Read Zokam 1 Khangthute 29 Bible Online

1 Khangthute 29 - Zokam bible

1 Khangthute 29

¹Tua ciangin Kumpi David in a kikhawm buppi tungah: "Pasian in a teelsa ka tapa Solomon khangmoi-in a pumpi-in tuahkhak a nei nai kei hi. Hih nasep a lian mahmah hi; bang hang hiam cih leh inn thupi lah mihing ading hi loin TOPA Pasian ading ahi hi.

²Ka hih theihna lamcinin ka Pasian biakinnpi ding - kham zat nading ah kham, ngun zat nading ah ngun, sumngo zat nading ah sumngo, sik zat nading ah sik, sing zat nading ah sing, hihte banah phuh dingin Onyx, suang dum-eng, suang mel tuamtuamte le suang hoih a[119] namkim le suangpak - hihte khempeuh tampitak ka khol khin hi.

³Tuate banah keima Pasian biakinnpi adingin ka apsa, keima goukholna-a ngun le khamte ka Pasian biakinnpi adingin ka pia-a, hih biakinn siangtho adingin ka khol peuhmah:

⁴kham talent b[120] tulthum (Ophir kham) le a kisiangsaksa ngun talent c[121] tulsagih hi a, tuate innkawmte tunga luan ding,

⁵kham zatna le ngun zatnate-a zat ding le khutsiamte in a sep ding uh nasepnate a zat ding ahi hi. Tu-in TOPA tungah tuni-in no utthu-in kua teng ki-ap nuam na hi uh hiam?" a ci hi.

⁶Tua ciangin innkuan makaite, Israel beh uliante, a tulte a ukte le a zate a ukte le kumpipa na a semte a ukte amau utthu-in a kipia uh hi.

⁷Amaute in Pasian biakinnpi lam nadingin kham talent d[122] tulnga le daric e[123] tulsawm, ngun talent f[124] tulsawm, sumngo talent g[125] tulsawm le tulgiat le sik talent h[126] tul zakhat a pia uh hi.

⁸Suang manpha a nei peuhmah in Gershon-te Jehiel kepna mun TOPA biakinnpi goukholna ah a pia uh hi.

⁹A makaite un a lungsim khempeuh uh tawh amau utthu-a TOPA tunga a kipiakna uh hangin mipite a nuam uh hi. Kumpipa David zong a nuam lua mahmah hi.

¹⁰A kikhawm mipi bup omin David in TOPA phat a, "Kote pa Israel Pasian TOPA aw, tawntung pan a tawntung dongin nang hong kiphat hen.

¹¹TOPA aw, leitung le vantunga na khempeuh nang aa ahi manin liatna le vangliatna nang aa hi-a, minthanna ukzawhna le thupina nangma aa ahi hi. TOPA aw, kumpi-gam nangma aa hi a; na khempeuh lutangin hong kitawisang hi.

¹²Hauhna le pahtawina nang tung panin hong pai hi a; na khempeuh a ukpa nangmah na hi hi. Na khut sungah na khempeuh tawisang nading le hatsak nading hatna le vangliatna a om hi.

¹³Kote Pasian aw, tu-in nang tungah lungdam kong ko uh a, a minthang na min ka phat uh hi.

¹⁴"Ahi zongin cinghtaka hong pia thei dingin kei kua hi a, ka mite kua ahi hiam? Na khempeuh nangmah pana hong pai hi-a, nang khut pana hong pai bek hong pia ka hi uh hi.

¹⁵Kote le ka pute khempeuh uh nang muhna-ah pemta le mikhual ka hi uh hi. Leitungah ka nuntak hun uh lametna om loin niliim tawh kibang hi.

¹⁶TOPA kote Pasian aw, na Min Siangtho ading biakinnpi lam nadingin kong piak uh a tampite nangma khut pana hong pai mah hi a, nangma aa vive ahi hi.

¹⁷Ka Pasian aw, nang in lungsim na zia-et lam ka thei-a, cihtakna ah na lungkim hi. Hih nate khempeuh ka utthu-in thumaantakin kong pia hi. Tua ciangin hih lai-a om na mite in utna tawh nang hong piakzia lung nuamtakin ka mu khin hi.

¹⁸TOPA ka pate uh Abraham, Isaac le Israel Pasian aw, na mite lungsim ah hih utna omsak den inla amaute nang tungah muanhuaisak in.

¹⁹Tua ciangin ka tapa Solomon na thupiakte a kisapnate le na thukipte ah a lungsim khempeuh in semsak zo inla ka topsaksa inn lianpi lamna ah ki-ap zosak in," a ci hi.

²⁰Tua ciangin David in a kikhawm mipi buppi tungah, "TOPA note Pasian phat un," a ci hi. Tua ciangin amaute khempeuh in TOPA a pate uh Pasian phat uh a; TOPA le kumpipa mai-ah kunin a khupbawh uh hi.

²¹A zing ciangin TOPA biakna pia in ama tungah meihal biakna-in: bawngtal tulkhat, tuutal tulkhat, le tuuno a nu tulkhat tawh dawntheih-a biakna, biakna dangte tampitak Israel khempeuh aitangin a pia uh hi.

²²Amaute in tuani-in TOPA omin ne-in dawn uh a nuam a sa uh hi. Tua ciangin amaute in David tapa Solomon a nihveina kumpipa-in sang uh a, TOPA mai-ah gam uk dingin sathau nilhin, tuateh siampi dingin Zadok sathau a nilh uh hi.

²³Tua ciangin TOPA kumpi tokhom a pa David munah kumpi in Solomon a tu hi. Amah lamzangin Israel khempeuh in a thu a mang uh hi.

²⁴Uliante le mi thahatte khempeuh in Kumpi David tapate tawh Kumpi Solomon tungah a tokaina-un a kiciam uh hi.

²⁵TOPA in Israel khempeuh muhna-ah Solomon tawisang a, ama ma-a Israel kumpite khat beek tua banga kumpi thupina a piak a om nai kei hi.

²⁶Israel khempeuh a uk kumpi, Jesse tapa David ahi hi.

²⁷Amah in kum sawmli sung Israel uk a - Hebron ah kumthum omin Jerusalem ah kum sawmthum le sagih a om hi.

²⁸Amah a tek hoih bek laitakin si-a, hauhna le pahtawina ngahin sawtpi a nungta hi. A tapa Solomon in a za luah a kumpi a suak hi.

²⁹Kumpi David in a uk sung a kipatna pan a tawpna dong thumupa Samuel ciamtehna sung, kamsangpa Nathan ciamtehna sung le thumupa Gad ciamtehna sunga kigelh hi a,

³⁰ama ukna a vangliatna, ama tunga thupiang khempeuh le Israel tung le adang kumpi-gamte a, a sepnate aneng atawngin kigelh khawm ahi hi.