Read Zokam 2 Kumpite 21 Bible Online

2 Kumpite 21 - Zokam bible

2 Kumpite 21

¹Manasseh kumpi a suah in kum sawm le nih upa a, Jerusalem ah kum sawmnga le nga sung a uk hi. A nu min Hephzibah ahi hi.

²TOPA in Israel-te mai pana a hawlkhiat minamte sep a kihhuaite amah in sema, TOPA mit ah a sia-in a gamta hi.

³A pa Hezekiah in a suksiatsa munsangte lam kik hi; Israel kumpipa Ahab hihsa bangin Baal biak nading taute dawha, Asherah khuam zong a phut hi. Amah aksi honpite lamah kunin tuate a bia hi.

⁴TOPA in, "Jerusalem ah ka min ka koih ding hi," a cihnasa TOPA biakinnpi sungah biakna-taute a dawh hi.

⁵TOPA biakinnpi tualte gel ah aksi honte khempeuh biak nading biaknataute a dawh hi.

⁶Amah in mei sunga hal a[60] dingin biakna-in a tapa pia-a, aisan, khongkhai le vankahte le sikha kamsangte thu a dong hi. Amah in TOPA mit ah a hoih lo tampitak gamta-a, amah phinin a hehsak hi.

⁷Amah in ama bawl a kikhuaksa Asherah khuam la in, TOPA in David le a tapa Solomon tungah, "Israel behte khempeuh pana ka teelkhiatsa hih biakinnpi sung le Jerusalem sungah ka Min ka koih tawntung ding hi.

⁸Amaute in ka thupiaksa na khempeuh limtakin a zuih uh a, ka nasempa Moses in amaute a piak thukham buppi a zuih uh leh a pute uh ka piaksa leitang panin Israel-te khe ka vakkhiasak nawn kei ding hi," a cihna biakinnpi sungah a koih hi.

⁹Ahi hangin mite in a thu a ngai kei uh hi. TOPA in Israel-te mai pana a suksiatsa minamte sangin a hoih lo zaw a gamta dingin Manasseh in lam a khialhpih hi.

¹⁰TOPA in ama nasem kamsangte tungtawnin:

¹¹"Judah kumpipa Manasseh in hih a kihhuai mawhnate a hih khin hi. Ama ma-a Amor-te sangin a siazaw in gamta-a ama milimte tawh Judah mawhna a bawlsak hi.

¹²Tua ahi ciangin TOPA, Israel Pasian gen hih ahi hi: Jerusalem le Judah tungah a za peuhmah bil a vut ding siatna ka tungsak ding hi.

¹³Keimah in Samaria tunga ka zat pikhau le Ahab innkuan tunga ka zat saval-te zangin Jerusalem ka teh ding hi. Mi khatin kuang a nulkhiat bangin Jerusalem ka nulkhia dinga, nul kawmin ka lumlet ding hi.

¹⁴Ka gouluah a baanglaite ka taisan dinga, a galte uh khut sungah ka pia ding hi. A galte khempeuh uh adingin amaute galmat le van kinusia a suak ding uh hi,

¹⁵bang hang hiam cih leh amaute ka muhna ah a sia in gamta uh a, a pute uh Egypt pana a paikhiat ua kipan tuni dong hong phinin hong hehsak uh hi," a ci hi.

¹⁶Tua tham loin, TOPA mit ah amaute a sia-a a gamtat nadingun Judah-te mawhna a bawlsak banah - Manasseh in mawhpengte sisan tampitak luangsaka, Jerusalem mong khat pan mong khat dong a dim hi.

¹⁷Manasseh uk sunga thupiang dangte le ama sepsate, a bawl mawhnate Judah kumpite khangthu ciamtehna laibu sungah kigelh khin hi lo ahi hiam?

¹⁸Manasseh a pate tawh tawlnga khawm a, ama kumpi-inn huang Uzza huanah a kivui hi. Tuateh ama tapa Amon in a kumpi za luah a kumpi a suak hi.

¹⁹Amon kumpi a suahin a kum sawmnih le nih pha a, Jerusalem ah kum nih sung a uk hi. A nu min Meshullemeth hi a, Haruz tanu hi-in Jotbah pan ahi hi.

²⁰Amah in a pa Manasseh hihsa bangin TOPA mit ah a sia in a gamta hi.

²¹A pa totsa lampi teng tawn hi; a pa biaksa milimte mah bia-in tuate mai-ah a kun hi.

²²Amah in TOPA, a pate’ Pasian taisan-a, TOPA lampi a tawn kei hi.

²³Amon’ uliante in amah sawmsim uh a, a kumpi-inn ah kumpipa a suamlum uh hi.

²⁴Tua ciangin gam mite in kumpipa a suamsim khempeuh that uh a, ama munah a tapa Josiah kumpi a suaksak uh hi.

²⁵Amon uk sunga thupiang dangte le ama sepsate Judah kumpite khangthu ciamtehna laibu sungah kigelh khin hi lo ahi hiam?

²⁶Amah Uzza huan sunga ama hanah kivui hi. Tuateh a tapa Josiah in a kumpi za luah a kumpi a suak hi.