Read Zokam 2 Khangthute 26 Bible Online

2 Khangthute 26 - Zokam bible

2 Khangthute 26

¹Tua ciangin Judah mi khempeuh in kum sawm le guk a pha Uzziah, c[90] a pa Amaziah kumpi za a luahsak uh hi.

²Amah in Amaziah a pate tawh a khawlkhawm nungin Elah lam kik-a Judah a ngeina a bangsakpa ahi hi.

³Uzziah kumpi a suahin kum sawm le guk pha a, Jerusalem ah kum sawmnga le nih sung a uk hi. A nu min Jecoliah hi-a Jerusalem pan ahi hi.

⁴A pa Amaziah hihsa bang tektekin TOPA muhna-ah a maanin a gamta hi.

⁵Ama tungah Pasian kihtak d[91] ding lam a lakpa Zechariah nuntak sung teng Pasian a zong hi. TOPA a zon laiteng Pasian in a lawhcingsak hi.

⁶Amah Philistia-te do dingin kuan-a Gath, Jabneh le Ashdod kulhte a phelkek gawp hi. Tua ciangin amah in Ashdod kianga khuapite le Philistia-te lak-ate khempeuh a lampha hi.

⁷Pasian in Philistia-te pan le Gur Baal a tengte pan le Meunim-te panin amah a huh hi.

⁸Ammon-te in Uzziah tungah siah pia uh a, amah vanglian mahmah ahi manin a minliatna Egypt gamgi dongah a kizel hi.

⁹Uzziah in Jerusalem sunga Kiukawi Kongpi, KuamKongpi le kulh kawinate ah tausangte dawh a tuate kulhin a um hi.

¹⁰Amah in mualbulte le zangleite ah ganhon tampitak nei ahi manin sehnel-gam ah tausangte dawh in tuikhuk tampi a to hi. Amah in lei hoih iplah ahi manin mual kawm le lei hoihna gamte ah lote le lenggui lote ah nasem mi a nei hi.

¹¹Uzziah in limtaka kisinsa galkap nei a, tuate thuvanpipa Jeiel le kumpi ulian khat ahi Hananiah ukna nuai-a om ulian khat ahi Maaseiah in a kaihkhop amau phazah tawh kizui-a kikhen galkuan thei ding ahi uh hi.

¹²Galdo thei mite a uk innkuan makaite a vekpi in 2,600 a pha hi.

¹³Amaute ukna nuai-ah galdo dinga kisinsa, kumpipa langkhata galte a dopih ding, a hat a vanglian mi 307,500 ahi hi.

¹⁴Uzziah in a galkapte khempeuh lumte, teipite, siklukhute, sikphawte, thalte le suang veite a guan hi.

¹⁵Amah in Jerusalem a tausang tung le kulh kiu tungah gal nan nadingin thaltangte le suang lianpite lot nading khut siamte geel set a bawl hi. Amah a vangliat dong nasiatakin kihuh ahi manin a nai a gamla ah a minliatna a kizel hi.

¹⁶Ahi hangin Uzziah a vangliat khit ciangin a kiphatsakna in kiamsukna a tun hi. TOPA ama Pasian tungah muanhuai lo-a, TOPA biakinnpi sunga gimnamtui halna tau tungah gimnamtui hal dingin a sungah a tum hi.

¹⁷Siampi Azariah le a thahat lai TOPA siampi adang sawmgiat in a sungah zui uh hi.

¹⁸Amaute in, "Uzziah aw, TOPA tunga gimnamtui hal ding nang adingin maan lo hi. Tua pen gimnamtui hal dinga ki-apsa Aaron suan siampite hih ding ahi hi. Nang na muanhuai kei hi, tua ahi manin biakbuk panin paikhia in; TOPA, Pasian in nang hong pahtawi lo ding hi," ci-in a maitangsalh uh hi.

¹⁹Gimnamtui hal dinga kithawi a khutah gimnamtui halna a tawi Uzziah a heh hi. TOPA biakinnpi sunga gimnamtui halna biakna-tau mai-a om siampite tunga a heh laitakin a taltangah phak e[92] natna a suakkhia hi.

²⁰Siampi makaipa Azariah le siampi dangte khempeuh in amah en uh a amaute in a taltang a phak lam a mu uh hi, tua ciangin amaute in manlangin a hawlkhia uh hi. Hi takpi hi, TOPA in amah thuaksiasak ahi manin amahmah a paikhia nuampah hi.

²¹Kumpi Uzziah in a sih dong phak natna a vei hi. Amah inn f[93] tuam ah teng a - a phakna hangin TOPA biakinnpi panin a kitang koih hi. A tapa Jotham in kumpi inn uk a, gam mite a uk hi.

²²Uzziah uk sunga a sep dangte a kipatna pan a tawpna dong Amoz tapa kamsangpa Isaiah in a ciamteh hi.

²³Uzziah a pate tawh tawlnga khawm a mite in, "Amah phak hi," ci uh ahi manin amaute kiang kumpite tawh kisai lopaang a han ah kivui hi. Tuateh a tapa Jotham in a kumpi za luah a kumpi a suak hi.