Read Zokam 2 Kumpite 18 Bible Online

2 Kumpite 18 - Zokam bible

2 Kumpite 18

¹Israel kumpi Elah tapa Hoshea a kum thumna kumin Judah kumpi Ahaz tapa Hezekiah in uk ding a kipan hi.

²Amah kumpi a suah in kum sawm nih le nga pha a, Jerusalem ah kum sawm nih le kua sung a uk hi. A nu min Abijah a[53] hi a, Zechariah tanu ahi hi.

³Amah in a pa David hihsa bangin TOPA mit ah a maanin gamta hi.

⁴Amah in munsangte phiatkhia-a, suang siangthote dengzanin Asherah khuamte phuktan hi. Israel-te in Moses bawlsa sumngo gul ah tua hun dong gimnamtui va hal uh ahi manin amah in tua zong a sunen hi. (Tua pen Nehushtan b[54] kici hi) c[55]

⁵Hezekiah in TOPA Israel Pasian a muang hi. Ama nung le ama ma-a Judah kumpite khempeuh lakah amah bang a om kei hi.

⁶Amah in kiptakin TOPA lena, tawpsan loin amah zui den hi; TOPA in Moses a piaksa thupiakte a zui hi.

⁷Tua hi-a TOPA in amah ompih in; a hihna peuh ah a lawhcing hi. Amah in Assyria kumpipa lehdo-a a na a sepsak kei hi.

⁸Galvilna tausang panin kulha ki-um khuapi, Gaza le a ukna gam ciang dong tua gam sungah Philistia-te a zo hi.

⁹Kumpi Hezekiah a kum lina in Israel kumpi Elah tapa Hoshea a kum sagihna hi-a, Samaria sim dingin Assyria kumpipa Shalmaneser kuanto-a a umcihsak hi.

¹⁰Kum thum a cin ciangin Assyria-te in a la zo uh hi. Tua hi a Hezekiah a kum gukna kumin Samaria kila zo a, tua kum Israel kumpi Hoshea a kum kuana ahi hi.

¹¹Assyria kumpipa in Assyria ah Israel nawhkhia a amaute Halah, Habor Gunpi tunga Gozan le Medes khuapite ah a tengsak hi.

¹²Bang hangin hih bang piang hiam cih leh amaute in TOPA a Pasian uh thu mang lo uh a, ama thukhun - TOPA nasem Moses thupiak khempeuh a palsat uh hi. Amaute in thupiakte ngai loin tuate a zui kei uh hi.

¹³Hezekiah uk khit a kum sawm le lina kum in Assyria kumpipa Sennacherib in Judah gama kulh nei khuapi khempeuh sima tuate a la zo hi.

¹⁴Tua ciangin Judah kumpipa Hezekiah in Lachish a om Assyria kumpipa kiangah, "Ka khial zo hi. Kei kiang panin nungkik in, kei tungah nong kalh peuhpeuh kong puak ding hi," ci-in kamtai a paisak hi. Assyria kumpipa in Judah kumpipa Hezekiah tung panin ngun talent zathum d[56] le kham talent sawmthum e[57] a kal hi.

¹⁵Tua ciangin Hezekiah in TOPA biakinnpi sung le kumpi-inn a sumkholnate sunga a kimu ngun khempeuh a pia hi.

¹⁶Hih hunin Judah kumpi Hezekiah in TOPA biakinnpi kongpite le kongmungte kituamna khamte hawkkhia-a Assyria kumpipa a pia hi.

¹⁷Assyria kumpipa in a galkapmang lianpen, a ulian makaipa le galkap mangpipa tawh galkap tampitak Lachish panin Jerusalem a Kumpi Hezekiah kiangah a paisak hi. Amaute Jerusalem ah tung uh a, Puansawppa Lo zuatna Bual Tungnung tuilakna ah a khawl uh hi.

¹⁸Amaute in kumpipa samsak uh hi; kumpi-inn sung saipipa Hilkiah tapa Eliakim, thuvanpipa Shebna le Asaph tapa thuciamtehpa Joah amaute kiangah a paikhia uh hi.

¹⁹Galkap mangpipa in amaute kiangah, "Hezekiah tungah gen un: "‘Hih in a lian kumpi, Assyria kumpipa gen ahi hi: Na kimuanna uh bang siksan na hi uh hiam?

²⁰Note in galsiamna le galhatna ka nei uh hi, na ci uh hi - a hawmpi a pau bek na hi uh hi. Kua muangin kei hong lehdo na hi uh hiam?

²¹Tu-in en un, note in a tungah na kingap uh leh na khut uh hong sunletin hong liamsak ding pumpeeng kitamsa ciangkhut tawh a kibang Egypt-te a muang na hi uh hi. Egypt kumpipa Pharaoh lah ama tungah kingate tungah a tuaci mah ahi hi.

²²Tua hi-a kei tungah, "TOPA, kote Pasian tungah ka kinga uh hi," nong cih uh leh - amah Hezekiah in munsangte le biakna-taute lakhia in Judah le Jerusalem tungah, "Jerusalem a hih biakna-tau mai-ah na bia pelmawh ding uh hi," ci hi lo ahi hiam?

²³"‘Tu-in hong pai unla ka pu Assyria kumpipa tawh thukimna khat bawlin: a tunga tuang ding na ngah nak uh leh sakol tul nih kong pia ding hi.

²⁴Egypt-te sakollengte le sakoltuangte a[58] tunga a kinga na hi tazen uh leh ka pu uliante a neu pen zong nang zo ding na hi uh hiam?

²⁵Tua ban lai-ah, TOPA kiang pana thu loin hih mun susia dingin hong kuan ka hi hiam? TOPA mahmah in kuankhia dingin hih gam doin a susia dinga hong gen ahi hi,’ ci-in gen un," a ci hi.

²⁶Tua ciangin Hilkiah tapa Aliakim le Shebna le Joah in galkap mangpipa tungah, "Nong hehpihna-in na nasemte in tel kahi manun Aram kamin hong pau in. Kulh tunga mite zakin Hebrew kamin ko hong hopih kei in," a ci uh hi.

²⁷Ahi hangin galkap mangpipa in, "Na pu le no tung bekah hih thu genin hong sawla kulh tunga tute tungah gen dingin ka pu in hong sawl lo ahi hiam - nomau mah bangin amau ek amau mah in ne a, amau zun a dawn ding hi lo ahi hiam?" ci-in a dawng hi.

²⁸Tua ciangin a galkap mangpipa dingto in Hebrew kamin awng a:" A lian mahmah kumpi, Assyria kumpipa thugen za un!

²⁹Kumpipa gen hih ahi hi: "Note, Hezekiah kikhemsak kei un. Amah in kei khut panin note hong hu zo lo ding hi.

³⁰Hezekiah in note tungah, ‘TOPA in eite hong hukhia taktak ding hi, Assyria kumpipa khutah hih khuapi kipia peuhmah lo ding hi,’ ci-in TOPA muang dingin hong zol hangin kizolzosak kei un.

³¹"Hezekiah thu ngai kei un. Assyria kumpipa gen hih ahi hi: Kei tawh kilemna bawl unla ka kiangah hong paikhia un. Tua hileh note in na lenggui pan uh le na theikung panun na ne ding uh a, nomau tuidum ah tui dawnin

³²keimah note kiangah kong pai mateng no leitang tawh a kibang antang le zuthak omna, anlum le lenggui-lo omna olive kungte le khuaizu omna gamah kong puak ding hi. Nuntakna teel unla sihna teel kei un. "Hezekiah thu ngai kei un, amah in, ‘TOPA in eite hong hu ding hi,’ a cih ciangin hong makaih khial ahi hi.

³³Minamte khatpeuh pasian in Assyria kumpipa khut panin a gam hukhia ngei ahi hiam?

³⁴Hamath le Arpad pasiante koi-ah om ahi hiam? Sepharvaim, Hena le Ivvah pasiante koi-ah om ahi hiam? Amaute in kei khut panin Samaria hukhia ahi hiam?

³⁵Hih gamte’ pasiante khempeuh pan a kua penin kei kiang panin a gam honkhia thei ahi hiam? Tua ahileh TOPA in kei khut panin Jerusalem bangci hut thei ding ahi hiam?" a ci hi.

³⁶Ahi hangin mite dai khipkhep uh a, bangmah a dawng kik kei uh hi, bang hang hiam cih leh kumpipa in, "Amah dawng kei un," ci-in thu a piaksa ahi hi.

³⁷Tua ciangin kumpi-inn saipipa Hilkiah tapa Eliakim, thuvanpipa Shebna, thu ciamtehpa Asaph tapa Joah-te puan balkeksa in Hezekiah kiangah pai uh a, galkap mangpipa gensate a ko uh hi.