Read Zokam 1 Khangthute 11 Bible Online

1 Khangthute 11 - Zokam bible

1 Khangthute 11

¹Israel khempeuh Hebron a David kiangah pai uh a, "Kote nangma si le sa ka hi uh hi.

²A beisa hun Saul kumpi ahi lai nangawnin galsimna-ah Israel a makaih nangmah na hi hi. Tuateh TOPA na Pasian in nang tungah, "‘Ka mi Israel na cing dinga, amaute ukpa na suak ding hi,’ hong ci hi," a ci uh hi.

³Israel upate khempeuh Hebron a Kumpi David kiangah a pai uh ciangin Hebron a TOPA mai-ah kithukhatna bawl uh a, TOPA in Samuel tunga a ciamsa bangin amaute in Israel tunga kumpi dingin David sathau a nilh uh hi.

⁴David le Israel-te khempeuh, Jerusalem (tua pen Jebus)ah a kuan uh hi. Tua lai-a teng Jebus-te in

⁵David kiangah, "Hih lai-ah na lut zo kei ding hi," a ci uh hi. Tua sangsikin David in kulhpi a ki-um David Khuapi Zion a la hi.

⁶David in, "Jebus-te sima makai peuhmah galkap mang lianpen a suak ding hi," a ci hi. Zeruiah tapa Joab kuanto masa pena amah in tua za a ngah pah hi.

⁷Tua khit ciangin kulhpi sung inn ah David tenga tua ciangin David Khuapi kici hi.

⁸Amah in a kipsakna leicialte e[72] panin a kimkot-a kulhte dongin a kimkot ah khuapi lam a, tua lo khuapi dangte Joab in a puah kik hi.

⁹Tua ciangin Thahatpen TOPA in amah ompih ahi manin David a vanglian semsem hi.

¹⁰Hihte in David mithahatte ukte hi a - TOPA in a ciamsa bangin amaute in Israel khempeuh tawh gam buppi ah a kumpi hihna khauhsakin a khangsak uh hi -

¹¹hihte in David mithahatte min ahi hi: Hacmoni-te Jashobeam in uliante f[73] ukpa hi-a, amah in mi zathumte g[74] langah teipi liikin hun khatin a that khinpa ahi hi.

¹²Ama zomah Ahoh-te Dodai tapa Eleazar hi-a, mi thahat thumte lakah khat ahi hi.

¹³Philistia-te galsim dingin a kithawi lai-un Pas Dammim ah David a ompihpa ahi hi. Mangbuh-ham a dimin a pona mun khatah Philistia-te kiang panin galkapte a taikek uh hi.

¹⁴Ahi hangin amaute in a lo laizangah panmun a la uh hi. Amaute in nang teitei uh a, Philistia-te satpukin TOPA in gualzawhna lianpi a pia hi.

¹⁵Philistia-te hon khat in Rephaim Kuampi ah giahphual a sat lai-un Adullam suangpi hawma David kiangah a makai sawmthumte lak ah thum a paisak uh hi.

¹⁶Tua hunin kulh muanhuai sungah David om a, Philistia khuapi cingte Bethlehem ah a om uh hi.

¹⁷David in tui duh a, "Bethlehem kongpi gei-a tuikhuk tui mi khat in hong suah leh ut si’ng maw!" a ci hi.

¹⁸Tua ciangin mi thahat thumte in Philistia-te gal panna Bethlehem kongpi gei-a tui va tawi uh a, David a puak uh hi. Ahi hangin amah’n a dawn nuam kei hi; a dawn tangin TOPA mai-ah a sung hi.

¹⁹Amah in, "Hih banga hih ding Pasian in a kham hi, amau nuntakna khama a paite sisan dawn ding ka hi hiam?" a ci hi. Amaute in a nuntakna uh khamin a va tawi uh ahi manin David in a dawn nuam kei hi. Mi thahat thumte hanzia a hici ahi hi.

²⁰Joab sanggampa Abishai, tua mi thumte makaipa ahi hi. Amah in zathumte langah a teipi liik in, amaute that-a tua hangin mi Thumte zaha minthang ahi hi.

²¹Amah mi Thumte zah nihin kipahtawi-a, amaute lakah a kihel loh hangin amaute ukpa a suak hi.

²²Kabzeel pana Jehoiada tapa Benaiah galdo siam mahmah a, a tuampian pipi-in a sem hi. Amah in Moab’ misuan pente nih a satpai hi. Vuk kiat ni khatin zong leihawm khatah kumsukin humpinelkai khat a that hi.

²³Amah in pi sagih le alang a sang a[75] Egypt-te khat a satpai hi. Egypt-pa in siamgante lawngpi a bang teipi khat a khutin tawi napi amah do dingin Benaiah khetbuk khat bek tawh a kuan hi. Amah in Egypt-pa khut panin a teipi bawhkhiatsak a, ama teipi mah in amah a leh thah hi.

²⁴Jehoiada tapa Benaiah a tangkaina hici bang hi a; amah zong mi thahat thumte zah mahin a minthang hi.

²⁵Amah Sawmthumte khatpeuh sangin kipahtawizaw napi Thumte lakah a kihel kei hi. Tua hi-a David in amah cingte ukpa in a koih hi.

²⁶Mi thahatte: Joab sanggampa Asahel, Bethlehem pan Dodo tapa Elhanan,

²⁷Harori-te Shammoth, Pelon-te Helez,

²⁸Tekoa pan Ikkesh tapa Ira, Anathoth panin Abiezer.

²⁹Hushath-te Sibbecai, Ahoh-te Ilai.

³⁰Netophath-te Maharai, Netophath-te Baanah tapa Heled,

³¹Gibeah pana Benjamin-te Ribai tapa Ithai, Pirathon-te Benaiah,

³²Gaash kuamte panin Hurai, Arbath-te Abiel,

³³Baharum-te Azmaveth, Shaalbon-te Eliahba,

³⁴Gizon-te Hashem tapate, Herari-te Shagee tapa Jonathan,

³⁵Harari-te Sacar tapa Ahiam, Ur tapa Eliphal,

³⁶Mekerath-te Hepher, Pelon-te Ahijah,

³⁷Carmel-te Hezro, Ezbai tapa Naarai,

³⁸Nathan sanggampa Joel, Hagri tapa Mibhar,

³⁹Amon-te Zelek, Zeruiah tapa Joab galvan puapa Beroth-te Naharai,

⁴⁰Ithri-te Ira, Ithri-te Gareb,

⁴¹Hit-te Uriah, Ahlai tapa Zabad,

⁴²Reuben-te le ama ompih sawmthumte sunga makai Reuben-te Shiza tapa Adina,

⁴³Maacah tapa Hanan, Mithni-te Joshaphat,

⁴⁴Ashterath-te Uzzia, Aroer-te Hotham tapa Shama le Jeiel,

⁴⁵Shimri tapa Jediael, a sanggampa Tiz-te Joha,

⁴⁶Mahav-te Eliel, Elnaam tapate Jeribai le Joshaviah, Moab-te Ithmah,

⁴⁷Mezob-te Eliel, Obed le Jaasiel.