Read Zokam 2 Khangthute 1 Bible Online

2 Khangthute 1 - Zokam bible

2 Khangthute 1

¹David tapa Solomon in a kumpi-gam kiptakin a uk hi, ahang in, TOPA ama Pasian in amah ompiha, a liansak mahmah hi.

²Tua ciangin Solomon in Israel khempeuh tung - a tulte a ukte tung le a zate a ukte tung, thukhente tung le Israel sunga makaite khempeuh, innkuan lutangte tungah thu gena -

³tuateh Solomon le mipi buppi Gibeon a munsang ah a pai uh hi; ahang in, TOPA nasempa Moses in a lam Kikhopna Puanbuk Pasian aa tua lai-ah a om hi.

⁴Tu-in David in Kiriath Jearim panin a om nadinga a bawlsa munah singkuangpi a puakto khin hi, bang hang hiam cih leh amah in Jerusalem ah tua koih nading puanbuk a zak khitsa ahi hi.

⁵Ahi hangin Hur tapa, Uri tapa Bezalel in a bawlsa sumngo biakna-tau Gibeon-a TOPA biakbuk mai-ah om a; Solomon le amah tawh a kikhawm mipite in amah thu a va dong uh hi.

⁶Kikhopna Puanbuk sung TOPA mai-a sumngo biakna-tau ah Solomon paito a, tua tungah meihal biakna tulkhatte a lui hi.

⁷Tua zanin Solomon tungah Pasian kilang a, "Nang kong piak ding na deih peuhpeuh hong ngen in," a ci hi.

⁸Solomon in Pasian kiangah, "Ka pa David tungah na migitna lianpi na lak khina, ama munah kei kumpi-in nong koih khin hi.

⁹Tu-in TOPA Pasian aw, ka pa David tungah na khapsa kipsak in, ahang in, leivui zaha tam mipi tungah kei kumpi nong suaksak khin hi.

¹⁰Hih mite ka makaih theih nadingin pilna le theihna hong pia in, ahang in, hihzah a tam na mite kua in uk thei ding ahi hiam?" ci-in a dawng hi.

¹¹Pasian in Solomon tungah, "Hih in nangma lungsim deihna ahi neih le lam, hauhna ahikeh pahtawina, na galte sih nadingte nong nget loh nungsang, khansauna zong hong ngen loin kumpi kong suahsakna ka mite uk nadingin pilna le theihna hong ngen na hi manin

¹²tua pilna le theihna nang hong kipia ding hi. Tuateh nang ma le nang nunga kumpite in tua bang a neihloh, neih le lam, hauhna le pahtawina zong kong pia ding hi," a ci hi.

¹³Tua ciangin Gibeon a munsanga Kikhopna Puanbuk mai panin Jerusalem ah Solomon a pai hi. Tuaci-in Israel tungah a uk hi.

¹⁴Solomon in sakolte le sakol-lengte zonbeh a; sakolleng tulkhat le zali le sakol a[1] tulsawm le tulnih nei a, tuate sakolleng khuapite le ama omna Jerusalem ah a koih hi.

¹⁵Kumpipa in Jerusalem ah ngun le khamte suang zatin zanga tamtak singte mualbula theiba singte bangin a tamsak hi.

¹⁶Solomon sakolte b[2] Egypt pan le Kue c[3] pana kila hi a - kumpi sumbawlte in tuate Kue pana a lei uh ahi hi.

¹⁷Amaute in Egypt panin leng khat ngun shekel d[4] zaguk in la uh a, sakol khat za le sawmnga-in e[5] a la uh hi. Amaute in Hit-te le Aram-te kumpite khempeuh tungah zong tuate a puakkhia uh hi.