Read Zokam 2 Khangthute 2 Bible Online

2 Khangthute 2 - Zokam bible

2 Khangthute 2

¹Solomon in TOPA Min dinga biakinnpi lam ding le ama ading kumpi inn lam ding thu a pia hi.

²Amah in van pua dingin mi tulsawm sagih, mual kawma suang at ding tul sawmgiat le tuate makaih dingin tulthum le zaguk aana-in a lasak hi.

³Solomon in Tyre kumpipa Hiram f[6] tungah: "Ka pa David ten nading kumpi inn lam nadingin tamtak luang na puak bangin kei hong puak in.

⁴Tu-in TOPA ka Pasian Min dingin biakinnpi khat lam ka sawm hi; tuapen ama tungah ap in, ama mai-ah a namtui gimnamtui hal nading, a ki-apsa anlum koihden nading, zingsang sim nitak sim le Sabbath ni sim, Kha Thak ni sim le a kisehsa TOPA kote Pasian pawi hun simin meihal biaknate bawl nading ahi hi. Hih in Israel adingin a kizomden biakna ngeina khat ahi hi.

⁵"Adang pasiante khempeuh sangin kote Pasian lianzaw ahi manin ka lam ding biakinnpi a lian mahmah ding hi.

⁶Ahi zongin vante, a sangpen vante nangawnah amah ta thei lo ding ahi manin ama biakinnpi ding kua in lamsak thei ding ahi hiam? Tua ahi ciangin ama mai-ah biakna hal nading mun khat cih loh biakinnpi lam dingin kei kua ka hi hiam?

⁷Tua ahi manin Judah le Jerusalem ah ka pa David in a zatsa keima khutsiamte tawh a semkhawm dingin ngun le kham le sik lamsang a siam, le a dupsan, a-ausan le adum puan gan siam, khuak-a a gelh ngei mi khat hong puak in.

⁸Tua lai-a na mite singluang at a siam lam thei ka hi manin Lebanon pan tamtak sing, taksing le Algum a[7] singluangte hong puak in.

⁹Ka lam ding biakinnpi lianin thupi ding ahi manin sing tampi hong sik inla, ka mite in na mite tawh na semkhawm ding uh hi.

¹⁰Keimah in sing nasem singphuk nangma nasemte adingin mangbuh gawisa bem b[8] tul sawmnih mangbuh-ham bem tul sawmnih, lenggah zu bath c[9] tul sawmnih, le olive thau bath tul sawm nih ka pia ding hi," a ci hi.

¹¹Tyre kumpipa Hiram in Solomon laikhak thuk a: "TOPA in ama mite it ahi manin amaute’ kumpi hong suaksak hi," ci-in a dawng hi.

¹²Tuateh Hiram in: "Van le lei a bawl TOPA Israel Pasian kiphat hen! Amah in TOPA biakinnpi ding le ama kumpi inn ding a lam dingin thutheihna le theihkak-na a nei tapa pil khat Kumpi David a pia hi.

¹³"Mi khutsiam mahmah Huram-Abi nang kiangah kong sawl hi,

¹⁴amah a nu Dan pan hi a, a pa Tyre pan ahi hi. Amah ngun le kham, sumngo le sik, sing le suang, le adupsan le adum, le a-ausan le saihadial puan hoih zem a kisinsa ahi hi. Amah mualgelh a siamsa hi-a a suaih dinga kipia lim peuhmah a hih theisa ahi hi. Amah in nangma mi ka topa David na pa khutsiamte tawh na a sem khawm ding hi.

¹⁵"Tu-in ka topa in a khapsa mangbuh, mangbuh-ham le olive thau le lenggahzute, na nasemte khak inla,

¹⁶na kisap singluangte khempeuh Lebanon ah phukin tuate phongin kong bawl ding uh a Joppa dung tuipi tungah kong lamsuksak ding uh hi. Tua panin Jerusalem ah tuate na la to thei ding hi," a cihbeh lai hi.

¹⁷Solomon in a pa David simsa Israel sunga pemta khempeuh sim hi; amaute 153,600 a pha uh hi.

¹⁸Amah in amaute lakah 70,000 van pua dingin seh a mual kawma suang seek dingin 80,000 sehin mite nasep vana a makaih dingin 3,600 a seh hi.