Read Zokam 2 Kumpite 24 Bible Online

2 Kumpite 24 - Zokam bible

2 Kumpite 24

¹Jehoiakim uk laitakin Babylon kumpipa Nebuchadnezzar in a gam sima, kum thum sung ama innteng a suak hi. Ahi hangin tua hun ciangin a lungsim khenga amah in Nebuchadnezzar a lehdo hi.

²TOPA in Babylon-te, d[69] Aram-te, Moab-te le Ammon-te pan galte ama langah a dosak hi. Ama nasem kamsangte tangkona tawh kizui-in Judah a susia dingin TOPA in amaute a sawl hi.

³Manasseh mawhnate le ama bawlsa mawhnate, mawhpengte sisan a luansaknate khempeuh hangin ama ompihna pan a khenkhiat theih nadingin TOPA thupiakna tawh kizui-in Judah tungah hih thu a tung taktak ding hi.

⁴Amah in mawhpeng sisan tawh Jerusalem kidimsak ahi manin TOPA in a maisak nuam kei hi.

⁵Jehoiakim uk sunga thupiang dangte le ama sepsate khempeuh Judah kumpite khangthu ciamtehna laibu sungah kigelh khin hi lo ahi hiam?

⁶Jehoiakim a pate tawh tawlnga khawm hi. Tuateh a tapa Jehoiachin in a kumpi za a luah hi.

⁷Babylon kumpipa in ama gam khempeuh, Egypt Wady panin Euphrates Gunpi dong laksak khin ahi manin Egypt kumpipa ama neihsa gam panin a kuankhia kik nawn kei hi.

⁸Jehoiachin kumpi a suahin a khan kum sawm le giat pha a, Jerusalem ah kha thum sung a uk hi. A nu min Nehushta hi-a Elnathan tanu ahi hi; Jerusalem pan ahi hi.

⁹Amah in a pa hih bang tektekin TOPA mit ah a sia-in a gamta hi.

¹⁰Tua hun laitakin Babylon kumpipa Nebuchadnezzar uliante Jerusalem ah kuanto uh a, a umcih uh hi;

¹¹ama uliante in a umcih laitakun khuapi ah Nebuchadnezzar mahmah a paito hi.

¹²Judah kumpipa Jehoiachin, a nu, amah cingte le a uliante khempeuh ama tungah a va lut uh hi. Babylon kumpipa in a uk a kum giatna kumin Jehoiachin thong sungah khum hi.

¹³TOPA gensa bangin Nebuchadnezzar in TOPA biakinnpi pan le kumpi-inn panin goute khempeuh puakhia a, Israel kumpipa Solomon in TOPA biakinnpi-a zat dingin a bawl kham vanzat khempeuh a puamang hi.

¹⁴Amah in Jerusalem-te khempeuh: a uliante khempeuh, galkapte, le khutsiamte le nasep siamte khempeuh - a vekpi in tulsawm, salin a kai hi. Gammi a zawng pente bek a nusia lai hi.

¹⁵Nebuchadnezzar in Babylon ah Jehoiachin salin a kai hi. Amah in kumpipa nu, a zite, a uliante le gam sunga makaite zong Jerusalem panin Babylon ah a paipih hi.

¹⁶Babylon kumpipa in gal sim thei mi thahat khempeuh galkap tul sagih le khutsiamte le nasep siamte mi tul khat zong Babylon ah nawhkhia hi.

¹⁷Amah in Jehoiachin pano Mattaniah ama mun ah kumpi suaksak a min laihsakin Zedekiah a phuak hi.

¹⁸Zedekiah kumpi a suahin kum sawmnih le khat pha a, Jerusalem ah kum sawm le khat sung a uk hi. A nu min Hamutal hi-a Jeremiah tanu hi; Libnah pan ahi hi.

¹⁹Jehoikim hihsa bang tektekin TOPA mit ah a sia-in a gamta hi.

²⁰TOPA hehna hangin Jerusalem le Judah tungah hihte khempeuh a tung hi-a a tawpna ah ama ompihna panin amaute a hemkhiamang hi. Tu-in Zedekiah in Babylon kumpipa a lehdo hi.