Read Zokam 2 Kumpite 9 Bible Online

2 Kumpite 9 - Zokam bible

2 Kumpite 9

¹Kamsangpa Elisha in kamsang honte lak panin khat sama, "Na kawnggak ah na puantual zep inla hih sathau um tawi-in Ramoth Gilead ah pai in.

²Tua lai na tun ciangin, Nimshi tapa, Jehoshaphat tapa Jehu zong in. Ama kiangah pai inla, a lawmte kiang panin paikhiat-pihin inn sungtawng khat ah paipih in.

³Tua lai-ah sathau um la-in a lu tungah sung inla: ‘TOPA gen hih ahi hi: Israel uk dingin sathau kong nilh hi,’ ci in. Tua ciangin kong hong inla tai in; ziakai kei in!" a ci hi.

⁴Tua ciangin kamsang khangnopa Ramoth Gilead ah a pai hi.

⁵Amah a tun ciangin, galkap uliante a tukhawm uh a mu hi. Amah in, "Makaipa aw, nang tungah kong gen ding khat a om hi," a ci hi. Jehu in, "Ko kua pen ka hi uh hiam?" ci-in a dong hi. "Nangmah, a makaipa," ci-in a dawng hi.

⁶Jehu dinga, inn sungah a pai hi. Tua ciangin kamsangpa in Jehu lutungah sathau sunga, "TOPA, Israel Pasian gen hih ahi hi: ‘TOPA mi Israel kumpi dingin nang sathau kong nilh hi.

⁷Nang in na pu Ahab innkuan na susia dinga, keimah in ka nasem kamsangte sisan le Jezebel in a luansak TOPA nasemte khempeuh sisan phu ka la ding hi.

⁸Ahab innkuan bup a mangthang ding uh hi. Keimah in Ahab kiang panin Israel pasal khempeuh - sila, sila loin a bei dong ka vatmai khin ding hi.

⁹Nebat tapa Jeroboam innkuan le Ahijah tapa Baasha innkuan bangin Ahab innkuan ka bawl ding hi.

¹⁰Jezebel ahileh, Jezreel ah leitual neu khatah uite in valhtum ding uh a, kuamah in a vui kei ding hi,’ ci hi," a ci hi. Tua ciangin kong hongin a tai hi.

¹¹A lawm uliante kiangah Jehu a pusuah khiat ciangin amaute khat in, "Thu hoih ahi hiam? Bang hang hih mihaipa na kiangah hong pai ahi hiam?" ci-in a dong hi. Jehu in, "A mi le a gen nate na thei uh ahi hi," ci-in a dawng hi.

¹²Amaute in, "Tua pen thumaan lo hi. Hong gen in," a ci uh hi. Jehu in, "Hong thugen hih ahi hi: ‘TOPA gen hih ahi hi: Israel uk dingin nang sathau kong nilh hi,’ hong ci hi," a ci hi.

¹³Amaute in a puanpite uh suah samsam uh a ama mai kahleite tungah a phah uh hi. Tua ciangin amaute in pengkul mut uh a, "Jehu kumpi hi ta hi!" ci-in a awng uh hi.

¹⁴Tua ciangin Nimshi tapa Jehoshaphat tapa Jehu in Joram a sawmsim hi. (Tua laitakin Joram le Israel khempeuh in Ramoth Gilead ah Aram kumpi Hazael langpan uh a,

¹⁵ahi hangin Kumpi Joram a[19] ahileh Aram kumpi Hazael tawh a kido lai-a Aram-te liamsakna mate damsak dingin Jezreel ah a ciah khin hi.) Jehu in, "Hih bangin hoihsa na hih uh leh Jezreel ah thuthak gen dingin hih khuapi panin kuamah gelkhia sak kei un," a ci hi.

¹⁶Tua ciangin a sakkolleng tungah kah a, Jezreel lam manawhin a tuang hi, bang hang hiam cih leh tua lai-ah Joram tawlnga a, Judah kumpipa Ahaziah a hawh dingin a paisuk hi.

¹⁷Jezreel tausang tunga galvil-a ompa in Jehu galkap honte in amau lam a manawh uh a muh ciangin, "Galkap hon khat hong pai ka mu hi," ci-in a awng hi. Joram in, "Sakol tungtuang khat sam inla amaute dawnsak in, ‘Lemna thu-a hong pai na hi uh hiam?’ cisak in," ci-in thu a pia hi.

¹⁸Sakol tungtuangpa Jehu dawn dingin paikhia a, "Kumpipa in, ‘Lemna thu-a hong pai na hi uh hiam?’ ci hi," a ci hi. Jehu in, "Lemna thu hileh bang cih nuam na hiam? Ka nungah pai in," ci-in a dawng hi. Galvilpa in, "Kamtaipa amaute kiang tung napi amah hong kileh kik lo hi," ci-in a zasak hi.

¹⁹Tua ciangin kumpipa in sakol tuang a nihna a sawl hi. Amaute kiang a tun ciangin, "Kumpipa in, ‘Lemna thu-a hong pai na hi uh hiam?’ ci hi," a ci hi. Jehu in, "Lemna thu hileh bang cih nuam na hiam? Ka nungah pai in," a ci hi.

²⁰Galvilpa in, "Amah amaute kiang tung napi hong ciah kik tuan lo hi. A sakolleng hawlpa Nimshi tapa Jehu tawh kibanga - amah in mihai bangin a hawl hi," ci-in a zasak hi.

²¹Joram in, "Ka sakolleng vawh un," ci-in thu a pia hi. A vawh khit uh ciangin Israel kumpipa Joram le Judah kumpipa Ahaziah-te Jehu maituah dingin amau leng tuakin a tuangkhia uh hi. Amaute in Jezreel-te Naboth lopaang ah amah a tuak uh hi.

²²Joram in Jehu a muh ciangin, "Jehu aw, lemna thu-a hong pai na hiam?" ci-in a dong hi. Jehu in, "Na nu Jezebel a milim biakna le a aisannate khempeuh tawh a kidim laisiah bangci bangin lemna om thei ding hiam?" ci-in a dawng hi.

²³Joram kileh hei-in tai-a: Ahaziah sam kawmin ‘Ahaziah aw, hong kilehdo ei!" ci-in Ahaziah a sam kawm hi.

²⁴Tua ciangin Jehu in a thal keka Joram liangko kikal a kap hi. Thaltang in a lungtang pailet-a a sakolleng sungah a khuptuk hi.

²⁵Jehu in a leng ukpipa Bidkar kiangah, "Amah tawm inla Jezreel-te Naboth lo ah paii in. A pa Ahab nungah sakolleng in i tuan lai-in ama thu TOPA genkholhsa:

²⁶‘Zanin Naboth le a tapate sisan ka mu hi, TOPA in cikhia a, hih leitangah nang kong thuk taktak ding hi,’ TOPA in a cih phawk in. b[20] Tua ahi ciangin tu-in tawmto inla TOPA kammal tawh kizui-in tua leitangah amah paii in," a ci hi.

²⁷Judah kumpipa Ahaziah in thupiang a muh ciangin Beth Haggon c[21] lam tawnin a tai to hi. Jehu in delh in awng a, "Amah zong that un!" a ci hi. Amaute in Ibleam kianga Gur paina-ah a sakolleng tungah amah liamsak uh a, ahi hangin Megiddo ah suakta in tua lai-ah a si hi.

²⁸A nasemte in Jerusalem ah sakollengin pua uh a, David Khuapi ama hanah a pate tawh a vui uh hi.

²⁹(Ahab tapa Joram a kum sawm le khatna-in Ahaziah Judah kumpi a suak khin hi.)

³⁰Tua ciangin Jezreel ah Jehu a pai hi. Jezebel in tua thu a zak ciangin a mitte zutin a sam bawlin tawhlet ah a dakkhia hi.

³¹Kongpi ah Jehu a lut laitakin tuanu in, "Na pu Zimri thatpa aw, lemthu-a hong pai na hiam?" a[22] ci-in a dong hi.

³²Amah tawhlet lamah dakto a, "Kei lamah kua pang na hi uh hiam? Kua e?" ci-in a awng hi. Cilgehte nih hiam, thum hiam in a ensuk uh hi.

³³Jehu in, ‘Tuanu lawnsuk un!" a ci hi. Tua ciangin amaute in tuanu lawnsuk uh a, a sisan kulhte le sakolte tungah kithehin, amaute in a khe un a tuangawp uh hi.

³⁴Jehu a sungah tumin ne in a dawn hi. Amah in, "Tuanu kumpipa tanu ahi manin tua a kihamsiat numei donin vui un," a ci hi.

³⁵Ahi hangin amaute a vui dingin a kuankhiat uh ciangin a luguh le a khutte le a khete longal bangmah a mu kei uh hi.

³⁶Amaute pai kik uh a Jehu kiangah gen uh a, amah in, "TOPA in ama nasem Tishbi-te Elijah tungah: Jezreel a leitang tungah Jezebel sa b[23] ui in a ne ding hi.

³⁷Kuamah in, ‘Hih Jezebel hi a cih theih loh dingin Jezreel leitang tungah Jezebel luang ek tawh kibang ding hi,’ ci hi," a ci uh hi.