum sima a piak siah puak nawn lo-in amah a lehtatna Assyria kumpipa in a phawkkhia hi. Tua ahi ciangin Shalmaneser in amah mana thong sungah a khum hi.

⁵Assyria kumpipa in gam bupin sima, Samaria do-in pai-a kum thum sung a umcihsak hi.

⁶Hoshea a kum kuana kumin Assyria kumpipa in Samaria la zo a, Israel-te Assyria ah a nawhkhia hi. Amaute Halah, Habor Gunpi tunga Gozan le Medes khuapite ah a tengsak hi.

⁷Bang hangin hih teng piang hiam, cih leh Egypt kumpipa Pharaoh khutnuai Egypt panin amaute a paikhiatpih a Pasian uh TOPA tungah Israel-te a mawh uh hi. Amaute in adang pasiante bia uh a,

⁸Israel kumpite in a lamlahsa uh gamtatnate zui in TOPA in amaute mai-a a hawlkhiat minamte gamtat bangin a gamta uh hi.

⁹Israel-te TOPA amau Pasian tungah amaan loin simtat uh hi. Amaute in galvilna bukte a kipan kulh a ki-um khuapite dongin amaute khuapite khempeuh ah amau adingin munsang a lam uh hi.

¹⁰Amaute in suang siangthote le Asherah khuamte mualsang khempeuh le sing hiangzau nuai khempeuh ah a phut uh hi.

¹¹TOPA in amaute mai-a a hawlkhiat minamte hih bangin munsang omna peuhpeuh ah gimnamtui a hal uh hi. Amaute in a hoih lo gamtatna tawh TOPA phinin a hehsak uh hi.

¹²TOPA in, "Hih na na sem peuhmah kei ding uh hi," b[51] ci napi amaute in milimte a bia uh hi.

¹³TOPA in ama kamsangte le thumute khempeuh tungtawnin Israel le Judah vauhilh a: "Na gitlohnate panun kikhel un. Na pate un aman dingin ka piak thukham khempeuh tawh kituakin a man ding uh le ka nasem kamsangte tungtawnin no tungah kong theihsak ka thupiakte le ka thukipte zui un," a ci hi.

¹⁴Ahi hangin amaute in thu ngai lo uh a, TOPA amaute Pasian a muang lo a pate uh bangin ngawng khauh uh hi.

¹⁵Amaute in a pate uh tawh a bawl ama thukipte, a thukhunte le a vauhilhnate a nial uh hi. Amaute in kimanna nei lo milimte zui uh a, amau mah kimanna nei lo a suak uh hi. TOPA in amaute tungah, "Amaute hih bangin hih kei un," ci-in thu pia napi amaute in a kim a pam ua om minamte sun uh a, TOPA in amaute sep ding a khamte a sem uh hi.

¹⁶Amaute in TOPA amaute Pasian thupiakte khempeuh taisan khin uh a, amau mahmah in bawngno lim kisung milim nih le Asherah khuam a bawl uh hi. Aksi honpite khempeuh lamah kunin Baal a bia uh hi.

¹⁷Amaute in a tanu a tapate uh mei sungah c[52] biakna-in a pia uh hi. Amaute in aisan in khongkhai uh a, TOPA mit ah gitlohna sem dingin amau mah kipia tawm uh a, amah phinin a hehsak uh hi.

¹⁸Tua ciangin Israel tungah TOPA heh mahmah a, ama omna panin a hemkhia hi. Judah beh bek om lai-a,

¹⁹Judah nangawn in TOPA amaute Pasian thupiakte a zui kei hi. Amaute in Israel bawlsa gamtatnate a zui zaw uh hi.

²⁰Tua ahi ciangin TOPA in Israel khempeuh nial hi; amaute hingimsakin, ama ompihna pan a hepkhiat dongin amaute a sutgawpte khut sungah a pia hi.

²¹Amah in David innkuan panin Israel a balkhiat ciangin amaute in Nebat tapa Jeroboam kumpi in a nei uh hi. Jeorboam in TOPA zuihna panin Israel zolkhia a, a mawhna lianpi a bawlsak hi.

²²Jeroboam mawhnate khempeuh Israel-te in zomsuak uh a, tuate a taisan kei uh hi.

²³TOPA in a nasem kamsangte khempeuh tawnin a vauhilhsa bangin ama ompihna panin a hepkhiat mateng a tuaci gamtat uh hi. Tua ahi ciangin Israel mite amau gam leitang panin Assyria ah salin kikai-a, amaute tua lai-ah a om lai uh hi.

²⁴Assyria kumpipa in Babylon, Cuthah, Avva, Hamath le Sepharvaim-te pan amite Israel-te mun a luah dingin Samaria khuapite ah a puak hi. Amaute in Samaria luah khin uh a, amaute khuapite ah a teng uh hi.

²⁵Amaute tua lai-ah a ten masak lai-un TOPA a bia kei uh hi; tua ciangin amah in amaute lakah humpi sawla tuate in mi pawlkhat a that hi.

²⁶Tua thu Assyria kumpipa tungah kizasak a: "Samaria khuapite sungah na puak a, na tensak mite in tua gama pasian in bang deih hiam cih a thei kei uh hi. Amah in mite lakah humpite sawla, mite in ama kisap thei lo uh ahi manin tuate in amaute that hi," a ci hi.

²⁷Tua ciangin Assyria kumpipa in, "Samaria panin sal-a na kaih uh siampite khat tua lai-ah tengsak kik unla, tua gam a pasian in bang deih hiam cih mite hilhsak un," ci-in thu a pia hi.

²⁸Tua ciangin Samaria panin sal-a kikai siampite khat pai-in Bethel ah tenga amaute in TOPA a biak ding zia uh a hilh hi.

²⁹Tua hi napi khuapi tuamtuam a amaute tenna uh ah amau minam ciat in pasiante bawl uh a, Samaria mite in a bawlsa uh munsanga biakbuknote ah a koih uh hi.

³⁰Babylon pana mite in Succoth Benoth bawl uh a, Cuthah pana mite in Nergel bawlin Hamath pana mite in Ashima a bawl uh hi;

³¹Avvi-te in Nibhaz le Tartak bawl uh a, Sepharvaim-te in Sepharvaim pasiante ahi Adramme-lech le Anammelech biakna-in a tate uh mei-in a hal uh hi.

³²Amaute in TOPA bia napi munsang tunga biakbuknote ah siampi nasem dingin amau miciat mi namkim a koih uh hi.

³³Amaute in TOPA bia napi amaute a kipuak khiatna minamte ngeina tawh kizui-in amau pasiante ciat na a sem uh hi.

³⁴Tuni dongin amaute in a hihsa uh a zomsuak uh hi. Amaute in TOPA lah bia lo, TOPA in Israel min a phuah Jacob suante tunga a piak thukipte, zuih ding ngeinate, thukhamte le thupiakte lah a zui tuan kei uh hi.

³⁵TOPA in Israel tawh thukhun a bawl lai-in amaute tungah: "Adang pasian khatpeuh bia loin a mai-ah kun kei unla, a na sem loin amaute tungah biakna pia kei un.

³⁶Ahi hangin a thahat a vangliatna le a zankhiat a banin Egypt pana hong paikhiatpih TOPA bek na biak pelmawh ding uh ahi hi. Ama tungah na kun ding uh a, ama tungah biakna na pia ding uh hi.

³⁷Amah in note adingin a gelh thukipte, zuih ding ngeinate, thukhamte le thupiakte limtakin na zui tawntung ding uh hi. Adang pasiante bia kei un.

³⁸Note tawh ka bawl thukhun mangngilh kei unla, pasian dangte bia kei un;

³⁹TOPA note Pasian bia un, na galte khempeuh uh khut panin hong hukhia ding pa amah ahi hi," a ci hi.

⁴⁰Tua hi napi amaute in thu ngai lo uh a, a ma-a a hihsate mah uh zomsuak uh hi.

⁴¹Hih mite in TOPA a biak kawmkawmun amau milimte na a sem uh hi. Tuni dongin a tate uh le a tute un a pate uh sep bangin a zomsuak lai uh hi.