Read Zokam 1 Khangthute 16 Bible Online

1 Khangthute 16 - Zokam bible

1 Khangthute 16

¹Amaute in Pasian singkuangpi pua uh a, David in tua dingin a zalsa puanbuk sungah koihin amaute in meihal biakna, kilawmtakna biakna c[88], Pasian mai-ah a pia uh hi.

²David in meihal biakna le kilawmtakna biakna a piak khit ciangin TOPA minin mipite thupha a pia hi.

³Tua ciangin Israel-te a numei a pasalin anlum khat, nisuh moh khat le lenggah moh khatciat a pia hi.

⁴Amah in TOPA singkuangpi mai-ah nasem ding, deihna ngen ding, lungdam ko ding, TOPA Israel Pasian a phat dingin Levi-te seh a:

⁵A makaipi Asaph, a nihna Zechariah, tua ciangin Jeiel, Shemiramoth, Jeriel, Mattithiah, Eliab, Benaiah, Obed-Edom le Jeiel ahi hi. Amaute in lyre-te le harp-te tumin, Asaph in daltuah tum dinga,

⁶siampi Benaiah le Jahaziel-te in Pasian thukhun singkuangpi mai-ah a hunhunin pengkul a mut ding uh hi.

⁷Tua ni-in David in Asaph le ama kikoppihte hih lungdamkohna la TOPA a sak dingun a masapenin a ap hi.

⁸TOPA tungah lungdam koin, a min lo unla; ama sepsate minamte lakah kitheisak un.

⁹Amah la sak un, amah phatna la sak un; ama sepsa a lamdang teng genkhia un.

¹⁰A min siangtho thangsak un; TOPA a zongte lungsim nuam ta hen.

¹¹TOPA le ama hatna enkawmin; ama maitang zong den un.

¹²Ama sepsa a lamdangte, ama nalamdang bawlte le a genkhiat a thukhennate,

¹³ama nasem Israel suante aw, ama teelsa Jacob tapate aw, phawk gige un.

¹⁴Amah TOPA eite Pasian hi a; leitung khempeuh ah a thukhennate a om hi.

¹⁵Amah in a thukhun phawk tawntung a, a thupiaksa kammal khang tul khat dong a ciamteh d[89] hi,

¹⁶tua in Abraham tawh a thukhun Jacob tungah tom lo-a a thuciam ahi hi.

¹⁷Amah in Jacob tungah thukip in kipsak a, tawntung thukhunin kipsakin,

¹⁸"Luah in na tan dingin nang tungah Canaan gam kong pia ding hi," a ci hi.

¹⁹Amaute e[90] tawmkha bek pha uh a, tawm takpi-in tua gamah mikhual suak uh a,

²⁰gam khat pan gam khat, kumpi-gam khat pan adang khatah a pai kawikawi uh hi.

²¹Amah in amaute kuama nuai-et ding phal loin, amaute a khualna-in kumpite tai a;

²²"Ka sathau nilhte lawngkha kei unla; ka kamsangte nasak kei un," a ci hi.

²³Leitung khempeuh aw, TOPA la sak un; nisimin ama hotkhiatna tangko un.

²⁴Minamte lakah ama minthanna pulak unla, mi khempeuh lakah a nasepna piandangte pulakkhia un.

²⁵Ahang in, TOPA liana, a phattak pen ahi hi; pasiante khempeuh khengin kihtak ding ahi hi.

²⁶Minamte pasiante khempeuh milimte hi-a, TOPA in ahileh vante a bawl hi.

²⁷Ama mai-ah thupina le ukzawhna om a; ama omna munah thahatna le lungnopna a om hi.

²⁸Minamte innkuante aw, TOPA ahi bangin hisak un, TOPA a minthanna le a hatna bangin hisak un,

²⁹Ama minthanna a[91] tawh kituakin TOPA minthangsak un. Biakna khat kengin ama mai hong zuan un; ama sianthona, a thupina tawh kituakin TOPA bia un.

³⁰Leitung khempeuh ama mai-ah ling un! Leitung kiptakin kikhosak a; a kikhin thei kei ding hi.

³¹Vante nuam uh henla, leitung kipak hen; amaute in minamte tungah, "TOPA in uk hi," ci uh hen.

³²Tuipi le a sunga omte khempeuh in kithawnsak uh hen; lote le a sunga omte in nuamsa uh hen!

³³Tua ciangin leitung thukhenin TOPA hong pai ding ahi manin tulak singkungte khempeuh in ama mai-ah lungnuamin la sa ding uh hi.

³⁴TOPA hoih ahi manin ama tungah lungdam ko un; ama itna kip tawntung hi.

³⁵Kiko unla, "Kote Honpa Pasian aw, kote hong hon in; na min siangtho tungah lungdam ka koh theih nading uh le na minthang ka phat theih nadingun minamte panin kote hong kaikhawm inla hong hukhia in," ci un.

³⁶A tawntung pan tawntung dongin TOPA, Israel Pasian in phatna ngah ta hen. Tua khit ciangin mi khempeuh in, "Amen, TOPA phat un," a ci uh hi.

³⁷David in nisimin kisapna tawh kizui a hunhun a TOPA thukhun singkuangpi mai-a nasem dingin Asaph le amah a huhte a nusia hi.

³⁸Amah in amaute tawh a semkhawm dingin Obed-Edom le amah a huh sawmguk le giatte zong a nusia hi. Jeduthun tapa Obed-Edom le Hosah zong kongpi cingte ahi uh hi.

³⁹David in siampi Zadok le ama siampi naseppihte Gibeon a munsang tunga TOPA biakbuk mai-ah

⁴⁰TOPA in Israel a piaksa ama thukham khempeuh tawh kizui-in zingsang le nitak a hunhunin meihal biakna-tau tungah TOPA tunga meihal biakna a pia dingin a nusia hi.

⁴¹Amaute tawh Heman le Jeduthun le TOPA tungah lungdam ko dinga a kiteelsa a mina kilote in "ahang in, ama itna kip tawntung hi," ci ding uh hi.

⁴²Heman le Jeduthun-te in la siangtho sak cianga kitum, pengkulte daltuahte le tumtheih kitum dangte awging a uk uh hi. Jeduthun tapate in kongpi ah mun a nei uh hi.

⁴³Tua khit ciangin mite khempeuh amau neihsa inn ciatah ciah uh a, ama innkuanpihte thupha pia dingin a inn ah David a ciah hi.