Read Zokam 2 Khangthute 11 Bible Online

2 Khangthute 11 - Zokam bible

2 Khangthute 11

¹Jerusalem ah Rehoboam a tun ciangin Judah le Benjamin innkuante panin - Israel a sim ding le Rehoboam kumpi-gam a la kik dingin - galdo ding pasal tul za le tul sawm giat a kikhawm uh hi.

²Ahi hangin Pasian mi Shemaiah tungah hih TOPA thu a tung hi:

³"Judah kumpipa Solomon tapa Rehoboam tung le Judah le Benjamin-a om Israel-te khempeuh tungah,

⁴‘TOPA gen hih ahi hi: Na sanggamte uh sim dingin kuanto kei un. Note na inn ciat uah ciah un, hih in keima sep ahi hi, ci hi,’ ci-in gen in," a ci hi. Tua ciangin amaute in TOPA thu mang uh a, Jeroboam sim dinga kuan kimlai a ciah kik uh hi.

⁵Jerusalem ah Rehoboam tenga, a kihut nadingin Judah khuapite a lam hi. Tuate in:

⁶Bethlehem, Etam, Tekoa,

⁷Beth Zur, Soco, Adullam,

⁸Gath, Mareshah, Ziph,

⁹Adoraim, Lachish, Azekah,

¹⁰Zorah, Aijalon le Hebron ahi hi. Hihte in Judah le Benjamin ah kulha ki-um khuapite ahi hi.

¹¹Amah in galdalnate khauhsak zaw in amaute sungah a ukte koih a, an le olive thau le lenggah zu a koih hi.

¹²Amah in khuapi tengah lumte le teipite koih a, amaute a thakhauhsak mahmah hi. Tua hi-a Judah le Benjamin ama aa ahi hi.

¹³Amau gam sung tenga siampite le Levi-te in amah a panpih uh hi.

¹⁴Levi-te in amau lonona mun le a vante nangawn uh nusia in Judah le Jerusalem ah a pai uh hi, bang hang hiam cih leh Jeroboam le a tapate in TOPA siampi dingin amaute a nial uh hi.

¹⁵Tuateh munsang le ama bawlsa keel le bawngno lim ah ama neihsa siampite sehin a semsak hi.

¹⁶Israel beh ciat panin TOPA Israel Pasian zong dingin a lungsim a kipsaksate in TOPA amau pate Pasian tungah biakna pia dingin Jerusalem ah Levi-te a zui uh hi.

¹⁷Amaute in Judah kumpi-gam thakhauhsak uh a kum thum sung Solomon tapa Rehoboam panpih in hih hun sung David le Solomon kalsuan bangin a kalsuan uh hi.

¹⁸Rehoboam in Mahalath a tenpih hi, tuanu pen David tapa Jerimoth tanu hi in, a nu Jesse tapa Eliab tanu Abihail ahi hi.

¹⁹Tuanu in tapa nei a: Jeush, Shemariah le Zaham ahi hi.

²⁰Tua ciangin amah in Absalom tanu Maacah tenpih a tuanu tawh Abijah, Attai, Ziza le Shelomith a nei uh hi.

²¹Rehoboam in a zi dangte le a zino dangte khatpeuh sangin Absalom tanu Maacah a itzaw hi. Amah in a neih vekpi zipi sawm le giat le zino sawmguk, tapa sawmnih le giat le tanu sawmguk a nei hi.

²²Rehoboam in a sanggamte lak pan amah kumpi a suahsak theih nadingin Maacah tapa Abijah uliante ukpipa in a koih hi.

²³Amah in piltakin sema, Judah le Benjamin gamkhente a kulha ki-um khuapite khempeuh ah a tapate pawlkhat a khenthang hi. Amaute annek ding tampitak pia-in a zi ding uh tampi a laksak hi.