Read Zokam 2 Kumpite 19 Bible Online

2 Kumpite 19 - Zokam bible

2 Kumpite 19

¹Kumpipa Hezekiah in hih thu a zak ciangin a puante balkek a, ippi silhin TOPA biakinnpi sungah a pai hi.

²Amah in kumpi-inn saipipa Eliakim, thuvanpipa Shebna le siampi makaite, ippi silhsakin Amoz tapa kamsangpa Isaiah kiangah a paisak hi.

³Amaute in ama kiangah, "Hezekiah in: Tuni in lungdon ni, tai thuak ni le maimawl ni hi-a, naungek suah hun tunga hinkhiat nading tha om nawn loh tawh kibat ni ahi hi.

⁴A pu Assyria kumpipa in a nungta Pasian a zahpih dinga a sawl galkap mangpipa thugente TOPA na Pasian in na za henla, TOPA na Pasian in a zaksa thute hangin amah na tai hen. Tua ahi ciangin a omlai sunte pana a baanglaite adingin thu ngen in," ci-in a gen uh hi.

⁵Kumpipa Hezekiah uliante Isaiah kiang a tun uh ciangin,

⁶Isaiah in amaute kiangah, "Na pu uh kiangah gen un: ‘TOPA gen hih ahi hi: ‘Na zaksate uh hangin lau kei un - Assyria kumpipa khutnuai mite kampaute in kei hong simmawh zo hi.

⁷Ngai un! Ama sungah kha khat ka guang dinga, thuzaksakna khat a zak ciangin a gamah ciahin, tua lai-ah amah namsau tawh ka thatsak ding hi,’ ci hi," a ci hi.

⁸Assyria kumpipa in Lachish nusia hi, cih galkap mangpipa in a zak ciangin nungkik a, kumpipa in Libnah a do a mu hi.

⁹Tua laitakin Egypt kumpipa Cush-te Tirhakah amah do dingin kuankhia hi, ci-in Senacherib b[59] in thuzaksakna khat a ngah hi. Tua ciangin amah in Hezekiah kiangah kamtai paisak kik a:

¹⁰"Judah kumpipa Hezekiah kiangah: ‘Assyria kumpipa tungah Jerusalem a kipia kei ding hi,’ a ci na kingakna pasian kikhemsak kei in;

¹¹Assyria kumpite gam khempeuh ah pai-in a susia khin kiuhkeuh hi, cih thu na zak takpisa ahi hi. Tua hileh nang hong kihukhia zo ding ahi hiam?

¹²Ka pute un a suksiatsa minam le pasiante: Gozan, Haran, Rezeph le Tel Assar a om Eden mite’ pasiante in amaute hukhia ahi hiam?

¹³Hamath kumpipa, Arpad kumpipa, Sepharvaim khuapi kumpipa ahikeh Hena le Ivvah kumpite koi-ah om uh ahi hiam?" a cisak hi.

¹⁴Hezekiah in kamtaite tung panin laikhak ngaha a sim hi. Tua ciangin amah TOPA biakinnpi ah paitoin TOPA mai-ah a zaal hi.

¹⁵Tua ciangin Hezekiah in TOPA tungah thu ngen a: "Israel Pasian, cherub-te gel kikal a tokhom tunga tu TOPA aw, leitunga kumpi gam khempeuh tungah nang bek Pasian na hi hi. Leitung le vantung na bawlsa ahi hi.

¹⁶TOPA aw, na bil hong ngat inla za in; TOPA aw na mit hong hak inla mu in; Sennacherib in a nungta Pasian a engkona thute ngai in.

¹⁷"TOPA aw, Assyria kumpite in hih minamte le a gamte uh a suksiat-na uh thuman ahi hi.

¹⁸Amaute pasiante pasian hi loin mite khuta kizem sing le suang pasiante hi lel ahi manin a pasiante uh mei-ah khulin a susia uh hi.

¹⁹Tu-in TOPA kote Pasian aw, leitunga kumpigam khempeuh in nang bek Pasian na hilam a theih nadingun TOPA aw ama khut panin kote hong hukhia in," a ci hi.

²⁰Tua ciangin Amoz tapa Isaiah in Hezekiah tungah thu khak a: "TOPA Israel Pasian thugen hih ahi hi: Assyria kumpipa Sennacherib tawh kisai-a na thunget ka za khin hi.

²¹Ama langkhat a TOPA thugen hih ahi hi: "‘Zion Tanu Bit in nang hong simmawh in hong zahko hi. Jerusalem Tanu in na taikek lai-in a lu hong peisan hi.

²²Na zahko a na simmawh kua ahi hiam? Kua langah na aw sangsak a, kiphasakin na mit tungliik na hi hiam? Israel Siangtho Pa langkhat ai ve leh!

²³Na kamtaite tungtawnin nang in Topa tungah simmawhna na sungvum hi. Tuateh, "Ka sakolleng tampite tawh mualsang liante tung, Lebanon a sangpenna ah ka kahto khin hi. A tamtak sangpente le a taksing hoih pente ka phuk khin hi. A gamla pen dong ka pha khin a, a tulak hoih pen dong ka ban khin hi.

²⁴Gamdangte gamah tuikhukte ka to a, tua lai-ah tui ka dawn hi. Ka khepek nuai-in Egypt-te luite khempeuh ka kangsak hi," na ci hi.

²⁵"‘Za nai lo na hiam, sawtpi a ka kipsaksa ahi hi. Tanglai peka ka geelsa hi; tu huna a tungsak pan ka hi hi; tua in kulha ki-um khuapite suangtum lompi na suahsakna ahi hi.

²⁶Amau mite hatna teng kizawmsak a, cimawhin a maizum uh hi. Amaute, lopaanga singkung note bang, lopa hing seltungte bang, innkhum tunga lopa pote bangin a khankhit ma-un a keu ding uh hi.

²⁷"‘Ahi hangin nangma omna, na sungtumna, na pusuahna le kei nong langdona ka thei hi.

²⁸Kei nong langdona le nong thusimlohna ka bilah hong tung ahi manin, na nak ah ka sikkawi ka bulh dinga, na kamah ka kamkaih vawhin nong kuanna lamah kong kileh kaihsak ding hi,’ ci hi.

²⁹"Hezekiah aw, hih in nang adingin lim hi ding hi: Tu kumin alii pote na ne dinga, a kum nihna teh tuate pana selte na ne ding hi. Ahi hangin a kum thumna ah vawh inla at in, lenggui suan inla a gah ne in.

³⁰Judah innkuan a baanglaite in a nuai-ah zungkha ding uh a, a tunglam ah a gahkik ding uh hi.

³¹Ahang in, Jerusalem panin a baanglaite paikhia-in Zion Vum panin a nungta lai honkhat a paikhia ding uh hi. Thahatpen TOPA aamna in hih a tungsak ding hi.

³²"Tua ahi ciangin Assyria kumpipa tawh kisai-in, TOPA gen hih ahi hi: "Amah hih khuapi sungah lut lo dinga, hih lai-ah thaltang khat zong a kap kei ding hi. Tua mai-ah lum tawisa in hong kuan lo dinga, umcihna phung zong a ciang kei ding hi.

³³Hong kuanna lampi ah ciah kik ding hi; hih khuapi sungah a lut kei ding hi, TOPA in cikhia hi.

³⁴Ka nasempa David le keimah ka kikhualna-in hih khuapi hu in ka honkhia ding hi," a ci hi.

³⁵Tua zanin TOPA vansawltak kuankhia a, Assyria-te giahphual ah mi tul zakhat le tul sawmgiat le tulnga a that hi. A zingciang zingsang mite a thawh uh ciangin - tua lai-ah mi sisa luang khempeuh a na om hi!

³⁶Tua ciangin Assyria kumpipa Senacherib in giahphual phelin a nung kik hi. Amah Nineveh ah ciahin tua lai-ah a om hi.

³⁷Ni khat ama pasian Nisroch biakinn sungah bia-in a om laitakin a tapate Adrammelech le Sharezer in namsau in satpuk uh a, amaute Ararat gam ah tai-in a suakta uh hi. Tuateh a tapa Esarhaddon in a kumpi za luaha kumpi a suak hi.