Read Zokam 1 Khangthute 17 Bible Online

1 Khangthute 17 - Zokam bible

1 Khangthute 17

¹David ama kumpi inn ah a ten khit ciangin kamsangpa Nathan tungah, "Hih lai-ah tamtak sing kumpi-inn ah kei ka tenga, TOPA thukhun singkuangpi lah puanbuk nuai-ah a om hi," a ci hi.

²Nathan in David kiangah, "Pasian in nang hong ompih ahi manin na lungsima om bangbang sem in," ci-in a dawng hi.

³Tua ciangin Nathan tungah Pasian thu tunga:

⁴"Pai inla ka nasempa David kiangah, ‘TOPA gen hih ahi hi: A sunga ka ten nading inn khat a lam ding nang na hi kei hi.

⁵Egypt panin Israel ka paikhiatpih a kipan tuni dong inn sungah ka teng nai kei hi. Puanbuk mun khat pan mundang khatah, tenna mun khat pan adang khatah ka kikhin hi.

⁶Israel-te khempeuh tawh ka kikhinna peuhpeuh ah ka mite a cing dinga thu ka piak amau makaite b[92] khatpeuh tungah, "Bang hangin tamtak sing, inn hong lamsak lo na hi hiam," ci ngei ka hi hiam?’ ci hi.

⁷"Tua ahi ciangin ka nasempa David tungah, ‘Thahatpen TOPA gen hih ahi hi: Ka mi Israel a uk dingin lonona pan le ganhonte na zuihna panin nang kong la hi.

⁸Na painasa khempeuh ah nang kong ompih a, na mai-ah na galte ka nawhkhia hi. Tu-in nangma min, leitunga mi lianpente min kong bangsak ding hi.

⁹Tuateh ka mi Israel in amau inn ding nei-in a kinawngkaisak nawn loh nadingin mun ka pia dinga amaute ka phut ding hi. Migilote in amaute a tung lai-a a nuainet uh bangin nuainet nawn lo ding uh a,

¹⁰ka mi Israel-te makai ding ka seh khita kipan amaute tungah a hih nawn kei ding uh hi. Na galte khempeuh zong ka nuaisiah ding hi. "‘Nang tunga kong pulak inah TOPA in nang adingin inn khat hong lamsak dinga:

¹¹Na nuntak hun bei-a, na pate tawh om dinga na pai ciangin nang zaluah dingin nang sunga piang nangma tapate khat ka laamto dinga, ama kumpi-gam ka kipsak ding hi.

¹²Amah in keima adingin inn khat lam dinga ama kumpi tokhom ka kipsak den ding hi.

¹³Kei ama pa ka hi dinga, amah ka tapa ahi ding hi. Nangmah in a za na luahpa panin ka itna ka lakkhiat bangin ama tung panin ka itna ka lakhia ngei kei ding hi.

¹⁴Ka innkuan le ka kumpi-gam a uk den dingin amah ka seh a; ama kumpi tokhom a kip tawntung ding hi,’ ci-in gen in," a ci hi.

¹⁵Nathan in David tungah hih kilaakna khempeuh a zasak hi.

¹⁶Tua ciangin Kumpipa David sungtumin TOPA mai-ah tu a: "TOPA Pasian aw, hih tan nong tunpih dingin kei kua hi a, ka innkuanpihte bang ahi hiam?

¹⁷Tua hi-a Pasian aw, nang muhna ah hihte bangmah tham ahi kei hi, na nasempa innkuan vai mailam ading zong nong gen khin hi. TOPA Pasian aw, mihing lakah a kitawisang pen bangin kei tungah nong en khin hi.

¹⁸"Na nasempa pahtawi nadingin David in bang genthuah thei lai ding ahi hiam? Ahang in, na nasempa na theih khitsa ahi hi;

¹⁹TOPA aw. Na nasempa na khualna le nangma deihna tawh kizui-in hih na lianpite na bawl khin a, hih thuciamtehna lianpite khempeuh na kitheisak khin hi.

²⁰"TOPA aw, nang tawh a kibang khat beek om lo-a, ka bilun ka zak uh bangin, nang longal Pasian dang a om kei hi.

²¹Pasian mahmah paikhia-a, ama mi dinga a tatkhiatte ama min suaksak-a a lian a kihtakhuai nalamdang bawlin na mite mai panin minamte le a pasiante uh hawlkhia-in Egypt pana na tatkhiat - na mi Israel tawh a kibang kua om ahi hiam?

²²Na mi Israel, a tawntunga nang aituam ding na suaksak-a, nang amaute Pasian na hi hi, TOPA aw.

²³"Tua hi-a TOPA aw, na nasempa le a innkuante tawh kisai-a na bawlsa thuciamte kipsak den in. Na min a liat nading le a kip tawntung nadingin

²⁴na ciam bangbangin sem ta in. Tua ciangin mite in, ‘Thahatpen TOPA Israel Pasian ahi hi," ci ding uh hi. Tuateh na nasempa David innkuan, nangma mai-ah kip ding hi.

²⁵"Nang, ka Pasian in na nasempa adingin inn khat lamsak ding ama tungah na laak khin hi. Tua ahi ciangin na nasempa in nang tungah hih thungetna hong ngen ngam ahi hi.

²⁶TOPA aw, nangmah Pasian na hi hi! Na nasempa tungah hih thuciam hoih na ciam khin hi.

²⁷Nangma muhna-ah a kizopsuak nadingin na nasempa innkuan thupha piak ding na lungkim khina; TOPA aw, nangmah in thupha pia khin na hi manin thupha a kipia tawntung ding hi," a ci hi.