Read Zokam 2 Khangthute 16 Bible Online

2 Khangthute 16 - Zokam bible

2 Khangthute 16

¹Asa kumpi a suah zawh kum sawmthum le guk kumin Israel kumpipa Baasha, Judah sim dingin kuanto a, Judah kumpipa Asa gamah kuamah paikhia loin kuamah a lut theih loh nading dalna-in kulhin Ramah a um hi.

²Tua ciangin Asa in TOPA biakinnpi le ama kumpi inn a, goukholna-a om ngun le khamte lakhia-in tua huna Damascus uk Aram kumpipa Ben-Hadad tungah a khak hi.

³Amah in, "Na pa le ka pa kikalah thukimnasa a om bangin nang le kei kikal ah zong thukimna khat omsak ni. En in ngun le kham kong khak hi. Israel kumpipa Baasha kei kiang panin a nungkik nadingin amah tawh na thuciamna pel in," a ci hi.

⁴Kumpipa Asa tawh Ben-Hadad thukima, Israel khuapite langah a galkap mangpa a kuansak hi. Amaute in Ijon, Dan, Abel Maim a[57] le Naphtali vankholna khuapi khempeuh a zo uh hi.

⁵Baasha in hih thu a zak ciangin Ramah a lam khawla, a nasep a nusia hi.

⁶Tua ciangin Kumpi Asa in Judah mi khempeuh kuansaka, amaute in Ramah panin Baasha zat kimlai suangte le singluangte a puamang uh hi. Amah in tuate tawh Geba le Mizpah a lam hi.

⁷Tua hun laitakin Judah kumpipa Asa kiangah thumupa Hanani pai a: "TOPA nangma Pasian tungah kinga loin Aram kumpipa tungah kinga na hi manin Aram kumpipa galkapte na khut panin a suakta hi.

⁸Cush-te b[58] le Libya-te in sakolleng le sakol tungtuang c[59] galkap thahat tampi nei uh hi lo ahi hiam? Tua hi napi TOPA tungah na kingak ciangin amah in amaute nang khut sungah hong pia hi.

⁹Ahang in, ama tungah a lungsim khempeuh tawh a ki-apte a thahatsak dingin TOPA mitin leitung bup a en kawikawi hi. Nang in a haihuai na na sem zo hi; tu-a kipan gal na do ding hi," a ci hi.

¹⁰Hih thu hangin thumupa tungah Asa a heh hi; amah heh lua ahi manin thong sungah a khum hi. Tua hun mahin Asa in mi pawlkhat zong khelbawl gawpin a nengcip hi.

¹¹Asa hun sunga a nasepte a kipatna panin a tawpna dong Judah-te le Israel kumpite laibu sungah kigelh hi.

¹²A kumpi suah zawh a kum sawmthum le kuana kumin Asa in a khete ah natna a vei hi. A natna a nasiat mahmah hangin a dam loh sung nangawnin TOPA huhna zong lo a, zato siamte tungah a zongzaw hi.

¹³A kumpi suah zawh kum sawmli le kum khatna kumin Asa si-a a pate tawh a tawlnga hi.

¹⁴Amaute in David khuapi sunga ama khuakkhiatsa han sungah amah a vui uh hi. Amaute in gimnamtui le paknamtui tuamtuam tawh tuamin lang’ tungah sial uh a, amah pahtawina-in meiphualpi khat a cih uh hi.