Read Zokam 2 Khangthute 25 Bible Online

2 Khangthute 25 - Zokam bible

2 Khangthute 25

¹Amaziah kumpi a suahin kum sawmnih le nga pha a, Jerusalem ah kum sawmnih le kua sung a uk hi. A nu min Jehoaddin d[84] hi-a, amah Jerusalem pan ahi hi.

²Amah in TOPA muhna-ah na sem napi a lungsim neihzah in a sem kei hi.

³A kumpi-gam kiptakin a uk zawh ciangin a pa kumpipa a that uliante a that hi.

⁴Tua hi napi amaute tapate that lo a, ahi hangin Moses Thukham Laibu sunga TOPA thupiakna: "A tate hangin pate kithat lo dinga, pate hangin zong tate a kithat kei ding hi, amau mawhna hangin a si ciat ding uh hi," e[85] a cihna tawh kizui-in a hih hi.

⁵Amaziah in Judah mite khawmsak a, amau innkuan tawh kizui-in a tulte uk ding le a zate uk dingin Judah le Benjamin khempeuh adingin a seh hi. Tua ciangin amah in kum sawmnih le a tungsiah teng kikhawmsak a, teipi le lum tawi thei galkap nasem tul zathum a pha hi.

⁶Amah in Israel panin ngun talent f[86] zakhat piak dingin galkap tul zakhat zong a cial hi.

⁷Ahi hangin Pasian mipa khat ama kiangah pai a, "Kumpipa aw, TOPA in Israel ompih lo a - Ephraim mite ompih lo ahi manin hih Israel galkapte tawh kuan khawm peuhmah kei in.

⁸Na kuanpih teitei a hangtakin gal sungah na do leh Pasian in huhna le lotthalna vang nei ahi manin gal mai-ah nang hong lawnthal ding hi," a ci hi.

⁹Amaziah in Pasian mipa kiangah, "Tua ahileh hih Israel galkapte ka piak hih talent zakhat bang a ci tam?" ci-in a dong hi. Pasian mipa in, "TOPA in tua sanga tamzaw hong pia thei hi," ci-in a dawng hi.

¹⁰Tua ciangin Amaziah in Ephraim panin ama kiangah a paisa galkapte khawlsak a, inn ah a ciahsak hi. Judah tungah amaute heh mahmah uh a, nak heh mahmah sa-in inn ah a ciah uh hi.

¹¹Tua ciangin Amaziah in ama hatna teng makaih-a Ci Kuam ah a galkapte paipih in tua lai-ah Seir mite tulsawm a that hi.

¹²Judah galkapte in zong mi tulsawm a hingin man uh a, ken luvum ah paipih in a kitamzan dingin a vekpi un a lawnsuk uh hi.

¹³Tua hun mah in Amaziah in amaute tawh galkuan dinga a phal loh a ciahsak kik galkapte in Judah khuapite Samaria pan Beth Horon dong a sim uh hi. Amaute in mi tul thum that uh a, van kinusia tampitak a puakhia uh hi.

¹⁴Edom-te golum khin-a Amaziah a ciah kik ciangin Seir mite’ pasiante a pua kik uh hi. Amah in ama pasiante dingin koih a, tuate mai-ah bokin biaknate a hal hi.

¹⁵Amaziah tungah TOPA hehna kuanga amah in kamsangpa khat sawlin tuapa in, "Bang hangin nang khut panin amau mite a hon zo lo hih mite’ pasiante thu dong na hi hiam?" a cisak hi.

¹⁶Amah a paupau laitakin kumpipa in, "Kumpipa thudot khatin nang hong kikoih khin ahi hiam? Khawl in! Bang hangin hong kisattuk ding hiam?" a ci hi. Tua ciangin kamsangpa khawl a, ahi hangin, "Na hici gamtatna hang le kong genpih na ngaih lohna hangin Pasian in nang siatsak dingin a khensat lam ka thei hi," a ci hi.

¹⁷Judah kumpipa Amaziah in a thudot mite thu a dot khit ciangin Israel kumpipa Jehu tapa Jehoahaz tapa Jehoash g[87] tungah, "Hong kuan in kimaituah ni," ci-in tona kam a khak hi.

¹⁸Ahi hangin Israel kumpi Jehoash in Judah kumpipa Amaziah tungah, "Lebanon a thangling kung in Lebanon a tamtak tungah thu zasak a, ‘Ka tapa zi dingin na tanu hong pia in,’ ci hi. Tua ciangin Lebanon a gamsa khat in zui a tua thangling kung a khenuai-ah a tuancil hi.

¹⁹Edom zo ta’ng ci in nang le nang kiphasak in na kisathei hi. Inn ah om hithiat lel ve! Bang dinga nang siat nading le Judah zong a siat nadingin lunghimawhna zongzong se na hia?" ci-in a thuk kik hi.

²⁰Ahi zongin amaute in Edom pasiante zong uh ahi manin Pasian in Jehoash tungah amaute a piak theih nadinga a hih ahi manin Amaziah in a mang nuam kei hi.

²¹Tua ciangin Israel kumpipa Jehoash in a sim hi. Amah le Judah kumpipa Amaziah, Judah a Shemesh ah khat le khat a kimaituah uh hi.

²²Israel in Judah delhkek a mi khempeuh amau inn ciatah a tai uh hi.

²³Israel kumpipa Jehoash in Beth Shemesh ah Ahaziah tapa a[88] Joash tapa Judah kumpipa Amaziah a man hi. Tua ciangin Jehoash in amah Jerusalem ah puak a Ephraim Kongpi panin a Kiukawi Kongpi ciang - pi b[89] zaguk bang a sau Jerusalem kulh khenkhat a phelkek hi.

²⁴Amah in Obed-Edom in a kep Pasian biakinnpi sunga kimu ngun le kham le vanzat khempeuh le kumpi inn a goute khempeuh la-in luangkhama omte tonpih a, Samaria ah a ciah hi.

²⁵Israel kumpipa Jehoahaz tapa Jehoash a sih nung kum sawmnga sung, Judah kumpipa Joash tapa Amaziah a nungta lai hi.

²⁶Amaziah in a uk sunga a nasep dangte a kipatna panin a tawpna dong Judah le Israel kumpite laibu sungah kigelh hi lo ahi hiam?

²⁷Amaziah in TOPA a zuihna pan a kiheikhiat-a kipan amaute in amah Jerusalem ah sawmsim uh a, amah Lachish ah a tai hi; ahi hangin amaute in Lachish ah ama nungah mi sawl uh a, tua lai ah a that uh hi.

²⁸Amah sakolin kipuak kik a, a pate tawh Judah khuapi ah a kivui hi.