Read Zokam 1 Khangthute 12 Bible Online

1 Khangthute 12 - Zokam bible

1 Khangthute 12

¹Hihte in Kish tapa Saul kiang pan David a kihawlkhiat lai - David omna Ziklag ah a va paite hi; (amaute in gal a do lai-un a huh galhangte lakah kihel uh a;

²amaute in thal tawi-in thaltang kap thei uh a, a taklam le a vei lam a suangtang a lawn thei khawm; Saul kinaipih Benjamin beh pan ahi uh hi):

³Gibeath-te Shemaah tapate ahi amaute makai Ahiezer le Joash; Azmaveth tapate Jeziel le Pelet, Anathoth-te Beracah le Jehu,

⁴le mi thahat Sawmthumte laka kihel, Sawmthumte makaipa Gibeon-te Ishmaiah; Jeremiah, Jahaziel, Johanan, Gederath-te Jozabad,

⁵Eluzai, Jerimoth, Bealiah, Shemariah le Haruph-te Shephatiah;

⁶Elkanah, Isshiah, Azarel, Joezer le Korah-te Jashobeam;

⁷le Gedor pana Jeroham tapate Joelah le Zebadiah.

⁸Sehnel-gam kulhpi sunga om David tungah Gad-te pawlkhat a lut uh hi. Amaute galhangin galsiam uh a, galsim thei, lum le tei tawi thei ahi uh hi. A maitang uh humpinelkai maitang hi-a, mualtung gam sunga om zukzil pi bangin a manlang uh hi.

⁹A makaipi Ezer hi a, a uk nihna Obadiah, a thumna Eliab,

¹⁰a lina Mishmannath, a ngana Jeremiah,

¹¹a gukna Attai, a sagihna Eliel,

¹²a giatna Johanan, a kuana Elzabad,

¹³a sawmna Jeremiah, a sawm le khatna Macbannai ahi hi.

¹⁴Hihte Gad-te galkap makaite hi-a a neu pen in zakhat ukin a lian pen tulkhat uk ahi uh hi.

¹⁵Kha masapen sung Jordan in a piau a luah khit laitakin kantan-a, kuamte sunga tengte lausakin nisuahna-lam le nitumna lamah a taikeksak amaute ahi uh hi.

¹⁶Adang Benjamin-te le Judah pan mi pawlkhat zong kulhpi sung David kiangah a pai uh hi.

¹⁷Amaute tawh kimu dingin David paikhia a, amaute kiangah, "Note kei hong huh dingin lemthu-a hong pai na hi uh leh, note tawh a kipawl dingin kigingsa in ka om hi. Ahi hangin ka galte tungah hong lehhek dinga hong pai na hi uh leh ka khutte ngongtatna panin a suahtak ciangin i pate Pasian in hong mu-in note thu hong khenta hen," a ci hi.

¹⁸Tua ciangin Sawmthumte makaipa Amasai tungah Kha tunga amah in: "David aw, kote nang aa ka hi uh hi! Jesse tapa aw, kote in kong koppih uh hi! Na Pasian in nang hong huh ding ahi manin nang tungah zawhna, zawhna, nang hong huhte tungah zawhna," a ci uh hi. Tua ciangin David in amaute sang in, a galsim honte makai-in a omsak hi.

¹⁹Saul sim dingin Philistia-te tawh David a kuan lai-in Manasseh mite pawlkhat in amah a pawl uh hi. (Amah le a mite in Philistia-te a pawl kei uh hi, bang hang hiam cih leh thu a kikup khit uh ciangin a gam-ukte un amah a sawlkhia uh hi. Amaute in, "Amah in a pu kiangah hong taisan leh eima lutungah hong tu kha ding hi," a ci uh hi.

²⁰Ziklag ah David a pai lai-in amah a pawl Manasseh mite hihte ahi hi: Adnah, Jozabad, Jediael, Michael, Jozabad, Elihu le Zillethai hi-a, amaute Manasseh sungah tul khat pawlte makaite ahi uh hi.

²¹Amaute khempeuh galsiam galhang hi uh a, ama galkap ukte ahi manun misuamte panin David a huh uh hi.

²²David in a thahat a[76] galkap tampitak a neih dong amah huh dingin ni khat khit ni khat mi a pai hi.

²³Hihte in TOPA gensa bangin Saul kumpi-gam David tungah a tun nadingin Hebron a David kiangah a pai galsim dinga kithawisa mi phazahte ahi hi:

²⁴Judah mite galhiam tawh kithawisa - lum le tei tawi pasal 6,800;

²⁵Simeon mite galsim dinga kithawisa galhang - 7,100;

²⁶Levi mite - 4,600,

²⁷Aaron innkuan makaipa Jehoiada le pasal 3,700 tawh

²⁸galhang galsiam tangval Zadok tawh, ama innkuan pana ulian 22 tawh;

²⁹Benjamin mite, Saul kinaipih - 3,000, hi-a, amaute tu dongin Saul innkuante a dingin a muanhuai uh hi;

³⁰Ephraim mite, amau bawng’ sungah galhang galsiam minthang - 20,800;

³¹Manasseh beh alangte mi, David kumpi a suaksak dingin a mina kilote - 18,000;

³²Issachar mite, Israel sep ding le a hun ding a thei ukpi - 200 amau ukna nuai-a a tanaute khempeuh uh tawh;

³³Zebulun mite, galdo zia a siamsa, kikhen loin muanhuaitaka David a huh ding galhiam namkim tawh a kigingsa - 50,000;

³⁴Naphtali mite ulian 1,000 le lum le tei tawi 37,000 tawh;

³⁵Dan mite, galsim dinga kithawisa- 28,600;

³⁶Asher mite galsim siamsa, galsim dinga kithawisa - 40,000;

³⁷le Jordan nisuahna lam panin Reuben Gad le Manasseh beh alangte galhiam namkim tawi - 120,000 ahi hi.

³⁸Hihte khempeuh amau za tawh kituakin amau utthu-a nasem galsim mite ahi uh hi. Israel khempeuh tungah David kumpi suaksak nuam takpi in amaute Hebron ah a pai uh hi. A om lai Israel khempeuh zong David kumpi suahsak dingin a kithukhat uh hi.

³⁹Amau innkuante in amau annek ding sik uh ahi manin mite in ni thum sung David tawh an ne tui dawnin a om khawm uh hi.

⁴⁰A gamvengte uh Issachar, Zebulun le Naphtali gam pek panin laa, kala-oh le laaneute le bawngtalte tawh an a puak uh hi. Israel sungah lungnopna om ahi manin amaute in annel, theimoh, lenggah keu, zu, sathau, bawnghonte le tuu tampitak a puak uh hi.