Read Zokam 1 Khangthute 5 Bible Online

1 Khangthute 5 - Zokam bible

1 Khangthute 5

¹Israel ta upa pen Reuben tapate hi-a (amah ta upa hi napi a pa zineih-lupnapi ninsak ahi manin a ta upa za Israel tapa Joseph tungah kipia hi; tua ahi ciangin khangthu ciamtehna ah tapa upapen za tawh kizui-in kigual thei lo a;

²a sanggamte lakah Judah thahatpenin amah panin gam uk khat piangkhia ahi manin tapa upa za Joseph in a ngah hi)—

³Israel ta upa Reuben tapate: Hanoch, Pallu, Hezron, le Carmi.

⁴Joel suante: Ama tapa Shemaiah, a tapa Gog, a tapa Shimei,

⁵a tapa Micah, a tapa Reaiah, a tapa Baal,

⁶le Assyria Kumpipa Tiglath-Pileser f[44] in sal-a a kaih Beerah. Beerah in Reuben-te makaipa ahi hi.

⁷Amau khang ciamtehna tawh kizui-in amau kinaipih a bawng’bawng’ a kigual ahi hi: Ukpi Jeiel, Zechariah,

⁸le Joel tapa Shema tapa Azaz tapa Bela. Amaute Aroer panin Nebo, le Baal Meon dongah lal uh hi.

⁹Nisuahna-lam pangah Euphrates gunpi gei sehnel-gam mong dong a luah uh hi, bang hang hiam cih leh a ganhonte uh Gilead ah pung mahmah hi.

¹⁰Saul uk hun lai-in amaute in Hagri-te simin amau khutin zo uh a; Hagri-te tenna Gilead nisuahna lam kual khempeuh ah a teng uh hi.

¹¹Amau zomah Salecah dongin Bashan ah Gad-te a teng uh hi:

¹²Joel ukpi hi-a Shapham a nihna hi-in, tua ciangin Bashan ah Janai le Shaphat ahi hi.

¹³Amau kitanaupih innkuante: Michael, Meshullum, Sheba, Jorai, Jacan, Zia le Eber - a vekin sagih ahi hi.

¹⁴Hihte in Buz tapa, Jahdo tapa, Jeshishai tapa Michael tapa Gilead tapa Jaroah tapa, Huri tapa Abihail tapate ahi hi.

¹⁵Guni tapa, Abdiel tapa Ahi in amau innkuan lutang ahi hi.

¹⁶Gad-te Gilead, Bashan le khua pua-a om khuaneute le Sharon lonona gam khempeuh amau tunzawhna ciangciang ah a teng uh hi.

¹⁷Hihte khempeuh Judah kumpipa Jotham le Israel kumpipa Jeroboam in a uk hun lai-a khangthu ciamteh-na-a kikhum ahi hi.

¹⁸Reuben-te Gad-te le Manasseh beh alangte in galkuan thei ding mi - lum le namsau tawi thei, thal zang thei, galsim dinga kisinsaksa pasal 44,760 a nei uh hi.

¹⁹Amaute in Hagri-te, Jetur, Naphish le Nodad a sim uh hi.

²⁰Amaute sim dingin huhna ngah uh a, Hagri-te le amau kipawlpihte khempeuh amau tungah Pasian in a pia hi, bang hang hiam cih leh galsim laitakin amaute in ama tungah a ko uh hi. Amaute in amah muang uh ahi manin a thungetna uh a dawng hi.

²¹Amaute in Hagri-te ganhonte - kala-oh tul sawmnga, tuu tul zanih le tul sawmnga le laa tul nih a matsak uh hi. Amaute in galmatin mi tul zakhat man uh a,

²²adang tampi a si hi, bang hang hiam cih leh amau’ galdona Pasian aa ahi hi. Tuateh amaute sal-a a kikaih hun dong tua gam a tang uh hi.

²³Manasseh mi beh alangte tam lua mahmah uh a; amaute Bashan panin Baal Hermon, tua pen Senir (Hermon Vum) dongah a teng uh hi.

²⁴Hihte, amau innkuan lutangte ahi uh hi: Epher, Ishi, Eliel, Azriel, Jeremiah, Hodaviah le Jahdiel. Amaute galhang, mi minthang le amau innkuan lutangte ahi uh hi.

²⁵Ahi hangin amaute a pate uh Pasian tungah muanhuai lo uh a, amaute mai-a Pasian in a suksiat tua gama teng mite’ pasiante tungah a kizuak uh hi.

²⁶Tua ciangin Israel Pasian in Assyria kumpipa Pul (tua pen Assyria kumpipa Tiglath-Pileser) Reuben-te, Gad-te le Manasseh beh alangte sal-a kaipa a hansuah hi. Amah in amaute Halah, Habor, Hara le Gozan gunah paipiha amaute tuni dong tua lai-ah a om uh hi.