Read Zokam 2 Khangthute 18 Bible Online

2 Khangthute 18 - Zokam bible

2 Khangthute 18

¹Jehoshaphat in neih le lam hau-a a kipahtawi hi; tu-in amah mahin kitenna hanga kizopna Ahab tawh a bawl hi.

²Kum tawmvei khit ciangin Samaria a Ahab kiangah hawh dingin a paisuk hi. Ahab in amah le a tonpihte tuu le bawng tampi na gawh a, Ramoth Gilead sim dingin a na kun hi.

³Israel kumpipa Ahab in Judah kumpipa Jehoshaphat kiangah, "Ramoth Gilead nong simpih ding hiam?" ci-in a dong hi. Jehoshaphat in, "Kei le nang a kibang i hi-a ka mite le na mite a kibang ahi hi; gal kong simpih ding hi.

⁴Ahi hangin "TOPA thu dong masa in," ci-in Jehoshaphat in Israel kumpipa kiangah a gen hi.

⁵Tua ciangin Israel kumpipa in kamsangte - pasal zali - kaikhawm a, amaute tungah, "Ramoth Gilead sim dingin ka kuan ding uh hiam, ahikeh ka thuak lel ding uh hiam?" ci-in a dong hi. Amaute in, "Pasian in kumpipa khut sungah hong pia ding ahi manin kuan un," ci-in a dawng uh hi.

⁶Ahi hangin Jehoshaphat in, "Hih lai-ah i dot theih dingin TOPA kamsang khat beek om lo ahi hiam?" ci-in a dong hi.

⁷Israel kumpipa in Jehoshaphat kiangah, "TOPA thu i dotsak theih ding mi khat om lai hi, ahi hangin amah ka muhdah hi; bang hang hiam cih leh kei tawh kisai a hoih khat beek genkhol ngei lo-a a sia hi tawntung hi. Amah Imlah tapa Micaiah ahi hi," a ci hi. Jehoshaphat in, "Kumpipa in tua bang ci kei in," ci-in a dawng kik hi.

⁸Tua ciangin Israel kumpipa in a uliante khat sama, "Imlah tapa Micaiah hong sampak dih un," a ci hi.

⁹Israel kumpipa le Judah kumpipa Jehoshaphat in a kumpi puante uh silhin Samaria lutna kongpi kianga ancilna phual zangah kumpi tokhomin tu uh a, kamsang khempeuh in amaute mai-ah kam a sang uh hi.

¹⁰Tu-in Kenaanah tapa Zedekiah in sikkite bawla, "TOPA thugen hih ahi hi: ‘Aram-te a kisiat khit matengun hihte in amaute na pik ding uh hi,’ ci hi," ci-in a gen hi.

¹¹Kamsang dangte khempeuh in a kibangin kam a sang uh hi. Amaute in, "TOPA in kumpipa khutah hong pia ding ahi manin Ramoth Gilead simin gualzo in," a ci uh hi.

¹²Micaiah sam dinga pai kamtaipa in ama kiangah, "En in kamsang dangte khempeuh in mi khat gen bangin kumpipa zawh nadingin a gen uh hi. Nang zong amaute aa thukimpih inla a gum lamin pau in," a ci hi.

¹³Ahi hangin Micaiah in, "TOPA nuntakna lo a ka cihinah, ka Pasian in kei tunga hong gen bek ama tungah ka gen thei hi," a ci hi.

¹⁴Amah a tun ciangin kumpipa in, "Micaiah aw, Ramoth Gilead sim dingin ka kuan ding uh hiam, ahikeh ka thuak lel ding uh hiam?" ci-in a dong hi. Amah in, "Amaute na khut sungah hong kipia ding hi, sim inla gualzo in," ci-in a dawng hi.

¹⁵Kumpipa in, "Bangmah dang gen loin thutak bek gen dingin TOPA minin bangzah vei hong kiciamsak ka hi hiam?" a ci hi.

¹⁶Tua ciangin Micaiah in, "Israel khempeuh mualtung ah a cing om lo tuu bangin a kithehthang ka mu a, TOPA in, ‘Hih mite pu nei lo ahi uh hi. Amau inn ciatah lungnuamin ciah uh hen,’ ci hi," a ci hi.

¹⁷Israel kumpipa in Jehoshaphat kiangah, "Amah in kei tungtangah a hoih khat beek gen ngei lo-a a sia bek gen hi, ci-a hong gen hi lo ka hi hiam?" a ci hi.

¹⁸Micaiah in genbeh lai-a, "Tua ahi ciangin TOPA thugen za un: TOPA a kumpi tokhom tungah tu-a vantung mihonpite a taklam le a veilamah a ding uh ka mu hi.

¹⁹Tua ciangin TOPA in, ‘Ramoth Gilead sima, a sih nading mun tua lai-ah kua in Israel kumpipa Ahab va zol ding ahi hiam?’ ci hi. "Khat in khat gena adang khat in a tuam khat a gen hi.

²⁰A nunung penin kha khat a mai-ah pai-in TOPA mai-ah dinga, ‘Ke’n amah ka zol ding hi,’ ci hi. "TOPA in, ‘koi ci zia-in,’ ci-in a dong hi.

²¹"Amah in, ‘Ka va pai dinga ama kamsangte khempeuh kam ah kha zuau ka va suaksak ding hi,’ ci hi. "TOPA in, ‘Pai inla hih in, amah zol lecin na zo ding hi,’ ci hi.

²²Tua ciangin tu-in TOPA in na kamsangte khempeuh kam ah kha zuau a koih khin hi. TOPA in na thuak ding gimna a kipsak khin hi," a ci hi.

²³Tua ciangin Kenaanah tapa Zedekiah paitoin Micaiah maitang a beng hi. Amah in, "Na tunga thugen dingin TOPA pana kha a[60] in cikin kei hong paisan ahi hiam?" ci-in a dong hi.

²⁴Micaiah in, "Inn sung tawngah na buk ni ciangin na theikhia ding hi," ci-in a dawng hi.

²⁵Tua ciangin Israel kumpipa in, "Micaiah paipihin khuapi ukpa Amon le kumpipa tapa Joash kiangah puak unla

²⁶‘Kumpipa in: bittaka kong tun kik matengin hih pa thong sungah khumin anlum le tuisik longal bangmah pia kei un, ci hi,’ ci-in gen un," ci-in thu a pia hi.

²⁷Macaiah in, "Bittaka nong tun kik tak leh, TOPA in kei tungah thu a gen lo ahi hi," a cikhia hi. Tua ciangin, "No mite khempeuh aw, ka thugen ciamteh un," a cihbeh lai hi.

²⁸Tua ciangin Israel kumpipa le Judah kumpipa Jehoshaphat Ramoth Gilead ah a kuanto uh hi.

²⁹Israel kumpipa in Jehoshaphat kiangah, "Ken ka mel selin gam sungah va kuan ningin, nang na kumpi puante silh in," a ci hi. Tua ciangin Israel kumpipa a mel selsa-in gal sungah a kuan hi.

³⁰Tua laitakin Aram kumpipa in a sakolleng ukte thu pia-a, "Israel kumpipa longal aneu alian khatpeuh tawh kido kei un," a ci hi.

³¹Sakolleng ukte in Jehoshaphat a muh uh ciangin," Hih in Israel kumpipa ahi hi," ci-in a ngaihsun uh hi. Tua ciangin amah sim dingin a kihei uh hi. Ahi zongin Jehoshaphat kikokhia a TOPA in amah a huh hi. Pasian in ama kiang pan amaute kaikhia hi,

³²ahang in, sakolleng ukte in amah Israel kumpipa ahi loh lam a muh uh ciangin a delh nawn kei uh hi.

³³Ahi hangin mi khat in a thal kekin mawk lot a, Israel kumpipa kidalnate kikal a kha hi. Kumpipa in a sakolleng hawlpa kiangah, "Kidona sung pan leng hawlkhia in hong paikhiatpih in; ka liam hi," ci-in a gen hi.

³⁴Sun nilohin nasiatakin gal kido a, Israel kumpipa a sakolleng tungah kingam in Aram-te lam nga-in nitak dong a om hi. Ni tum ciangin a si ta hi.