Read Zokam 2 Khangthute 13 Bible Online

2 Khangthute 13 - Zokam bible

2 Khangthute 13

¹Jeroboam in a uk a kum sawm le giatna kumin Abijah Judah kumpi suaka,

²Jerusalem ah kum thum sung a uk hi. A nu min Maacah a[52] hi a, Gilead a Uriel’ tanu b[53] khat ahi hi. Abijah le Jeroboam a kido uh hi.

³Abijah in gal sim dingin galdo thei mi tul zali tawh kuana, ama langah Jeroboam in galdo thei mi galkap tul zagiat tawh a pang hi.

⁴Ephraim mualtung gam sunga Zemaraim Vum ah Abijah dingin, "Jeroboam le Israel khempeuh aw, ka thugen ngai un!

⁵TOPA Israel Pasian in David le ama suante tungah kumpi hihna a tawntung thukhunin a piak lam thei lo na hi uh hiam?

⁶Tua hi napi Nebat tapa Jeroboam, David tapa Solomon ulian khat in ama pu a lehdo hi.

⁷Ama kimkot ah mi helhot pawlkhat kikhawm uh a, a khangmoi lai, thukhentat thei nai lo amaute a lehdo dingin a hat nai lo Solomon tapa Rehoboam a langpan uh hi.

⁸"Tua hi-a tu-in David suante khutah a om TOPA kumpi-gam do dingin na geel uh hi. Galkap tampitak na hi mah uh hi, Jeroboam in a bawl kham bawngnote na pasian dingun na kem mah uh hi.

⁹Ahi hangin Aaron tapa TOPA siampite hawlkhia-in gamdang mite hih bangin na siampi ding uh phuaktawm hi lo na hi uh hiam? Bawngtalno khat le tuutal sagih tawh a ki-ap dinga hong pai peuhpeuh pasian ahi lote siampi a suak uh hi.

¹⁰"Ko aa in ahileh TOPA kote Pasian hi-a, amah ka taisan kei uh hi. TOPA nasem siampite Aaron tapate hi uh a, Levi-te in amaute a huh uh hi.

¹¹Amaute in zingsang sim le nitak simin TOPA tungah meihal biaknate le gimnamtui a pia uh hi. Amaute in biakna ngeina-in a siangtho sabuai tungah anlum lui uh a, nitak simin kham meivak tunna tungah meivakte a vak uh hi. Kote in TOPA ka Pasian uh hong sawlnate ka sem uh hi. Ahi hangin note in amah na taisan uh hi.

¹²Pasian in kote hong ompih hi; amah kote makai ahi hi. Ama siampite in a pengkulte uh note langah galsimna in a awngsak ding uh hi. Israel mite aw, zo lo ding na hi manun na pate uh Pasian TOPA langah do kei un," a ci hi.

¹³Tu-in Jeroboam in amaute nunglam ah galkapte umcihsak a, amah Judah mailam ah a om laitak in amaute nungah a pangsimte a om uh hi.

¹⁴Judah-te kihei uh a amaute nung le mai-ah a kisim lam a mu uh hi. Tua ciangin amaute in TOPA a ko uh hi. Siampite in a pengkulte uh mut uh a,

¹⁵Judah mite galdona a awng uh hi. Amaute galdona awging hangin Pasian in Jeroboam le Israel khempeuh Abijah le Judah mai-ah a tai keksak hi.

¹⁶Judah mai-ah Israel-te tai uh a Pasian in amaute khut sung panin a hukhia hi.

¹⁷Abijah le a mite in amaute tungah supna nasiapi tun uh a, Israel mi galsim theite lakah mi tul zanga a si uh hi.

¹⁸Tua thu hangin Israel mite thakiam uh a, Judah mite in TOPA Pasian muang uh ahi manin a gualzo uh hi.

¹⁹Abijah in Jeroboam nungdelh a ama tung panin Bethel, Jeshanah le Ephron khuapite, a kima khuaneute tawh a la hi.

²⁰Abijah hun sungin Jeroboam in vang a nei zo nawn kei hi. Tuateh TOPA in amah sattukin a si hi.

²¹Ahi hangin Abijah thahatna a khang hi. Amah in zi sawm le li pi a, tapa sawmnih le nih le tanu sawm le guk a nei hi.

²²Abijah man lai-a a sep dangte a nasepsa le a thugensate kamsangpa Iddo ciamtehnasa sungah kigelh khin hi.