Read Zokam 2 Khangthute 21 Bible Online

2 Khangthute 21 - Zokam bible

2 Khangthute 21

¹Tua ciangin Jehoshaphat a pate tawh tawlnga a, David Khuapi sungah amaute tawh a kivui hi. Tuateh a tapa Jehoram in a kumpi za a luah hi.

²Jehoshaphat tapa Jehoram sanggamte, Azariah, Jehiel, Zechariah, Azariahu, Michael le Shephatiah ahi uh hi. Hihte khempeuh Israel f[70] kumpi Jehoshaphat tapate ahi hi.

³A pa un amaute ngun le kham le van manpha tampi tawh Judah gama kulh a ki-um khuapite piakhawm a, ahi hangin a kumpi gam Jehoram a pia hi, bang hang hiam cih leh amah a tapa upa pen ahi hi.

⁴A pa kumpi-gam ah khotakin Jehoram a kikipsak khit ciangin a sanggamte khempeuh le Israel uliante pawlkhat namsau-in a that hi.

⁵Jehoram kumpi a suahin kum sawmthum le nih pha a Jerusalem ah kum giat a uk hi.

⁶Amah in Ahab tanu tenpih ahi manin Ahab innkuan bangin Israel kumpite lampite a zui hi. TOPA muhna ah amah a sia-in a gamta hi.

⁷Ahi ta zongin TOPA in David tawh thukhun a neihna hangin TOPA in David innkuan a siatsak ding a ut kei hi. Amah in David le ama suante neih den dingin meivak khat a piak ding a ciamsa ahi hi.

⁸Jehoram hun sungin Edom in Judah lehdo a, ama kumpi tuam a phut hi.

⁹Tua ciangin Jehoram a uliante le a sakolleng khempeuh tawh tua lai-ah a pai hi. Edom-te in amah le a sakolleng ukte umcih uh a, ahi hangin amah kuanto-a zanin a phulet zo hi.

¹⁰Tuni dong Edom in Judah a lehdo hi. Jehoram in TOPA a pate Pasian nusia ahi manin tua hun mah in Libnah in a lehdo hi.

¹¹Amah in Judah mualtungte ah munsang zong bawl a, Jerusalem a mite amau le amau kizuaksakin Judah lam a khialsak hi.

¹²Jehoram in kamsangpa Elijah kiang panin laikhak khat ngah a tua sungah: "TOPA na pa David Pasian gen ahi hi: ‘Nang in na pa Jehoshaphat ahikeh Judah kumpi Asa lampi na zui kei hi.

¹³Ahi hangin Israel kumpite lampi na zui-a, Ahab innkuante hih bang tektekin Judah-te le Jerusalem a mite amau le amau na kizuaksak hi. Nang in nang sanga hoihzaw na pa innkuan sung mi nangma sanggam pasalte zong na that hi.

¹⁴Tua ahi ciangin tu-in TOPA in na mite, na tapate, na zite le nangma neihsa na peuhmah khauhtakin hong sat ding hi.

¹⁵Nang mahmah gilsung natna-in sawtveipi na ci na dinga na natna in na ngoi a tolhkhiasak ding hi,’" a ci hi.

¹⁶TOPA in Cush-te kianga teng Arab-te le Philistia-te Jehoram tawh a kigalneihsak hi.

¹⁷Amaute in Judah sim uh a luhgawpin kumpi inn sunga a muh uh vante khempeuh le a tapate le a zite tawh a puakhia uh hi. A tapa moi pen Ahaziah a[71] longal tapa khat beek a nusia kei uh hi.

¹⁸Hihte khempeuh khit ciangin TOPA in a kidamsak thei lo gilpi natna tawh Jehoram a hingimsak hi.

¹⁹A hun a cin ciang a kum nihna ciangin a natna hangin a ngoi tolhkhia a, na sa lua mahmah in a si hi. A mite in a pa tungtanga a hih uh bangin pahtawina meiphual a cih kei uh hi.

²⁰Jehoram kumpi a suahin kum sawmthum le nih pha a, Jeruslaem ah kumgiat sung a uk hi. Kuama hehpih lohin amah beimanga David khuapi sungah kivui napi kumpite han ah a kivui kei hi.