Read Zokam 2 Kumpite 22 Bible Online

2 Kumpite 22 - Zokam bible

2 Kumpite 22

¹Josiah kumpi a suahin a khan kum giat pha a, Jerusalem ah kum sawmthum le khat sung a uk hi. A nu min Jedidah hi a, Adaiah tanu hi-in; Bozkath pan ahi hi.

²Amah TOPA mit ah thumaanin gamta-a a pa David lampite khempeuh tawnin veilam le taklam ah a pial kei hi.

³A uk khit kum sawm le giat kumin Kumpi Josiah in Meshullam tapa, Azaliah tapa Shaphan, thuvanpipa TOPA biakinnpi ah a paisak hi. Amah in:

⁴"Tulpipa Hilkiah kiangah paito inla, kongcingte in mite tunga a khopsa, TOPA biakinnpi-a kipuak sumte a baihsa in omsak in.

⁵Biakinnpi sepna ah a van dinga kisehte tua sumzeek in. Tuateh hih mite in TOPA biakinnpi a puahpha nasemte -

⁶khutsiamte, inn lamte le suang ciangte piasawnsak in. Amaute in biakinnpi a puah nadingun sing le suang zepsa zong leisak in.

⁷Amaute in muanhuaitakin na sem uh ahi manin amau tunga ki-ap sumte sazian neih a kul kei hi," a ci hi.

⁸Tulpi Hilkiah in thuvanpipa Shaphan kiangah, "TOPA biakinnpi sungah thukham Laibu ka mu hi," a ci hi. Amah in Shaphan pia-a, a sim hi.

⁹Tua ciangin kumpipa kiangah thuvanpipa Shaphan pai-in: Na uliante in TOPA biakinnpi sunga om sumte biakinnpi semte le a vante tungah a piakhia khin uh hi," ci-in a zasak hi.

¹⁰Tua ciangin thuvanpipa Shaphan in kumpipa kiangah, "Siampi Hilkiah in kei laibu khat hong pia hi," ci-in a theisak hi. Tuateh Shaphan in kumpipa omin a sim hi.

¹¹Kumpipa in Thukham Laibu sunga thute a zak ciangin a puante a balkek hi.

¹²Amah in siampi Hilkiah, Shaphan tapa Ahikam, Maccaiah tapa Acbor, thuvanpipa Shaphan le kumpipa sawltakpa Asaiah-te thu pia a,

¹³"Pai unla hih a kimu laibu sunga kigelh thu kei ading, mite ading le Judah mite khempeuh adingin TOPA va dong un. I pate in hih laibu-a om thute mang lo uh a, eite tawh kisai-a kigelh khempeuh tawh kizui-in gamta lo uh ahi manin eite tungah TOPA hehna lian mahmah hi," ci-in thu a pia hi.

¹⁴Siampi Hilkiah, Ahikam, Acbor, Shaphan le Asaiah-te puan koihna cingpa, Harhas tapa Tikvah, a tapa Shallum zi kamsangnu Huldah hopih dingin a pai uh hi. Tuanu Jerusalem Gamkhen Nihna sungah a teng hi.

¹⁵Tuanu in amaute kiangah, "TOPA Israel Pasian gen hih ahi hi: "Kei kianga note hong sawlpa kiangah gen in,

¹⁶‘TOPA gen hih ahi hi: Judah kumpipa simsa laibu sunga kigelh khempeuh tawh kizui-in hih mun le a mite tungah siatna ka tungsak ding hi.

¹⁷Bang hang hiam cih leh amaute in kei hong taisanin pasian dangte tungah gimnamtui hal uh a, amau khuta a bawlsa uh milimte a[61]-in kei hong phinin hong hehsak uh ahi manin hih mun tungah ka hehna kuang dinga a mit nawn kei ding hi,’ ci hi.

¹⁸TOPA tungah thu dong dinga hong sawl Judah kumpipa kiangah, ‘TOPA Israel Pasian in na zaksa uh thu tawh kisai-in a gen hih ahi hi:

¹⁹Hih mun le a mite hamsiatin gamval ka suahsak nading thu na zak ciangin na lungsimin hong dawnga a, TOPA mai-ah kiniamkhiatin ka muhna ah na puan balkekin na kahna hangin nang thu ka za khin hi, TOPA in cikhia hi.

²⁰Tua ahi ciangin na pate tawh kong gawmkhawm dinga, lungnuamtakin na kivui ding hi. Hih muna ka tunsak ding siatna na mitin na mu kei ding hi, ci hi,’ ci-in gen un," a ci hi. Tua ciangin amaute in tuanu dawnna kumpipa kiangah a puakkik uh hi.