Read Zokam 2 Khangthute 17 Bible Online

2 Khangthute 17 - Zokam bible

2 Khangthute 17

¹Ama tapa Jehoshaphat in a kumpi za luah a, Israel langah a kithakhauhsak hi.

²Amah in kulha ki-um Judah khuapite khempeuh ah galkapte omsak a, Judah sung le a pa Asa in a laksa Ephraim khuapi sungah khuapi cingte a koih hi.

³Jehoshaphat in a neu lai-in a pa David zuihsa lampi tawn ahi manin TOPA in amah a ompih hi. Amah in Baal thu dong loin

⁴Israel-te gamtatnate sangin a pa’ Pasian zongin a thupiakte a zuizaw hi.

⁵TOPA in ama ukna nuai-ah a kumpi-gam kipsak a; neihsa tampi nei-in a kipahtawi nadingin Judah khempeuh in Jehoshaphat letsong a puak uh hi.

⁶TOPA lampite ah a lungsim a pia hi; tua tham loin amah in Judah panin munsangte le Asherah khuamte a phiatkhia hi.

⁷A kumpi suah zawh a kum thumna kumin a uliante Ben-Hial, Obadiah, Zechariah, Nethanel le Micaiah-te Judah khuapite ah thuhilh dingin a sawl hi.

⁸Amaute tawh Levi-te ahi - Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah - le Tob- Adonijah - le siampite ahi Elishama le Jehoram a paikhawmsak hi.

⁹Amaute in TOPA Thukham Laibu keng uh a Judah gam sung khempeuhah hilhin; Judah khuapite khempeuh ah pai kawikawi uh a, mite a hilh uh hi.

¹⁰Amaute in Jehoshaphat a do loh nadingun Judah gam kimkot a kumpi-gam khempeuh ah TOPA kihtakna a tung hi.

¹¹Philistia-te pawlkhat in letsong le siahin ngun puak uh a, Arab-te in ganhon: tuutal tul sagih le za sagih le keel tul sagih le za sagih amah a puak uh hi.

¹²Jehoshaphat vanglian semsem a; Judah sungah kulhte le van koihna khuapite lamin

¹³Judah khuapite ah huhna tampi a puak hi. Amah in galdo siamsate zong Jerusalem ah omsak hi.

¹⁴Amaute a innkuan kuanun a nuai-a bang ahi hi: Judah pan, 1,000 a uk galkap mangte: Galkap mangpa Adnah, Galkap mi 300,000 tawh;

¹⁵azom, galkap mangpa Jehohanan, galkap mi 280,000 tawh;

¹⁶azom TOPA nasem dingin a kipia Zicri tapa Amasiah, mi 200,000 tawh;

¹⁷Benjamin pan: A thahat galkappa Eliada thal le lum tawi mi 200,000 tawh;

¹⁸azom, Jehozabad galhiam tawi mi 180,000 tawh ahi hi.

¹⁹Hihte in Judah gam buppi-a kulha ki-um khuapite a, a omsakte banah kumpipa nasemte ahi uh hi.