Read Zokam 1 Khangthute 14 Bible Online

1 Khangthute 14 - Zokam bible

1 Khangthute 14

¹Tu-in Tyre kumpipa Hiram in kamtaite paisakin amaute, tamtak luangte le suang seeksate puaksakin kumpi inn a lamsak ding khutsiamte a tonpihsak hi.

²Tua hi-a TOPA in Israel a uk kumpi dingin amah a kipsak lam le ama Israel mite a khualna-in ama kumpi-gam sangpi-in a kitawisang lam David in a thei hi.

³David in Jerusalem ah zi neihbeh a, tanu tapa a tamzawte’ pa a suak hi.

⁴Hihte in tua lai-a suak a tate min ahi hi: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nepheg, Japhia,

⁷Elishama, Beeliada, b[81] le Eliphelet ahi hi.

⁸Israel khempeuh a uk dingin David sathau kinilh khin hi, ci-in Philistia-te in a zak uh ciangin amah zong dingin galhiam kimtak tawh kuanto uh a, ahi hangin David in tua thu za ahi manin amaute tawh kituak dingin a kuankhia hi.

⁹Philistia-te tung uh a Rephaim Kuam teng a luh uh hi;

¹⁰tua ciangin David in Pasian donga, "Kuanin Philistia-te ka sim ding hiam? Ka khutah amaute nong pia ding hiam?" a ci hi. TOPA in, "Kuan in, amaute nang tungah kong pia ding hi," ci-in a dawng hi.

¹¹Tua ciangin David le a mite Baal Perazim ah kuanto uh a, tua lai-ah amaute a zo hi. Amah in, "Tuite in a phutkhap bangin Pasian in ka khutin ka galte a phukham hi," a ci hi. Tua ciangin tua mun Baal Perazim c[82] kici hi.

¹²Philistia-te in tua lai-ah a pasiante uh taisan uh a, David in mei-a a hal dingun thu a pia hi.

¹³Philistia-te in khatvei a va luh kik uh hi;

¹⁴tua ciangin David in Pasian dong kik-a, Pasian in, "Tangtakin paito kei inla a kimkotah umin lungli kungte maisanah amaute sim un.

¹⁵Lungli kungte dawnah lampaina ging na zak phetun galsim dingin kuankhia un, bang hang hiam cih leh Philistia galkapte vat dingin note mai-ah Pasian kuankhin hi, cihna ahi hi," ci-in a dawng hi.

¹⁶Tua ciangin David in Pasian thupiak bangin sem a, amaute in Gibeon panin Gezer dong lamdung tawntungah Philistia-te galkapte a satpuk uh hi.

¹⁷Tua ciangin gam citengah David minliatna kizel a, TOPA in minam dangte amah a kihtasak hi.