Read Zokam 2 Khangthute 14 Bible Online

2 Khangthute 14 - Zokam bible

2 Khangthute 14

¹Tuateh Abijah a pate tawh tawlnga a, David Khuapi sungah kivui hi. Ama tapa Asa in a kumpi za luah a, ama uk hun kum sawm sung, gamsung a kilem hi.

²Asa in TOPA ama Pasian mitah ahoih le amanin na a sem hi.

³Amah in gamdang biakna-taute le munsangte phiatkhia-in suang siangthote dengzan a, Asherah khuamte a[54] a phukpai hi.

⁴Judah in TOPA a pate uh Pasian zonga a thukhamte le a thupiakte a man nadingun thu a pia hi.

⁵Amah in Judah khuapi tenga munsangte le gimnamtui halna biakna-taute phiatkhia a, ama ukna nuai-ah kumpi-gam a kilem hi.

⁶Gam sungah kilemna oma kipan Judah ah kulha ki-um khuapite a bawl hi. TOPA in tawlngasak ahi manin tua kumte sungah kuamah in amah a sim kei hi.

⁷Amah in Judah tungah, "Hih khuapite lamin kulhin um ni, tausangte, kongpite le a kalhna zawlte bawl ni. Eite in TOPA i Pasian deihna zong i hi manin i gam ei aa mah hi lai hi; eite in amah i zonga amah in eite i kimkot panin hong khawlsak ahi hi," a ci hi. Tua ciangin amaute in lam uh a, a lamzang uh hi.

⁸Asa in Judah panin lum lian le teipi a tawi galkap tul zathum le Benjamin panin lumneu le thal tawi tul sawmgiat a nei hi. Hihte khempeuh galhang mi vive ahi uh hi.

⁹Amaute sim dingin galkap b[55] tampitak le sakolleng zathum tawh Cush-te Zerah kuankhia a, Mareshah ciangdong a tung uh hi.

¹⁰Amah maituah dingin Asa kuankhia a, amaute a kido dingin Mareshah kianga Zephthah Kuam sungah panmun a la uh hi.

¹¹Tua ciangin Asa in TOPA a Pasian sama, "TOPA aw, a thahatte langa hatna nei lote huh dingin nang tawh a kibang khat beek a om kei hi. TOPA kote Pasian aw, kote hong huh in, ahang in, nang tungah kong kinga uh a, nangma minin hih galkap tampitakte langkhatah ka kuan uh hi. TOPA aw, nang in kote Pasian na hi hi; nang langah mihing phuletsak zo kei in," a ci hi.

¹²TOPA in Asa le Judah mai-ah Cush-te a satpuk hi. Cush-te tai uh a,

¹³Asa le a galkapte in Gerar dong amaute a nungdelh uh hi. Hizah a tam Cush-te kihu thei lo uh a, TOPA le ama galhatna mai-ah amaute a kisuzan ta hi. Judah mite in van kinusia tampitak a puakhia uh hi.

¹⁴TOPA lauhuaina amaute tungah tung ahi manin amaute in Gerar kima khuaneute khempeuh a susia uh hi. Amaute in hih khuaneute luhgawp uh a, tua lai-ah galvan lak a tam mahmah hi.

¹⁵Amaute in gancingte giahphual zong sim uh a, tuu honpi le keelte le kala-ohte a paikhiatpih uh hi. Tua ciangin amaute Jerusalem ah a ciah kik uh hi.