Read Zokam 1 Khangthute 15 Bible Online

1 Khangthute 15 - Zokam bible

1 Khangthute 15

¹David Khuapi sungah David in ama adingin inn a lam khit ciangin Pasian Singkuangpi koih nading mun khat bawla, tua koih nadingin puanbuk khat a zal hi.

²Tua ciangin David in, "Levi-te longal kuamah in Pasian singkuangpi a pua kei ding hi, bang hang hiam cih leh TOPA singkuangpi pua ding le a tawntungin ama mai-ah biakna nasem dingin TOPA in amaute a teelsa ahi hi," a ci hi.

³David in TOPA singkuangpi koih nadingin a bawlsa muna a puato dingin Israel khempeuh Jerusalem ah a kikhawmsak hi.

⁴Amah in Aaron suante le Levi-te samkhawm a:

⁵Kohath suante panin a makai Uriel le a tanaute 120;

⁶Merai suante panin a makai Asaiah le a tanaute 220;

⁷Gershon d[83] suante panin a makai Joel le a tanaute 130;

⁸Elizaphan suante panin a makai Shemaiah le a tanaute 200;

⁹Hebron suante panin a makai Eliel le a tanaute 80;

¹⁰Uzziel suante panin a makai Amminnadab le a tanaute 112 - ahi hi.

¹¹Tua ciangin David in siampi Zadok le Abiathar, le Uriel, Asaiah, Joel, Shemaiah, Eliel le Levi-te Amminadab a sam hi.

¹²Amah in amaute kiangah, "Note, Levi innkuan lutangte na hi uh hi; no le na kithuahpih uh Levi-te no le no ki-apin TOPA Israel Pasian singkuangpi koih nadinga ka bawlsa munah na puato ding uh hi.

¹³Tua pen bang hang hiam cih leh a masa hunin no Levi-te in na puak toh loh manun TOPA eite Pasian hehna ei tungah a suakkhia hi. Eite in ama hong lamlah banga hih dingin amah i dong kha kei hi," a ci hi.

¹⁴Tua ciangin TOPA Israel Pasian singkuangpi puato dingin siampite le Levi-te amau a ki-ap tawm uh hi.

¹⁵Tuateh TOPA thu tawh kituakin Moses thupiaksa bangin Levi-te in Pasian singkuangpi a zawlte in a liangko uah a pua uh hi.

¹⁶David in Levi makaite kiangah amau sanggamte, lungnopna la sa ding lasiamte le tuate tawh kithuah dingin tumtheih: lyre-te, harp-te le daltuah tum siamte a seh dingun a gen hi.

¹⁷Tua ciangin Levi-te in Joel tapa Heman; ama sanggamte panin Berekiah tapa Asaph; amaute sanggampate Merari-te panin Kushaiah tapa Ethan;

¹⁸le amaute tawh amau zoma a lian amau sanggamte: Zechariah, e[84] Jaaziel, Shemiramoth, Jehiel. Unni, Eliab, Benaiah, Maaseiah, Mattithiah, Eliphelehu, Mikneiah, Obed-Edom le Jeiel, f[85] kongpi cing te ahi uh hi.

¹⁹Tumtheih siamte: Heman, Asaph le Ethan, sumngo daltuah tum ding;

²⁰Zechariah, Aziel, Shemiramoth, Jehiel, Unni, Eliab, Maaseiah le Benaiah-te alamoth a[86] tawh kizui-a lyre-te a tum ding;

²¹Mattithiah, Eliphelehu, Mikneiah, Obed-Edom, Jeiel le Azaziah-te Sheminith b[87] tawh kizui-a ki-uk harp-te tum ding ahi hi.

²²Levi-te lutangpa Kenaniah in la kisate uk ding hi; ama kivakna ahi manin ama tavuan ahi hi.

²³Singkuangpi kongkhakpi cing ding Berekiah le Elkanah-te ahi uh hi.

²⁴Shebaniah, Joshaphat, Nethanel, Amasai, Zechariah, Benaiah le Eliezer hih siampite in Pasian singkuangpi mai-ah pengkul a mut ding uh hi.

²⁵Tua ciangin David le Israel upate le tulkhat ukte, Obed-Edom inn panin TOPA thukhun singkuangpi puato dingin lungnuamtakin a kuankhia uh hi.

²⁶Pasian in TOPA thukhun singkuangpi pua Levi-te huh ahi manin bawngtal sagih le tuutal sagih biakna-in kipia hi.

²⁷Tu-in David in saihadial hoih puantualpi silh a, tua mah bangin singkuangpi pua Levi-te khempeuh le lasate le lapawl kisate a ukpa Kenaniah-te in zong a silh uh hi. David in zong saihadial siampi puan a silh hi.

²⁸Tua ciangin Israel khempeuh awng uh a, tuutal kite le pengkulte mutin, daltuahte le lyre-te le harp-te tumsa-in TOPA thukhun singkuangpi a puato uh hi.

²⁹David Khuapi sungah TOPA thukhun singkuangpi a lut laitakin Saul tanu Michal in tawhlet panin a vil hi. Tuanu in Kumpipa David lamsa-a gualnuam a muh ciangin a lungsim sungah a musit hi.